Яе даваеннае жыццё
Калі аб актыўным удзеле Алены Мазанік і Марыі Осіпавай у забойстве В.Кубэ маецца багатая літаратура, то ўдзел Надзеі Траян у гэтай аперацыі, нягледзячы на шэраг газетных і часопісных артыкулаў і нават выхад асобнай кнігі аб ёй, даследаваны недастаткова. Можа, таму некаторыя жыхары нашай рэспублікі і цяпер задаюць пытанне: “А за што ганаровае званне Героя Савецкага Саюза далі Надзеі Траян?”
Перш за ўсё нагадаем, што вядома нашым чытачам аб даваенным жыцці Надзеі Віктараўны.
Малая радзіма Н.В.Траян — горад Дрыса (цяпер Верхнядзвінск Віцебскай вобласці). Тут у беларускай сям’і служачага Віктара Траяна 24 кастрычніка 1921 года пачаўся яе жыццёвы шлях. У кастрычніку 1935 года 14-гадовая Надзея стала камсамолкай, у 1939 годзе скончыла сярэднюю школу.
У тым жа годзе яна паступіла ў 1-ы Маскоўскі медыцынскі інстытут, дзе вучылася на першым курсе. У сувязі з тым, што сям’я ў канцы 1939 года пераехала ў Мінск, дзе бацька Віктар Траян пачаў працаваць галоўным бухгалтарам фабрыкі “Камунарка”, Надзея перавялася ў Мінскі медыцынскі інстытут.
У гады вайны
У пачатку Вялікай Айчыннай вайны 20-гадовая Надзея Траян уключылася ў барацьбу з нямецкімі акупантамі. У пачатку 1942 годзе сям’я пераехала ў гарадскі паселак Смалявічы, дзе Надзея пачала працаваць рахункаводам на торфзаводзе. Яна стала падпольшчыцай і ўдзельнічала ў арганізацыі і рабоце маладзёжнай падпольнай групы, створанай на торфазаводзе.
З ліпеня 1942 года Надзея стал разведчыцай і медыцынскай сястрой партызанскага атрада “Бура” 4-й партызанскай брыгады “Дзядзі Колі” Смалявіцкага раёна Мінскай вобласці (афіцыйная назва “Разведвальна-дыверсійная група НКУС СССР “Бывалыя” пад кіраўніцтвам Пятра Лапаціна — Э.І.). Траян прымала ўдзел у баявых аперацыях па падрыву мастоў, нападах на варожыя абозы і баях з карнікамі. І яшчэ Надзея стала другім нумарам кулямётнага разліку атрада “Бура”, якім камандаваў Міхась Скаромнік.
Па заданню камандавання разам з Марыяй Осіпавай і Аленай Мазанік яе і прыцягнулі да падрыхтоўкі аперацыі па знішчэнню генеральнага камісара Беларусі Вільгельма Кубэ.
Самыя складаныя заданні
У пачатку ліпеня 1943 года Надзею Траян выклікалі ў штаб брыгады і намеснік камандзіра брыгады “Дзядзі Колі” па разведцы, камандзір спецгруппы “Артур” маёр дзяржбяспекі Іван Фёдаравіч Залатар прыцягнуў яе для работы ў аператыўнай групе Наркамата унутраных спраў СССР.
Надзея Траян ужо падтрымлівала сувязь з Мінскім антыфашысцкім падполлем. І калі Іван Залатар пры пошуку выканаўцаў знішчэння В.Кубэ перабраў некалькі магчымых варыянтаў, перш за ўсё ён спыніў свой выбар на Надзе Траян. Менавіта ёй і былі даручаны самыя складаныя заданні.
Першай яе задачай было сабраць звесткі аб распарадку жыцця В.Кубэ, затым — знайсці сярод насельнікаў дома генеральнага камісара генаральнай акругі “Беларусь” надзейнага чалавека.
Надзеі зрабілі дакументы, і яна перасялілася ў Мінск пад сваім прозвішчам, стала рэзідэнтам спецгрупы “Артур”, атрымаўшы псеўданім “Канская”. Траян нават заключыла фіктыўны шлюб, аформлены афіцыйна, каб у выпадку чаго тлумачыць свой пераезд у Мінск. Некалькі членаў спецгрупы “Артур” суправаджалі Н.Траян да 16-га кіламетра, да адной з хат вёскі Слабодчына, дзе яна пакідала свой веласіпед па вяртанню з Мінска. Надзея пераапраналася і далей ужо ехала на веласіпедзе адна. А партызаны чакалі яе вяртання ў лесе, каля вёскі. Выдалі Н.Траян маленькі браунінг.
Аднойчы Надзея даведалася, што ў асабняку ў Кубэ ці працуе, ці раней працавала прыгожая жанчына Таццяна Каліта. Яе муж Рыгор Грынгауз вучыўся з ёй у Мінскім медыцынскім інстытуце. Неяк ён захварэў, і ўся група студэнтаў пайшла яго наведаць. Толькі аднойчы Н.Траян і была ў той кватэры, але нітачка ад яго жонкі Таццяны цягнулася да Кубэ.
Надзея адшукала ў Мінску Каліту, якая пражывала ў бацькоўскай хаце на вуліцы Талстога, каля Таварнай станцыі. Таццяна яе ўспомніла. Гэта было 1 жніўня 1943 года. Менавіта з 1-га па 8 жніўня Н.Траян кожны дзень наведвала Таццяну. У той час Т.Каліта ўжо не працавала ў Кубэ, але адзначыла, што ў генеральнага камісара Беларусі засталася працаваць яе добрая сяброўка Галя (Алена Рыгораўна) Мазанік Таццяна паабяцала пазнаёміць Надзею з Галей.
Калі Надзея і Галя-Алёна пачалі сустракацца, Траян сказала Гале аб мэце яе прыходу. Спачатку Мазанік была падазронай і адносілася да Надзеі асцярожна. Але ад сустрэчы да сустрэчы адносіны ўмацоўваліся і праясняліся. Не без цяжкасцей, але яны зразумелі адна другую. Н.Траян была цвёрда ўпэўнена, што Галя не падвядзе, з ёй можна гаварыць начысціню.
Праз некаторы час Траян перадала ў партызанскі атрад “Бура” атрыманую ёй ад Галі Мазанік інфармацыю, У партызан з’явіўся просценькі, аднак вельмі карысны малюнак размяшчэння пакояў асабняка Кубэ — у прыватнасці, на ім была пазначана спальня генеральнага камісара Беларусі. Малюнак той па просьбе Надзеі падрыхтавала Мазанік.
А ўжо 18 жніўня 1943 года Мазанік дала цвёрдую згоду здзейсніць акцыю помсты супраць В.Кубэ.
Такім чынам менавіта маладая разведчыца Надзея Траян была першай, якая выйшла на Галю (Алёну) Мазанік, і, як кажуць у разведцы, яе завербавала. Так аперацыя па знішчэнні В.Кубэ ўступіла ў рашаючую стадыю. Спыніліся на такім варыянце акта адплаты: да яго ў ложак, пад пярыну, павінна быць закладзена міна з гадзіннікавым механізмам.
Урэшце, мін было дзве, якія, так бы мовіць, паралельна рухаліся ў акупіраваны Мінск з партызанскіх атрадаў. Адна — у карзіне пад ягадамі ў Марыі Осіпавай, другая — у каробцы з-пад торта ў Надзеі Траян. І так здарылася, што міна Марыі Осіпавай дабралася ў Мінск першай.
Міну англійскай вытворчасці, якую ў СССР атрымлівалі па ленд-лізу, Надзея Траян пранесла праз усе нямецкія і паліцэйскія кардоны ў Мінск. Гэта адбылося 22 верасня 1943 года, калі ўжо В.Кубэ быў забіты. У горадзе ішлі масавыя арышты і аблавы…
Але Траян не выкінула міну, а, мінуючы ўсе паліцэйскія кардоны, прынесла яе назад у партызанскі атрад. У Надзеі пыталіся, навошта было так рызыкаваць жыццём. І яна проста патлумачыла: у партызан не хапае такіх англійскіх мініацюрных мін.
Дапамагло ёй і тое, што яна ведала не толькі нямецкую мову, але была гаваркой, магла разгаварыць паліцая, пачаць жартаваць і адцягнуць увагу.
Пасля доўгага і дэталёвага допыту Н.Траян (пасля яе прылёту ў Маскву ў верасні 1943 года — Э.І.) Народным камісарам дзяржаўнай бяспекі СССР камісарам дзяржаўнай бяспекі 1 ранга В.Мяркулавым, намеснікам Народнага камісара дзяржаўнай бяспекі СССР камісарам дзяржаўнай бяспекі 2 ранга Кабулавым і начальнікам Разведупраўлення Чырвонай Арміі генерал-лейтэнантам Кузняцовым ёй прыйшлося 13 кастрычніка 1943 года напісаць яшчэ і абсалютна неабходную “тлумачальную запіску” свайму прамому начальніку — кіраўніку 4-га аддзялення НКДБ СССР Паўлу Анатольевічу Судаплатаву. Яна заканчвалася такімі радкамі:
“…Как впоследствии оказалось, Кубе был убит именно Галей, миной, полученной ею от других лиц.
Несмотря на это, я твёрдо заявляю, что инициатива в обработке Гали на убийство Кубе, упорная и настойчивая психологическая подготовка её принадлежат мне, что я и делала под руководством Ивана Фёдоровича” (то-бок камандзіра спецгруппы “Артур” маёра дзяржбяспекі Івана Фёдаравіча Залатара).
Герой СССР
Героем Савецкаго Саюза Надзея Траян стала ў 22 гады — 29 кастрычніка 1943 года. І тады ж фюрэр Германіі Адольф Гітлер аб’явіў партызанскую разведчыцу сваім асабістым ворагам за ўдзел у аперацыі па знішчэнню генеральнага камісара генеральнай акругі “Беларусь” групенфюрэра СС Вільгельма Кубэ.
Пасля Вялікай Айчыннай вайны Надзея Траян у 1947 годзе скончыла 1-ы Маскоўскі медыцынскі інстытут імя І.М.Сечанава па спецыяльнасці “ўрач-хірург”. У 1962 годзе яна стала кандыдатам медыцынскіх навук, а трохі пазней — дацэнтам.
На працягу многіх гадоў Надзея Віктараўна займалася адукацыйнай, дзяржаўна і грамадскай дзейнасцю. Яна працавала выкладчыкам і дацэнтам ВНУ, дырэктарам Усесаюзнага навукова-даследчага інстытута санітарнай асветы Міністэрства аховы здароўя СССР, прарэктарам 1-га Маскоўскага медыцынскага інстытута.
Што яшчэ цікава, менавіта Надзея Траян стала адным з ініцыятараў перайменавання станцыі Маскоўскага метрапалітэна “Ізмайлаўскі парк” у “Партызанскую”, Афармленне гэтай станцыі было вядома з 1944 года і прысвячалася тэме партызанскага руху — у гады Вялікай Айчыннай вайны ў СССР.
Н.В.Траян не стала 7 верасня 2011 года — на 90-м годзе жыцця. На будынку Першага Маскоўскага медыцынскага ўніверсітэта імя І.М.Сечанава 25 кастрычніка 2013 года была ўстаноўлена мемарыяльная дошка ў яе гонар.
Эмануіл Рыгоравіч Іофе, доктар гістарычных навук