Як вядома, карціны Пірасмані рэдка пакідаюць Тбілісі (у Нацыянальным музеі Грузіі захоўваецца 160 ягоных работ).
Апошняя буйная выстаўка была ў 2006 годзе ў Кіеве. Наступны паказ плануецца ў Парыжы.
Самабытная творчасць Пірасмані з’яўляецца значнай і арыгінальнай часткай грузінскага мастацтва, якое налічвае некалькі стагоддзяў. Ён жыў і ствараў свае карціны на мяжы ХІХ — ХХ стст.
Ніка Пірасмані вылучаўся сярод сваіх суайчыннікаў незвычайным дарам вобразнага і сінтэтычнага ўспрыняцця рэчаіснасці. Яго творчы свет ахопліваў людзей, прыроду, жывёл, а таксама ўсю разнастайнасць прадметнай рэчаіснасці. Для Пірасмані жыццё і мастацтва, мастацтва і чалавек былі цесна ўзаемазвязаны. Найбольш вядомыя яго работы — “Дзяўчынка з паветраным шарам”, “Велікоднае ягня”, “Леў і сонца”, “Асліны мост”, “Сямейны пікнік”, “Батумі”, “Артчальскія прыгажуні”.
Большасць з ацалелых па сёння яго карцін — якраз выявы людзей і жывёл.
Персанажы майстра падаюцца знешне спакойнымі, але ўсе яны напоўнены ўнутраным драматызмам, гэта не канкрэтныя вобразы, а тыпы: дворнік, кухар, катрыншчык. Усе яны нібы пазіруюць перад фотакамерай. Кампазіцыі — дакладныя і статычныя, каларыт — строгі і вытрыманы, а колеры набываюць часцяком сімвалічнае гучанне.
Адкрыццё Пірасманашвілі было цудам, бо яго мастацтва аказалася актуальным і сучасным з пункта гледжання агульнага развіцця мастацтва. Яго творчасць, не залежная ад традыцый прафесійных мастакоў, адпавядала патрабаванням і задачам авангарда. І сёння яна ўспрымаецца як блізкая людзям, выклікае ў нас глыбокія эмоцыі і захапленне.
Дадамо, што выстаўка працуе да 13 жніўня.
Матэрыялы пра жыццё і творчасць мастака чытайце ў наступных нумарах “К”.