У трох адзначаных гарадах Spellbound Contemporary Ballet пакажа “Уверцюры Расіні” ў харэаграфіі Маура Астолфі. Італьянскі “дансант” адбудзецца ў рамках сусветнага гастрольнага тура, што здзяйсняецца пры фінансавай падтрымцы нацыянальнага італьянскага камітэта, які аплачвае авіяпералёт артыстаў і перавозку дэкарацый. Балет быў пастаўлены да 150-годдзя з дня смерці кампазітара, імя якога стала адным з мастацкіх брэндаў сваёй краіны.
Гэта далёка не адзіны гасцявы сюрпрыз фестывалю. Ажно тры свае новыя працы пакажа трупа “Балет Яўгена Панфілава” з Пярмі. Калектыў — равеснік IFMC, і сёлета спаўняецца 25 гадоў з часу яго першага прыезду на віцебскі форум. Менавіта дзякуючы Яўгену Панфілаву фестываль набыў у свой час цяперашні выгляд, распачаўшыся ў канцы 1980-х з аматарскага брэйку, які ў тыя савецкія часы здаваўся глытком свежага паветра.
Нельга прапусціць і чарговы двухактавы балет Раду Паклітару — яго ўласную версію “Спячай прыгажуні”. Гэтая прэм’ера ўзнікла ў рэпертуары яго аўтарскага тэатра “Кіеў Мадэрн Балет” дзякуючы швейцарскаму гранту. І ўжо скарыла прыхільнікаў сучаснага танца на штогоднім летнім фестывалі ў Адэсе.
Як заўжды, будзе і перформанс у час адкрыцця фестывалю ў Віцебску, і разнастайныя выставачныя праекты, якія сёлета з’яднаюць пластыку не толькі з фотамастацтвам, але і са скульптурамі Андрэя Вараб’ёва.
Ды ўсё ж у цэнтры фестывальных падзей, безумоўна, апынецца конкурс — тым больш, што сёлета ён таксама міжнародны. На адборачны тур, які традыцыйна праходзіць на аснове дасланых відэазапісаў, паступіла амаль сотня заявак з больш як дзесяці краін. На конкурс прымаліся кампазіцыі працягласцю не больш за 20 хвілін, але сёлета, у адрозненне ад мінулых гадоў, значна пераважаюць менавіта буйныя формы. Наколькі яны ўразяць журы, даведаемся на ўрачыстым закрыцці фестывалю — увечары 25 лістапада.