Гэтаксама вернісаж і перфоманс шведскіх творцаў пройдуць і ў Мінску — 19 студзеня ў Музеі сучаснага выяўленчага мастацтва. Там жа шведскі мастак і пісьменнік беларускага паходжання Дзмітрый Плакс 20 студзеня правядзе семінар “Прынцып няпэўнасці і мастацтва інсталяцыі”. “Для ўсіх, каго цікавяць “прыгоды аб’екта ў фізічнай і віртуальнай прасторы”, — так вызначае адрасата сустрэчы творца. “Што здараецца з аб’ектамі, калі мы паварочваемся да іх спінай, або што адбываецца ў камп’ютэрнай гульні пасля таго, як мы адыходзім ад машыны...”, — пашукаць адказы на гэтыя філасофскія пытанні прапануе публіцы аўтар.
Акрамя мастацкіх праектаў, сёлета вялікая ўвага ў праграме супрацоўніцтва надаецца і музычным кантактам. 20 студзеня ў клубе “Стэп” пройдзе сумесны канцэрт беларускага гурта “Drum Ecstasy” і аднаго з самых вядомых у свеце шведскіх кампазітараў сучаснай музыкі і выканаўцаў фрыджаза Дрора Файлера. Там жа неўтаймоўны Дзмітрый Плакс дасць музычна-тэкставы перфоманс “Спёка”. Працягнецца музычны дыялог культур у сакавіку — удзелам шведскага “Флэш-квартэта” ў беларускім фестывалі джазавай музыкі. А 6 лютага вядомая выстаўка шведскай графікі “Праз традыцыі ў будучыню”, якая экспанавалася два месяцы таму ў Мінску, адкрыецца ў Музеі Марка Шагала ў Віцебску.
Такім чынам, усе , хто яшчэ не пабачыў выбітныя творы шведскіх графікаў (якія, дарэчы, выклікалі вялікае захапленне славенскай публікі), могуць паглядзець іх да 25 лютага, наведаўшы Віцебск.
Дар’я АМЯЛЬКОВІЧ