 |
Р.Баэра. “Карозія”. |
— Італія ў першую чаргу вядомая сваімі помнікамі скульптуры і архітэктуры часоў Старажытнага Рыма, мастацтвам эпохі Адраджэння. Мы ж хацелі прадэманстраваць, што наша краіна мае вельмі цікавыя, глыбінныя, бесперапынныя традыцыі сучаснага мастацтва, — зазначыў на адкрыцці Пасол Італьянскай Рэспублікі ў Рэспубліцы Беларусь Нарберта Капэла. — Вядома, яно ўспрымаецца публікай не так проста і лёгка, як прызнаныя шэдэўры. У сувязі з гэтым мне падаецца, што работы спадарыні Баэра вельмі пасуюць клімату і атмасферы, якія пануюць у Мінску.
Арганізатары падрыхтавалі не толькі экспазіцыю палотнаў, але і відэапрэзентацыю, з дапамогай якой можна пабачыць, як мастачка з Генуі працуе над сваімі творамі. Яна адмыслова ўзяла за аснову французскую сістэму стварэння карцін без рам. У гэтым выпадку кампазіцыя выходзіць за межы палатна, раскрываючыся ў прасторы. Як вынік атрымліваецца своеасаблівы сімвал свабоды і неабмежаванасці. Але, з усмешкай зазначыла сама спадарыня Рэната, адсутнасць рам дапамагала яшчэ і падарожнічаць: усе работы выдатна змяшчаліся ў адным чамадане, таму яна магла хутка пераязджаць з адной галерэі ў другую.
— Я не думаю, што жывапіс павінен дакладна адлюстроўваць рэчаіснасць. Гэтай задачы, на маю думку, адпавядае кінематограф. Сучаснае мастацтва дае магчымасць успрыняць свет іншымі пачуццямі — праз пах, тактыльнасць — і ў фарбах абазначыць яго зменлівасць, — расказала Рэната Баэра. — Упэўнена, вашы гледачы мяне зразумеюць, бо Беларусь па сваёй прыродзе з’яўляецца вельмі адчувальнай духоўна.
У сваіх работах мастачка выказвае пратэст супраць вайны, заклапочанасць станам экалогіі, узнімае пытанні духоўнасці. І вырашае яна гэтыя праблемы своеасаблівым шляхам. Прыкладам, драўляныя літары “К” з рэчыва карком, якімі творца запоўніла прастору залы, у яе разуменні ствараюць адмоўнае ўражанне, якое, мабыць, найбольш адпавядае якойсьці ваеннай канцэпцыі. Таму яна аб’яднала літары з іх люстэркавымі адбіткамі, каб у выніку наўкола залуналі матылькі — гімн Прыродзе.
Настасся ПАНКРАТАВА