Гітара “прымерыла” сітар

Аляксей Юрынок (флейта) і Раман Ташпулодаў (гітара).

Раман выступаў і сольна, і ў разнастайных ансамблях, дзе гітара была то на роўных з іншымі інструментамі, то ў якасці акампанементу. Дый адыгрывала яна не толькі сваю ролю, але часам і замяшчала іншыя інструменты, быццам “прымерваючы” іх тэмбры на сябе. Гучалі пералажэнні і клавесіннай музыкі, і партыі індыйскага сітара — гітара паўсюль стварала патрэбную псіхалагічна-інтымную ауру. Другое ж аддзяленне, да ўсяго, выявіла кампазітарскія і дырыжорскія здольнасці музыканта.

Сама праграма была складзена надзвычай разнастайна. А сярод прэм’ер быў і каларытны твор індыйскага кампазітара Раві Шанкара, і цыкл “Тры народныя песні” балгарскага гітарыста і кампазітара Атанаса Уркузунава, напісаны для адметнага інструментальнага складу: флейта, віяланчэль і дзве гітары. Затое вакальнымі аказаліся тры Басановы Антоніа Карласа Жабіма, дзе да артыстычных спеваў Марыны Філіпавай далучыліся, акрамя гітары, яшчэ кларнет, віяланчэль, ударныя.

З асаблівай нецярплівасцю чакалася прыпасенае для фіналу выступленне так званага неапалітанскага аркестра, дзе да шматлікіх гітар далучыліся мандаліны, духавыя інструменты і ўдарныя. Падобныя гітарныя калектывы былі распаўсюджаны ў даваенны час у Заходняй Беларусі, пра што сведчыць нядаўняе даследаванне Валерыя Жывалеўскага, выдадзенае асобнай кнігай. Дарэчы, 15 гадоў таму ён разам з жонкай ужо спрабаваў аднавіць гэтыя традыцыі, але праіснаваў той аркестр усяго два гады. Недаўгавечнымі аказаліся і студэнцкія калектывы, складзеныя з навучэнцаў і выкладчыкаў: ансамбль у Беларускай дзяржаўнай акадэміі музыкі, аркестр у Мінскім музычным вучылішчы імя М.Глінкі.

Р.Ташпулодаў не складаў калектыў сам — амаль два гады таму гэта зрабілі заўсёднікі Клуба гітарыстаў пры ДК МАЗа паініцыятыве яго старшыні Алега Капянкова. Раман жа не пабаяўся ўзначаліць такі аматарскі аркестр — і, на здзіўленне многіх, “давёў” яго да выступлення не толькі на 25-годдзі Клуба, што было ў маі, але і на адказнай філарманічнай сцэне. І дапамаглі яму ў гэтым веды і практычныя навыкі, назапашаныя пад кіраўніцтвам дырыжора Уладзіміра Чэрнікава.
Дадамо, што правядзенне такога канцэрта было ініцыятывай самога Рамана. Скончыўшы ў 2006-м Беларускую дзяржаўную акадэмію музыкі па класе гітары Яўгена Грыдзюшкі, малады музыкант выяўляе сваю творчую актыўнасць. Праца салістам Філармоніі для дзяцей і юнацтва не перашкаджае яго ўласным праектам — іх заўсёды шмат, прычым Раман мэтанакіравана імкнецца да іх ажыццяўлення і з кожным годам грае ўсё больш віртуозна і артыстычна, штораз выходзячы пераможцам у творчым спаборніцтве з самім сабой — учорашнім і пазаўчорашнім.
 

Надзея БУНЦЭВІЧ
Фота Таццяны МЕЛЬНІКАВАЙ