“Вячэра ў тры рукі” — камедыя Пауля Бажа ў пастаноўцы Э.Мартынкіўна аб сустрэчы за вячэрай у рэстаране Георга Фрэдэрыка Гендэля з Іаганам Себасцьянам Бахам. Вячэра двух геніяў паўстала як выдатнае дзейства, поўнае напружання, упрыгожанае дасціпным дыялогам, што закрануў самыя розныя псіхалагічныя аспекты тэмы творчасці і творцы. “Чарадзейкі з Салема” Артура Мілера ў пастаноўцы П.Дамброўскага прадставілі гісторыю кахання дзвюх маладых жанчын на фоне гістарычных падзей Амерыкі ХVІІ стагоддзя, а сямейная маладзёжная камедыя “Тройчы пасцель” Яна Якуба Наляжытага распавяла ў дасціпнай форме пра тое, дзе, калі і як лепш за ўсё вырашаць сямейныя праблемы.
А з 25 па 28 лютага гастрольную “эстафету” падхапіў добра вядомы віцебскаму гледачу Арлоўскі дзяржаўны тэатр для дзяцей і моладзі “Свабодная прастора”. Гэтым разам госці з Арла прапанавалі рок-оперу “Ісус” на музыку Э.Л. Уэбера і лібрэта Ц.Райса ў пастаноўцы маскоўскага рэжысёра Алега Нікалаева.
Самі ж коласаўцы працягваюць свае вандроўкі па вялікіх гарадах і райцэнтрах вобласці. На мінулым тыдні жыхары Наваполацка пабачылі “Васу” М.Горкага, аршанцы — камедыю “Ён, яна, акно, нябожчык” Р.Куні, а ў Лепель і Верхнядзвінск тэатр прывёз музычную камедыю “За двума зайцамі”.
Святлана ДАШКЕВІЧ,
загадчык літаратурнай часткі
НАДТ імя Якуба Коласа