ІНСТРУКЦЫЯ аб парадку правядзення ў 2017 годзе
конкурсу на стварэнне куратарскай канцэпцыі
беларускага павільёна на 57-м Венецыянскім
біенале сучаснага мастацтва
1. Дадзеная інструкцыя вызначае парадак арганізацыі і правядзення конкурсу на стварэнне куратарскай канцэпцыі беларускага павільёна на 57-м Венецыянскім біенале сучаснага мастацтва (далей — конкурс).
2. Мэтай конкурсу з’яўляецца выяўленне неабходных арганізацыйных мерапрыемстваў па падрыхтоўцы і правядзенні выстаўкі для прадстаўлення на высокім канцэптуальным узроўні беларускага павільёна на 57-м Венецыянскім біенале сучаснага мастацтва, які пройдзе ў г.Венецыя (Італія) і ўдзел у якім плануе прыняць Рэспубліка Беларусь.
3. Арганізатарамі конкурсу з’яўляюцца Міністэрства культуры Рэспублікі Беларусь (далей — Міністэрства) і дзяржаўная ўстанова культуры змешанага тыпу “Нацыянальны цэнтр сучасных мастацтваў Рэспублікі Беларусь” (далей — Цэнтр).
4. Конкурс праводзіцца з 5 студзеня па 7 лютага 2017 года.
5. Удзельнікамі конкурсу могуць быць мастацтвазнаўцы, мастакі і іншыя фізічныя асобы, якія маюць вопыт арганізацыі і правядзення буйных культурных праектаў у галіне выставачнай дзейнасці (далей — удзельнікі конкурсу).
6. Інфармацыя аб правядзенні конкурсу размяшчаецца на афіцыйных сайтах Міністэрства і Цэнтра, змяшчае звесткі аб конкурсе, яго ўмовах, крытэрыях і парадку ацэнкі прадстаўленых удзельнікамі конкурсу матэрыялаў, парадку і тэрміне аб’яўлення вынікаў конкурсу, а таксама іншыя неабходныя звесткі.
7. Для ўдзелу ў конкурсе яго ўдзельнікі накіроўваюць канцэпцыю ў Цэнтр па адрасе: г.Мінск, вул.Някрасава, 3, з паметкай “Конкурс на стварэнне куратарскай канцэпцыі беларускага павільёна на 57-м Венецыянскім біенале”.
Канцэпцыі прымаюцца да 31 студзеня 2017 года ўключна. Канцэпцыі, прадстаўленыя на конкурс пазней прызначанага тэрміну, да ўдзелу ў конкурсе не дапускаюцца. Дата прадстаўлення матэрыялаў, якія дасылаюцца па пошце, вызначаецца па паштовым штэмпелі адпраўшчыка.
8. Канцэпцыя павінна ўлічваць:
дэвіз і тэму 57-га Венецыянскага біенале — “Viva arte viva” (Жыве жывое мастацтва)*;
адлюстраванне новых арыгінальных ідэй сучаснага мастацтва ў Беларусі, а таксама распаўсюджванне інфармацыі аб сучасным беларускім мастацтве за мяжой;
прадстаўленне беларускага павільёна на 57-м Венецыянскім біенале — на высокім канцэптуальным узроўні;
выкарыстанне сучасных мультымедыя-тэхналогій;
указанне аўтараў, іх твораў, выкарыстоўваемых мультымедыйных сродкаў;
абгрунтаванне кошту рэалізацыі канцэпцыі;
тэрмін правядзення 57-га Венецыянскага біенале — з 13 мая па 26 лістапада 2017 года.
Канцэпцыя прадстаўляецца на беларускай або рускай мове ў двух друкаваных экзэмплярах і версіі на электронным носьбіце ў запячатаным канверце.
9. У мэтах захавання ананімнасці ўдзельнікаў конкурсу куратарская канцэпцыя прадстаўляецца пад чатырохзначным нумарам, які ўказваецца ў левым верхнім вугле канцэпцыі, а таксама на канверце ўдзельнікаў конкурсу.
Канверт удзельнікаў конкурсу ўяўляе з сябе асобны запячатаны канверт, у які ўкладваецца інфармацыйны ліст са звесткамі пра ўдзельніка конкурсу: прозвішча, імя, імя па бацьку (калі такое маецца), год нараджэння, адукацыя, месца працы, хатні адрас, кантактны тэлефон, адрас электроннай пошты, вопыт арганізацыі і правядзення буйных культурных праектаў у галіне выставачнай дзейнасці.
10. Прадстаўленне канцэпцыі і канверта ўдзельнікаў конкурсу азначае згоду ўдзельнікаў конкурсу ў выніку перамогі стаць куратарам беларускага павільёна на 57-м Венецыянскім біенале.
11. Канцэпцыі не рэцэнзуюцца і не вяртаюцца ўдзельнікам конкурсу.
12. Для разгляду канцэпцый ствараецца журы конкурсу, склад якога зацвярджаецца загадам Міністэрства культуры Рэспублікі Беларусь.
13. Канцэпцыі разглядаюцца журы конкурсу на закрытым пасяджэнні не пазней 7 лютага 2017 года.
14. Рашэнне прымаецца ў прысутнасці не менш паловы складу журы конкурсу адкрытым галасаваннем простай большасцю галасоў прысутных. Пры роўнай колькасці галасоў “за” і “супраць” голас старшыні журы з’яўляецца вырашальным. Рашэнне журы конкурсу афармляецца пратаколам, які падпісваецца ўсімі членамі журы конкурсу, прыняўшымі ўдзел у галасаванні.
15. Члены журы могуць рабіць заўвагі і ўносіць свае прапановы да выбраных канцэпцый.
Праект пераможцы конкурсу павінен быць рэалізаваны з улікам заўваг і прапаноў журы конкурсу.
16. Крытэрыі ацэнкі канцэпцый:
адпаведнасць умовам конкурсу;
наяўнасць новых арыгінальных ідэй;
выкарыстанне мультымедыя-тэхналогій у працэсе арганізацыі выставы;
кошт стварэння праекта.
17. Пасля вынясення рашэння журы па выніках конкурсу канверты ўдзельнікаў конкурсу распячатваюцца і ў адпаведнасці з прынятым рашэннем журы абвяшчаецца пераможца конкурсу.
18. Вынікі конкурсу публікуюцца ў двухтыднёвы тэрмін пасля вынясення рашэння журы на афіцыйных сайтах Міністэрства і Цэнтра.
19. Пераможца конкурсу атрымлівае права стаць куратарам беларускага павільёна на 57-м Венецыянскім біенале пры ўмове заключэння адпаведнага дагавора з Цэнтрам да 15 лютага 2017 года.
У выпадку, калі журы конкурсу не вызначыць пераможцу конкурсу, Міністэрства мае права самастойна прызначыць куратара беларускага павільёна на 57-м Венецыянскім біенале.
20. Паштовыя і іншыя выдаткі ўдзельнікаў конкурсу аплачваюцца за іх кошт.
* Дадатковыя звесткі — на сайце біенале www.labiennale.org