У Маскоўскім акадэмічным музычным тэатры імя Станіслаўскага і Неміровіча-Данчанкі адбыўся гала-канцэрт майстроў мастацтваў Беларусі. Рэжысёрам уражальнага дзейства быў Валянцін Дудкевіч. На сцэну выходзілі лепшыя калектывы нашай краіны, у тым ліку ансамблі “Песняры”, “Сябры”, Тэатр песні Ірыны Дарафеевай, эстрадныя выканаўцы Пётр Ялфімаў і Андрэй Кунец, Дзяржаўны ансамбль танца Рэспублікі Беларусь, дуэт цымбалістак у складзе Юліі Высоцкай і Наталлі Крэчык, салісты-вакалісты Нацыянальнага акадэмічнага Вялікага тэатра оперы і балета Беларусі Алена Сало і Ілля Сенчукоў.
— Масквічы сустракалі нашых майстроў мастацтваў, як заўсёды, цёпла і надзвычай эмацыйна, — паведаміў начальнік аддзела міжнародных сувязей Міністэрства культуры Міхаіл Кажура. — У зале на 1200 месцаў быў сапраўдны аншлаг.
Акрамя ўрачыстага мерапрыемства, у расійскай сталіцы адбыліся афіцыйныя перамовы. У прыватнасці, Уладзімір Матвейчук сустрэўся з кіраўніцтвам маскоўскай мэрыі, Дэпартамента культуры, Камітэта міжрэгіянальных сувязей і нацыянальнай палітыкі горада, Дзяржфільмафонду Расійскай Федэрацыі, Маскоўскага акадэмічнага музычнага тэатра імя Станіслаўскага і Неміровіча-Данчанкі.
Год Беларусі ў Маскве прадоўжыцца да канца лістапада. Урачыстым адкрыццём пакладзены пачатак вялікага комплексу мерапрыемстваў у галінах эканомікі, культуры, адукацыі, сродкаў масавай інфармацыі, спорту, маладзёжнай палітыкі. Адбудуцца і Дні абласцей Беларусі і горада Мінска ў расійскай сталіцы. Завершыцца маштабная акцыя 24 лістапада VI Форумам дзелавога супрацоўніцтва.
Настасся ПАНКРАТАВА