— Прасочым за фінансавай дзейнасцю сельскага Дома культуры вёскі Іоды — філіяла Шаркаўшчынскага РЦК. Кіруе СДК Аляксандр Рамуальдавіч Пупін. Мае сярэднюю спецыяльную адукацыю, працуе ў галіне культуры больш за 30 гадоў. Работнік дасведчаны, стараны.
— Колькі грошай у лютым прасіў кіраўнік СДК у аддзела?
— Па каштарысе — 500 тысяч рублёў. Галоўным мерапрыемствам мінулага месяца была Масленка. Дырэктар установы рыхтаваў з гэтай нагоды конкурсна-гульнявую праграму, грошы яму патрэбны былі на прызы для пераможцаў святочнага конкурсу. Усе астатнія мерыпрыемствы (танцавальныя вечары, канцэрты, да прыкладу), што ладзіліся ў Іодах цягам лютага, грашовых укладанняў з боку аддзела не патрабавалі. Звыклая справа: калектыў клуба ў большасці выпадкаў працуе за кошт унутраных творчых рэзерваў.
— І якая выручка ад Масленкі ў Іодах?
— 3 мільёны 600 тысяч рублёў. А ўсяго за люты — 4 мільёны 580 тысяч. Прыкладна столькі ж зарабляюць штомесяц на паслугах і ў іншых СДК Шаркаўшчынскага раёна.
— Някепска для СДК. Відаць, з выкананнем плана па пазабюджэтцы ў Іодах — ніякіх праблем?
— Так. Леташні план па аказанні платных паслуг — 6 мільёнаў 500 тысяч рублёў. А факт склаў 6 мільёнаў 747 тысяч. Дарэчы, нядаўна ў Шаркаўшчыне ладзіўся выніковы сход, што падвёў вынік мінуламу году. Лепшыя работнікі культуры атрымалі прэміі з імі ж заробленай пазабюджэткі. Натуральна, улічваліся якасць мерапрыемстваў, ініцыятыўнасць і стараннасць кіраўніка.
— Давайце ж паглядзім, з чаго канкрэтна складалася лютаўская заработная плата дырэктара такога ж, як Іодаўскі, СДК?
— З акладу (2 мільёны 490 тысяч рублёў), з месячнай прэміі (прыкладна, 498 тысяч), з матэрыяльнай дапамогі (124 тысячы з невялікім), з надбаўкі за складанасць і напружанасць працы (350 тысяч). Вынік — недзе 3 мільёны 463 тысячы рублёў. Ды плюс дыферэнцаваная прэмія за леташнія паказчыкі.