 |
| Фрагмент экспазіцыі выстаўкі “Іnsita-2008”. |
У Віцебскім абласным метадычным цэнтры народнай творчасці ладзілася рэтраспекцыя інсітнага мастацтва канца ХХ стагоддзя. Тут дэманстраваліся работы Хведара Максімава, Мікалая Байцова, якія прадстаўлялі Беларусь на Міжнароднай выстаўцы-трыенале “Інсіта-97” у Браціславе (Славакія), Пятра Зяляўскага, аўтара першага ансамбля (в. Слабодка Браслаўскага раёна) манументальнай сакральнай скульптуры за часам перабудовы, Марыі Ларынай, стваральніцы дыванкоў народнага жывапісу, іншых знакамітых народных мастакоў Віцебшчыны. У цэнтры экспазіцыі — інсталяцыя “Райскія нябёсы”. Калекцыя фарміравалася цягам апошніх трыццаці гадоў.
У Віцебскім абласным краязнаўчым музеі прадстаўлены творы мастакоў-самавукаў з раёнаў рэспублікі. Прэзентуюцца 226 твораў 35 аўтараў. У цэнтральнай зале выстаўлены работы, набліжаныя да традыцыйнай народнай культуры. Дэкаратыўны жывапіс з ляснымі краявідамі Беларусі ды ідылічнымі сцэнамі жыцця чалавека ў суладдзі з прыродай дапаўняюць кампазіцыі з расфарбаванай скульптуры Мікалая Тарасюка (в. Стойлы Пружанскага раёна) і Віктара Цяцёркіна (в. Халамер’е Гарадоцкага раёна).
Мастакі скарыстоўваюць кампазіцыйныя схемы маляванак і стэрэатыпы вобраза народнага героя для адлюстравання знакамітых асоб айчыннай і сусветнай гісторыі. Адпаведна законам фальклорнай рэдукцыі Сяргей Каваль раскрывае праз паўсядзённасць сюжэт пра Рагнеду і яе сына Ізяслава, а таксама малюе французскага мастака Клода Манэ, які вудзіць рыбу. Карціны-маляванкі Вольгі Ярэська з дапамогай пастаральнага сюжэта аднаўляюць гісторыю кахання Барбары Радзівіл і Аўгуста Жыгімонта, рамантычныя вобразы з літаратуры ХІХ стагоддзя. Каты — героі Тамары Даўд — пакінулі кветкавыя бардзюры маляванак і “жывуць” на палотнах, нібы сапраўдныя гараджане.
Выстаўка “Інсіта-2008” арганізавана Віцебскім АМЦНТ і Віцебскім абласным краязнаўчым музеем пры падтрымцы ўпраўлення культуры Віцебскага аблвыканкама і пад эгідай Міністэрства культуры Рэспублікі Беларусь.
Людміла ВАКАР
Віцебск
Віцебск