— Мы пабывалі ў 17 гарадах — ад Новага Урэнгоя да Кішынёва, — распавёў на спецыяльнай прэс-канферэнцыі, прысвечанай дабрачыннай акцыі, Аляксей Лысянкоў. — Юля на беразе Паўночнага Ледавітага акіяна запусціла чырвоную ракету, распачаўшы ў верасні наш аўтапрабег, і, нарэшце, мы ў Мінску.
Дабрачынны канцэрт музыкантаў стаўся толькі адным з мерапрыемстваў акцыі, прымеркаванай прыцягнуць як мага болей увагі грамадскасці да праблемы СНІДу: пад час яе правядзення ў буйных гарадах ладзіліся лекцыі, трэнінгі з дактарамі, валанцёрамі, “круглыя сталы” з удзелам прадстаўнікоў адміністрацыі, зацікаўленых міністэрстваў і ведамстваў, інфармацыйныя кампаніі ў СМІ… Па словах Аляксея Лысянкова, у падтрымку праекта былі зняты васемнаццаць 30-хвілінных фільмаў на аснове рэальных гісторый людзей, якія заразіліся ВІЧ-інфекцыяй. “Я выслухаў мноства гісторый, — кажа тэлевядучы, — але ўсе яны пачыналіся з адных і тых жа слоў: “Я ніколі не думаў, што гэтая праблема закране мяне…” Сёння вірус выйшаў у асноўную папуляцыю насельніцтва, — і мы павінны гаварыць пра гэта, а значыць, нам неабходна не толькі берагчы сваё здароўе, але і талерантна ставіцца да ВІЧ-інфіцыраваных людзей, змяняць да іх сваё стаўленне, інакш вірус, які не ведае перашкод і прадузятасцей, — пераможа”.
“Неабходна навучыць нашу моладзь беражліва ставіцца да свайго цела, — пракаменціравала сваю пазіцыю Юлія Чычэрына. — Да прыкладу, са свайго боку, нядаўна я кінула курыць і пачала больш уважліва ставіцца да таго, што ем”.
“Жыццё — вялікае, а здароўе ў нас — адно”, — падтрымаў расійскую спявачку беларускі дуэт “Аляксандра і Канстанцін”.
Трэба адзначыць, што ўдзельнікі не толькі на словах, але і на справе прапагандуюць талерантнае стаўленне да хворых: у камандзе аўтапрабегу прымаюць удзел людзі са станоўчым вынікам аналізу на ВІЧ.
Нагадаем, што Першая Усерасійская акцыя “СНІД-СТОП!” прайшла летась. Сёлета праект набыў статус міжнароднага.
Дар’я АМЯЛЬКОВІЧ
На здымку: удзельнікі прэс-канферэнцыі.
Фота Дзмітрыя ЕЛІСЕЕВА