Як знайсці ваду?
Ухіл мясцовасці, з’яўленне папаратнікаў, балотных раслін, збег сцежак, пратаптаных жывёламі, могуць паказаць дарогу да вады. Дажджавая вільгаць захоўваецца ў сагнутых грыбных шапачках. Дапаможа справіцца са смагай ранішняя раса. Абеззаразіць ваду дапаможа бляшанка з-пад кансерваў. Трэба прабіць у дне мноства адтулін, пакласці на адну траціну дрэўнага вугалю, два-тры слаі марлі з аптэчкі — і фільтр гатовы. Ваду можна пракіпяціць, а для абеззаражвання выкарыстаць ёд (дзве кроплі на кубак) ці марганцоўку з аптэчкі (вада павінна стаць светла-ружовай).
Як спатоліць голад?
Пра ядомыя грыбы ды ягады ведаюць усе. Дапамогуць і лясныя арэхі. Сасна прапаноўвае “да стала” маладыя пупышкі. Адвар з хвоі дапамагае нават ад цынгі. Найбольш спажыўным лічыцца лыка ад бярозы, клёна, таполі… З жалудоў, зварыўшы іх і падсмажыўшы, вырабляюць муку для прыгатавання кашы ці аладак. Крапіва — цудоўная сыравіна для салатаў.
Як разысціся з жывёламі і змеямі?
Самае галоўнае: не палохайцеся пры сустрэчы з імі. Нават драпежнікі, як правіла, нападаюць на чалавека, калі параненыя альбо ахоўваюць сваё патомства. Таму не рухайцеся, не адводзьце вачэй і не нападайце самі — дайце магчымасць жывёліне сысці. Калі ж яна агрэсіўная, выкарыстоўвайце агонь, крычыце, стукайце палкай па дрэве. Нельга паварочвацца спінай і збягаць. У крайнім выпадку, павольна адступайце да бліжэйшага дрэва.
Змеі любяць грэцца на сонцы. Але нюх і зрок у іх — кепскія. Таму будзьце ўважлівыя пры хуткай хадзьбе: змеі могуць не паспець уцекчы ад вас… Перад атакай змяя скручваецца ў клубок, а потым выкідвае цела на 30-40 сантыметраў. Не забывайцеся, што высокі і трывалы абутак — выратаванне ад ядавітых змей.
Таццяна БЫЧАНОК, спецыяліст групы прапаганды і навучання Савецкага РАНС Мінска