Сенненская зямля пабачыла спектаклі 14 аматарскіх лялечных тэатраў вобласці, дэманстраваліся выстаўкі дзіцячых лялек і малюнкаў. Героі спектакляў “Дзюймовачка”, “Ямелева шчасце”, “Лялькі онлайн”, “Церамок на новы лад” ды іншых запрасілі дзяцей і падлеткаў стаць сведкамі казачных дзей. Цікавасць выклікала і батлейка.
Па выніках свята-конкурсу Гран-пры атрымаў народны тэатр лялек “Капялюш” Цэнтра рамёстваў і традыцыйнай культуры з Наваполацка. У намінацыі “Лялечны спектакль” І месца падзялілі народны лялечны тэатр “Вытворяшки” з Паставаў і ўзорны лялечны калектыў “Дзіковінка” з Глыбокага. У намінацыі “Традыцыйны беларускі тэатр батлейка” І месца заняў тэатр “Батлейка” з Браслава. А вось Прыз глядацкіх сімпатый застаўся ў гаспадароў — народнага лялечнага тэатра кнігі “Пятрушка”.
У рамках свята адбыўся Абласны конкурс гульнёвых праграм для дзяцей “Гульнёвая вясёлка”, у якім за званне лаўрэата спаборнічалі восем калектываў Віцебшчыны. Па выніках конкурсу перамогу падзялілі творчы калектыў працаўнікоў Браслаўскага РДК і народны гурт тэатралізаванай гульні “Залюстэрачча” з Наваполацка.
У рамках свята прайшла дабрачынная акцыя “Лялечны свет” — дзецям”, у якой узялі ўдзел усе творчыя калектывы, што завіталі на Сенненшчыну, пакінуўшы падарункі для дзяцей са шматдзетных і малазабяспечаных сем’яў, дзіцячага дома і Цэнтра карэкцыйнага развіцця.
Андрэй СТРУНЧАНКА, вядучы метадыст Віцебскага АМЦНТ