Першая вечарына “Алег Молчан — 55” будзе паказана акурат у дзень юбілею, 11 красавіка, і з’яднае эстрадныя песні кампазітара. Другая пройдзе роўна праз тыдзень і будзе прысвечана харавой творчасці. Назву ёй даў харавы цыкл Алега Молчана “Я нясу вам дар” — і гэтыя словы Янкі Купалы сталі шмат у чым сімвалічнымі, акцэнтуючы ўвагу на творчым прынашэнні аўтараў свайму народу. Купалавы радкі натхнілі кампазітара на стварэнне не толькі згаданага цыкла, але і пазнейшай песні “Малітва”, якая стала ўспрымацца своеасаблівым гімнам-абярэгам Беларусі. Прагучаць у гэтым канцэрце і прэм’еры духоўных твораў Алега Молчана. Гэта Трапар Божай Маці “Усецарыца” і “Ойча наш”.
Сярод выканаўцаў — мітрапалічы хор Мінскага Свята-Духава кафедральнага сабора пад кіраўніцтвам Віталя Сабалеўскага, акадэмічны хор Белтэлерадыёкампаніі на чале з Андрэем Саўрыцкім, вакальны ансамбль “Чысты голас”, гурт “Бай Сіці”, ансамбль “Гуляй, казак!”, а таксама такія вядомыя салісты-“песняроўцы”, як заслужаны артыст Беларусі Анатоль Кашапараў, Вадзім Касенка. Весці абодва канцэрты будзе ўдава Алега Молчана — спявачка Ірына Відава.