Упачатку нарады асаблівую ўвагу Анатолій Маркевіч звярнуў на тэму прышчэпак ад каранавірусу работнікаў культуры краіны. Найбольш актыўна вакцынацыю прайшлі ў Магілёўскай вобласці — 43% супрацоўнікаў галіны. Найменшы паказчык у Віцебскай вобласці — 21% супрацоўнікаў. Міністр загадаў і далей пільна сачыць за сітуацыяй і пераконваць работнікаў культуры ў неабходнасці вакцынацыі.
Закранаючы пытанне, датычнае Дзён культуры Беларусі ў Казахстане (праходзілі з 1 па 3 кастрычніка), міністр адзначыў, што прымаючы бок сустрэў нашу дэлегацыю вельмі гасцінна, а беларускія артысты годна паказалі сваё майстэрства. Асабліва важным гэта свята было для беларускай дыяспары ў Казахстане.
У хуткім часе адбудуцца Дні беларускай культуры і ў Расіі. Анатолій Маркевіч выказаў меркаванне, што іх мусяць прадстаўляць не толькі тэатр імя Янкі Купалы, мастацкія выставы і прадукцыя Беларусьфільма, але і іншыя разнапланавыя калектывы, у тым ліку і рэгіянальныя.
Было зазначана, што на мінулым тыдні “Беларусьфільм” прымаў удзел у фестывалі “Перліна шоўкавага шляху” ва Узбекістане. Наша дэлегацыя годна прадставіла краіну. На мерапрыемстве прысутнічалі дэлегацыі 30 краін свету, культурная падзея адбывалася ў 37 рэгіёнах Узбекістана. З гэтай нагоды Анатолій Маркевіч выказаў меркаванне аб мэтазгоднасці правядзення кінафестываля “Лістапад” і ў шматлікіх рэгіёнах Беларусі.
Падчас нарады ўздымалася і тэма святкавання ў 2025 годзе 900-годдзя Полацкага жаночага манастыра. Міністэрства культуры прыме неабходны ўдзел у падрыхтоўцы да ўрачыстасці, у прыватнасці, у рэстаўрацыі Спаса-Прэабражэнскага храма. Абмяркоўвалася і пытанне, звязанае з устаноўкай помніка мітрапаліту Філарэту ў Мінску.