Можна было азнаёміцца з выданнямі па гісторыі кінамастацтва Беларусі, з кнігамі, якія распавядаюць пра жыццёвы і творчы лёс нашага кінарэжысёра, акцёра і прадзюсара Міхаіла Пташука, пра творчыя біяграфіі вядомага беларускага акцёра Мікалая Яроменкі і мэтра нацыянальнай кінадакументалістыкі Віктара Дашука. Пацікавіцца рэйтынгам мастацкіх, дакументальных, анімацыйных фільмаў айчыннай кінастудыі далі магчымасць старонкі рэспубліканскага часопіса “Мастацтва” (№ 7 за 2014 г.). Прыцягваў увагу раздзел выстаўкі пад назвай “З кніжных старонак — на вялікі экран”, які прапанаваў наведвальнікам азнаёміцца з творамі беларускіх пісьменнікаў (“Вазьму твой боль” Івана Шамякіна, “Чорны замак Альшанскі”, “Дзікае паляванне караля Стаха” Уладзіміра Караткевіча, “Знак бяды”, “Сотнікаў” Васіля Быкава ды іншымі), якія былі ў свой час экранізаваны. Не абмінулі ўвагай арганізатары і самых юных гледачоў. Беларускую мультпанараму прадстаўляў раздзел “Дзіцячы кінасеанс”, дзе сабраны матэрыял пра майстроў айчыннай мультыплікацыі.
Дапаўнялі кніжную экспазіцыю цікавыя кінапрадметы: кінаафішы з аўтарскімі надпісамі, наборы віншавальных паштовак з кадрамі з розных мастацкіх кінастужак, спецыяльныя прыстасаванні і тэхніка для дэманстрацыі фільмаў. Дадамо, што выстаўка працягвае работу ў залах бібліятэкі.
Раіса ЗІНЧУК, бібліятэкар Пружанскай ЦРБ