У прывітальнай прамове Прэзідэнт павіншаваў усіх прысутных з Новым годам і Ражджаством Хрыстовым - самымі светлымі, сардэчнымі святамі. Ён нагадаў пра вечныя чалавечыя каштоўнасці - Веру, Надзею, Любоў, пра тое, што міласэрнасць, уменне суперажываць, прыходзіць на дапамогу заўсёды былі лепшымі якасцямі беларускага народа, а Праваслаўная Царкваяго духоўным апірышчам. І невыпадкова ў пярэдадзень Ражджаства мы ўшаноўваем тых, хто сее ў сэрцах разумнае, добрае, вечнае.
А.Лукашэнка адзначыў, што мінулы год быў плённым для культуры, прыгадаўшы ўведзеныя ў дзеянне буйныя культурныя аб'екты- Нацыянальную бібліятэку Беларусі, новы будынак Нацыянальнага мастацкага музея, а таксама рэспубліканскую творчую акцыю "За моцную і квітнеючую Беларусь", дзе ярка выявіліся сапраўдныя таленты.
- Дзякуй усім за творчую працу і шчырае лужэнне беларускаму народу. Жадаю вам новых твораў, якія праславяць Беларусь, поспехаў, шчасця і добрага настрою, - сказаў Прэзідэнт.
Са словамі ўдзячнасці ад імя лаўрэатаў выступіла паэтка і журналістка Валянціна Паліканіна: - Настолькі высокая ацэнка нашай працы - гэта сведчанне павагі, чулага стаўлення да дзеячаў культуры, прызнанне унікальнасці нашай творчай работы.
Імёны 7 лаўрэатаў прэміі "За духоўнае адраджэнне" і 21 лаўрэата спецыяльных прэмій Прэзідэнта РБ гучалі са сцэны пад апладысменты залы. Сёлета да гэтых двух ганаровых спісаў дадаўся яшчэ адзін. Ганаровае званне "Заслужаны дзеяч культуры Рэспублікі Беларусь"і гранд-прэмія былі прысуджаны мастацкаму кіраўніку Нацыянальнага цэнтра музыкальнага мастацтва імя У.Мулявіна Беларускага дзяржаўнага ансамбля "Песняры" Святлане Стацэнка, прэміі спецыяльнага фонду Прэзідэнта РБ па падтрымцы таленавітай моладзі - лаўрэату дзіцячага конкурсу песні "Еўрабачанне - 2006", вучню СШ № 7 г.Мазыра Андрэю Кунцу і ўдзельніцам "Еўрабачання - 2006": вучаніцы СШ № 7 г.Мазыра Паўліне Касцян, вучаніцы СШ № 9 г.Мазыра Насці Сямко, вучаніцы СШ №15 г.Мазыра Ксені Субоцінай і вучаніцы гімназіі імя Я.Купалы (г.Мазыр) Насці Суславай.
Мне асабліва прыемна, - сказаў Аляксандр Лукашэнка, - уручыць заслужаныя знагароды зорнай камандзе дзіцячага "Еўрабачання".
Па заканчэнні цырымоніі ўзнагароджання да Прэзідэнта, лаўрэатаў і ўсіх прысутных звярнуўся Уладыка Філарэт. Ён пацвердзіў, што творчыя дары лаўрэатаў сваёй краіне складуць і багаты ўнёсак у скарбніцу айчыннай культуры, і яркую старонку ў летапісе Беларусі. Яны адлюстроўваюць галоўныя духоўныя каштоўнасці нашага грамадства.
— Перад яднаннем у Хрысце супярэчнасці адступаюць, і на чале ўсяго застаюцца праўда і міласэрнасць. Няхай новы год будзе часам дабраславенных поспехаў і светлай надзеі для нашай краіны, — пажадаў Мітрапаліт Філарэт.
С.І.
Фота Мікалая ПЯТРОВА, БелТА