* * *
У склад раённых арганізацыйных камітэтаў па правядзенні першага конкурснага этапу на Гомельшчыне ўвайшлі, як вядома, прадстаўнікі ўлад, ідэолагі, спецыялісты па рабоце з моладдзю, работнікі культуры, адукацыі, рэгіянальных сродкаў масавай інфармацыі. Таму сярод удзельнікаў конкурсу шырока прадстаўлены ўсе ўзроставыя групы маладых талентаў. Да правядзення першага этапу Рэспубліканскага конкурсу "Зорка ўзышла над Беларуссю" рыхтуюцца ў Калінкавіцкім раёне. Тут назапашаны пэўны досвед па наладжванні такіх мерапрыемстваў. Справа ў тым, што мясцовы аддзел культуры, як паведамляе "К" яго начальнік Віктар Левановіч, прыдумаў і трэці год рэалізуе творчы праект "Запалі сваю зорку". Але на гэты раз, натуральна, саперніцтва маладых будзе праходзіць у адпаведнасці з палажэннем Рэспубліканскага конкурсу. Таму і прадстаўніцтва яго - значна большае. На ўдзел у першым этапе, што пройдзе ў Калінкавіцкім раённым цэнтры адпачынку 10 снежня, пададзена ўжо больш за сто заявак. Гэта і творчыя калектывы, і асобныя творцы-вучні, студэнты, маладыя работнікі не толькі сферы культуры, але і прамысловасці, сельскай гаспадаркі... А 19 снежня ў Калінкавічах занальны адборачны этап конкурсу. У ім будуць браць удзел канкурсанты з Жыткавіцкага, Петрыкаўскага, Ельскага і іншых раёнаў Гомельшчыны. А ў Кармянскім раёне, як паведамляе "К" дырэктар Раённага цэнтра культуры і адпачынку Таццяна Вяркеенка, першы конкурсны этап разбіты на дзве часткі. Сёння, 5 снежня, у аграгарадку "Літвінавічы" сапернічаюць спевакі і прадстаўнікі размоўнага жанру. А 8 снежня ў аграгарадку "Кароцкі" сустракаюцца маладыя мастакі і танцоры. Першы этап праходзіць ва ўстановах культуры аграгарадкоў не толькі з той прычыны, што Раённы ЦКіА - на капрамонце, але і для больш шырокага ахопу не толькі райцэнтраўскіх, але і сельскіх прэтэндэнтаў на творчую перамогу.