НЕПЕРАМОЖНЫЯ! КАЛІ МЫ РАЗАМ — МЫ НЕПЕРАМОЖНЫЯ!
Светламу Дню вызвалення Айчыны ад нямецкафашысцкіх захопнікаў і Дню Незалежнасці Рэспублікі Беларусь гэты нумар прысвячаецца...
Дарагія суайчыннікі!
Сардэчна віншую вас з галоўным дзяржаўным святам — Днём Незалежнасці Рэспублікі Беларусь і вялікай гістарычнай датай — 65-годдзем вызвалення нашай Радзімы ад нямецка-фашысцкіх захопнікаў.
Для беларускага народа выгнанне агрэсараў увасабляе перамогу справядлівасці, свабодалюбства і жыццястойкасці над заняволеннем, варварствам і насіллем.
Вечная слава героям-пераможцам!
У самы трагічны перыяд гісторыі вы не далі растаптаць і паставіць на калені родную Беларусь.
Зямны паклон усім, хто не шкадаваў сябе на фронце і ў тыле, набліжаючы Дзень Вызвалення! Ён мае першаступеннае значэнне для нашай суверэннай дзяржавы. Гэта — сімвал нацыянальнага гонару, доблесці і славы, духоўная святыня, якая аказвае вялікі ўплыў на фарміраванне самасвядомасці і характару цяперашніх пакаленняў беларусаў. Дапамагае нам годна пераадольваць цяжкасці і ўпэўнена ісці да вызначанай мэты.
Страціўшы кожнага трэцяга свайго жыхара і зведаўшы ўсе жахі вайны, Беларусь сёння на міжнароднай арэне актыўна і паслядоўна выступае за вырашэнне спрэчных пытанняў шляхам перамоў, за недапушчэнне новых канфліктаў.
Перамога над фашызмам у Вялікай Айчыннай вайне — яднаючы пачатак для міралюбівых сіл розных краін і народаў. Калі мы разам — мы непераможныя. Ніхто і ніколі не зможа зламіць нас, запужаць, збіць з абранага шляху пабудовы моцнай і квітнеючай Беларусі.
Ад усёй душы жадаю вам, паважаныя суайчыннікі, невычарпальнай энергіі, моцнага здароўя, шчасця і дабрабыту.
Прэзідэнт Рэспублікі Беларусь
Аляксандр ЛУКАШЭНКА