Распачаўся святочны тыдзень 9 кастрычніка вернісажам "Польскае выяўленчае мастацтва другой паловы XVIII - першай паловы XX ст." з калекцыі музея. У экспазіцыі можна пабачыць творы як сусветна вядомых, так і маладаследаваных майстроў жывапісу, скульптуры і графікі, якія адлюстроўваюць самабытнасць і арыгінальнасць польскага мастацтва гэтага перыяду. Польская графіка ўключае рэпрадукцыйную гравюру, аўтарскі эстамп і арыгінальную графіку Францішка Касцецкага, Юліяна Фалата і Генрыха Рэйдліха. Скульптурная школа прадстаўлена творчасцю Чэслава Макоўскага, Уладзіслава Марцынкоўскага і Леапольда Стэйнмана. Жывапісныя дасягненні польскіх творцаў знаёмяць нас з жыццём народа на працягу гэтага часу. Майстры класіцызму Шымон Чэховіч і Тадэвуш Кунц адлюстроўваюць другую палову XVIII ст. Другая палова XIX - у работах Альфрэда Веруш-Кавальскага і Казіміра Бянькоўскага. Рубеж XIX- XX стст. найбольш выяўляе карціна Юзэфа Рапацкага "Пейзаж з млыном".