У год 65-годдзя вызвалення Беларусі ад нямецка-фашысцкіх захопнікаў і напярэдадні святкавання 65-годдзя Вялікай Перамогі рэжысёр Раман Цыркін звярнуўся да гэтай балючай тэмы, якая не забываецца і жыве ў чалавечых сэрцах. Яна хвалюе душы і ў чарговы раз прымушае нас звярнуцца да мінулага, каб зразумець веліч і гераізм беларускага народа, яго мужны характар. Раману Цыркіну ўдалося перадаць падзеі часоў вайны, раскрыць характары герояў, прычыны, па якіх у бліндажы шукаюць выратавання людзі, каго на пэўны час аб’ядноўвае адзіны “інстынкт”: надзея на выратаванне. Сляпы чырвоны камандзір (Міхаіл Кліменка), нямецкі дэзерцір Хольц (Раман Цыркін), партработнік (Вадзім Дубраў) — усе яны залежаць адзін ад аднаго і ад малапісьменнай сялянкі Серафімкі (Алена Пракопава).
Сцэнаграфічная ўмоўнасць бліндажа, створаная мастаком-пастаноўшчыкам Андрэем Дзюбаком, дапамагла рэжысёру і акцёрам перадаць карціну ваенных гадоў. А музыка знакамітых “Песняроў”, што гучыць у спектаклі, узмацняе ўспрыняцце трагічных момантаў дзеі. Нездарма пад час прэм’еры ніхто з гледачоў не застаўся абыякавым, і на адрас творчай групы спектакля было сказана шмат цёплых і шчырых слоў падзякі.
На здымку: сцэна са спектакля “Бліндаж”.