Як плануецца, тэмамі для абмеркавання стануць дзяржаўныя праграмы і міжнародныя праекты ў галіне фарміравання электронных бібліятэк, узаемадзеянне іх з архівамі, музеямі, навукова-даследчымі ўстановамі па захаванні духоўнай спадчыны шляхам фарміравання электронных кнігазбораў. Мяркуецца абмеркаваць таксама праблему інфармацыйнай няроўнасці і ролю ўстаноў культуры, адукацыі і навукі ў яе пераадоленні, удасканаленне заканадаўчай базы і сістэмы дзяржаўнага рэгулявання ў сферы стварэння і выкарыстання электронных рэсурсаў, праграмна-тэхналагічныя сродкі і метады стварэння, захавання, выкарыстання і суправаджэння іх.У праблемнае поле Чытанняў трапяць таксама арганізацыя доступу да электронных бібліятэк, пытанні ацэнкі эфектыўнасці іх работы, менеджменту і падтрымкі.
Да ўдзелу ў Чытаннях запрашаюцца прадстаўнікі бібліятэк, музеяў, архіваў, адукацыйных і навуковых устаноў, органаў заканадаўчай і выканаўчай улады, грамадскіх аб'яднанняў і арганізацый, вытворцы праграмнага забеспячэння, тэхнічных сродкаў і інфармацыйнай прадукцыі.
У межах Міжнародных кнігазнаўчых чытанняў ахвотныя змогуць прадэманстраваць свае прадукты і паслугі. Таксама запланаваны экскурсія па будынку Нацыянальнай бібліятэкі Беларусі і культурная праграма.