Аляксандр Угляніца ўвайшоў у гісторыю беларускай фатаграфіі як удзельнік творчай групы МЕТА. Аб’яднанне, створанае ў 1980-я, злучала трох фатографаў — Аляксандра Угляніцу, Віктара Каленіка і Аляксея Труфанава, і лічылася і лічыцца адной з самых наватарскіх суполак сярод мінскіх фатографаў. Творы ўдзельнікаў МЕТА вылучаліся смелым і нетрывіяльным падыходам да прадмета здымак, нечаканай эстэтыкай; візуальныя пошукі аўтараў перагукаліся са слыннымі выявамі сусветнавядомых фатографаў і адначасова былі ўкаранены ў лакальны асяродак, ні да чога не падобныя.
Ігар Лебедзеў, куратар і даследчык Дзяржаўнага музейна-выставачнага цэнтра РОСФОТО ў Санкт-Пецярбургу, дзе знаходзіцца калекцыя Мінскай школы фатаграфіі, вылучае ўдзельнікаў META як самых творча разняволеных і наватарскіх.
Шчырыя спачуванні родным і сябрам фатографа. Мастацкі свет страціў выбітнага мастака, творы якога чакаюць сваіх даследчыкаў.
Дар'я АМЯЛЬКОВІЧ