Паводле самавызначэння гэта «актыўная арт-пляцоўка для прэзентацыі актуальнага беларускага і сусветнага мастацтва». Яе адкрыццё адбылося ў 2009-м, і за кароткі тэрмін «Ў» стала не толькі галоўнай выставачнай прасторай у сектары недзяржаўных інстытуцый мастацтва, але і месцам эксперыментаў, сустрэч і дыскусій. Яна ўтрымлівае складаны баланс паміж камерцыйнай галерэяй і цэнтрам сучаснага мастацтва, а ў сваёй перспектыве імкнецца стаць менавіта паўнавартасным другім. Аналагаў і істотнай канкурэнцыі ў Мінску ў яе пакуль няма.
Сучаснае мастацтва ў кантэксце інстытуцыі. Беларускі кейс
Відавочна, што арт-інстытуцыя з’яўляецца не толькі асновай працы сістэмы сучаснага мастацтва, але і ўмовай яе існавання. Дзяржаўныя музеі, прыватныя галерэі, цэнтры сучаснага мастацтва забяспечваюць працэс узаемадачыненняў мастацтва з аўдыторыяй, ствараюць магчымасць такіх інтэракцый. Акрамя таго, інстытуцыі забяспечваюць як уласна развіццё сучаснага арту, так і фармулююць, фармуюць, фіксуюць спосабы яго камунікацыі, у тым ліку мову. Што можна сказаць пра інстытуцыянальны ландшафт Мінска? Ці змяніўся ён? Якія ініцыятывы гэтаму спрыялі?
— Ты згадала праект «Радыус нуля». Калі Руслан Вашкевіч прыйшоў з ім у галерэю, мы прынялі тады рашэнне, і мне яно здаецца і цяпер вельмі правільным, — адхіліцца ад куратарства. У тым сэнсе, што нам была важная праява ініцыятывы прадстаўнікамі арт-супольнасці.
Тым не менш галерэя стала той пляцоўкай, на якой адбыўся шэраг сустрэч і дыскусій, што адзначылі старт даследчай дзейнасці праекта «Радыус нуля». Акрамя таго, тады выявіліся фактычныя сувязі і стасункі ўнутры арт-поля, агенты якога аддавалі перавагу розным трактоўкам сучаснага беларускага мастацтва, у тым ліку і мове яго інтэрпрэтацый.
— Так. Пляцоўка галерэі была такой і такой жа з’яўляецца і сёння. Нягледзячы на тое, што галерэя зарэгістраваная як камерцыйная арганізацыя і прыватныя асобы стаяць у аснове яе стварэння. Тым не менш мы нацэленыя на тое, каб быць пляцоўкай узаемадзеяння агентаў беларускага арт-поля. Мы заўсёды падтрымлівалі і падтрымліваем важныя ініцыятывы мастацкага асяроддзя. Так, адгукнуўшыся на ідэю таго ж Руслана Вашкевіча правесці «Беларускі павільён 53 Венецыянскага біенале ў Мінску» (3—6 чэрвеня 2009, «Белэкспа»), галерэя ўдзельнічала ў пошуку куратара, арганізацыі выставы і суправаджальных мерапрыемстваў, дзялілася працоўнымі кантактамі, рэсурсамі і г.д. Праект «Радыус нуля» на заводзе «Гарызонт», акрамя сваёй асноўнай задачы, фактычна задаў новы модны тон, калі частка супольнасці ўсвядоміла, што можна выкарыстоўваць альтэрнатыўныя прасторы, а не толькі класічныя выставачныя.
Хто сёння змог бы ўзяць на сябе ініцыятыву і адказнасць ацаніць, паглядзець і асэнсаваць 2010-я? Сапраўды, вельмі важна ўсведамляць тое, што адбылося за 10 гадоў. Такое разуменне павінна быць патрэбай саміх актараў арт-поля. Мы гатовыя стаць партнёрамі такога праекта, але крута, калі гэты запыт будзе сфармуляваны самім асяроддзем. Тым больш ёсць новыя гульцы і ў інстытуцыянальным полі. Мне здаецца, калі толькі мы як інстытуцыя будзем ініцыяваць такія працэсы, то могуць узнікаць абвінавачванні ў неаб’ектыўнасці.
Зразумела, такія даследчыя і аналітычныя праекты, якія падводзяць нейкія вынікі, вельмі патрэбныя. Але што значыць падвесці вынікі? Напэўна, гэта таксама ўвесці, вынайсці або запазычыць мову для такога аналізу, паспрабаваць зрабіць яе калі не ўніверсальнай, дык прынамсі агульнай і актуальнай для ўсіх удзельнікаў арт-працэсу?
— Я б паставіла пытанне пра тое, ці камунікуем мы наогул? Цяпер не магу ўспомніць яркіх дыскусій апошняга часу, хіба толькі ў сацыяльных сетках. На мой погляд, яны павінны быць пастаяннымі. Сёння складваецца ўражанне хаатычнасці, разавасці, непаслядоўнасці ў выбудоўванні і ўкараненні новых дыскурсаў. Зноў узнікае пытанне адказнасці за ідэнтыфікацыю такіх актыўнасцей. Зноў жа, я мяркую, гэта мусіць быць патрэба прафесіяналаў, а не толькі задача інстытуцыі, існаванне якой ва ўмовах Беларусі хутчэй неверагодная з’ява і ўнікальная магчымасць для прафесійнага развіцця ўдзельнікаў культурнага працэсу.
Ты кажаш фактычна пра рэжым выжывання сёння, актуальны практычна для ўсіх гульцоў у гэтым полі?
— Так. Напрыклад, за гэтыя 10 гадоў дзве вельмі моцныя інстытуцыі былі адкрытыя, разгарнулі сваю дзейнасць, але вымушаныя былі яе спыніць: «ЦЭХ» і галерэя «Сталоўка XYZ». У Беларусі даволі агрэсіўнае асяроддзе выжывання, з розных прычын, у тым ліку — з-за фінансавага складніка.
Тады атрымліваецца, што такія ініцыятывы-інстытуцыі могуць існаваць часцяком у фармаце тэмпаральных, часовых праектаў. Бо чаму на арт-інстытуцыю ўскладаецца столькі надзей і адказнасцей? Яна, валодаючы нейкімі рэсурсамі, здольная выконваць свае функцыі: весці выставачную дзейнасць, падтрымліваць міжнародныя камунікацыі, развіваць лакальнае ўзаемадзеянне, працаваць з рознымі аўдыторыямі і, вядома, адсочваць, фармаваць, вывучаць архівы, акумуляваць веды і многае іншае. Аднак калі інстытуцыі, у тым ліку названыя табой, існуюць у кароткатэрміновым фармаце, тады шэраг функцый проста неажыццяўляльны.
— На сённяшні момант у Мінску працуе не так шмат прастораў: галерэя «Ў», «Ок16», «Корпус», Палац мастацтва...
Заўважу, што ўсе пералічаныя — гэта прыватныя, недзяржаўныя пляцоўкі. Важна таксама разумець: аналізаваць і ацэньваць можна дзейнасць ініцыятыў, якія разгортваюцца ў часе і даюць стабільныя вынікі, тое, што ўбудоўваецца ў тэндэнцыі. Якія напрамкі былі ахопленыя галерэяй у гэтыя 10 гадоў і ці можна казаць пра запуск пэўных працэсаў?
— Гэта былі вельмі розныя праграмы: куратарская адукацыйная платформа, праграма па арт-менеджменце, дзіцячыя творчыя майстэрні. Некаторыя з іх рэалізоўваліся на пастаяннай аснове. Цяпер можна назіраць невялікае зніжэнне актыўнасцей, звязанае з пераездам. На дадзены момант мы рыхтуем запуск новых і перазагрузку паспяховых напрамкаў, у тым ліку серыю адукацыйных праграм у галіне сучаснага мастацтва для шырокай аўдыторыі.
Беларускае сучаснае мастацтва: моўныя сістэмы інтэрпрэтацый
Давай пагаворым пра вынікі дзесяцігоддзя праз перспектыву даследчыкаў і экспертнай супольнасці — знешняй, унутранай (тут пытанне «першаснасці», арыгінальнасці і паслядоўнасці меркаванняў і адкрытасці прафесійных супольнасцяў), — якія фармуюць мову беларускага сучаснага мастацтва. Бо, пагадзіся, сучаснае мастацтва не існуе па-за артыкуляцыйнымі палямі, іншымі словамі — па-за моўнымі сістэмамі інтэрпрэтацыі. Якая мова, рыторыка гаварэння пра беларускае мастацтва? Хто і як ставіць праблемы, зноў жа, якой мовай карыстаецца? Якія самі наратывы і фармат выказванняў? Ці ўбудоўвае крытыка сучаснае мастацтва ў культурнае поле? Хто інвестуе ў крытыкаў: мастак, інстытуцыя або ўвогуле ніхто?
— Мастакі, крытыкі, інстытуцыі ў нас інвестуюць адно ў аднаго і самі ў сябе, і гэта замкнёнае кола! Што да мінулага дзесяцігоддзя, спрабуючы вызначыць ключавыя кропкі, важна пазначыць платформу Art Aktivist, якую ініцыяваў Сяргей Шабохін (мастак і куратар) і падтрымаў Сяргей Кірушчанка (мастак і куратар). Праект стартаваў вельмі крута, і здавалася, што вось яна, пляцоўка, дзе выпрацоўваецца гэтая мова даследчыкамі і экспертнай супольнасцю.
Ты кажаш пра спробу стварэння ўстойлівай пляцоўкі з магчымасцю адэкватнай сучаснай аналітыкі на пастаяннай аснове?
— Так, але праект быў спынены. Бо без сталага фінансавання ініцыятыва згасае і перарываецца. Праблема ў тым, што няма пастаяннага працэсу, увесь час узнікаюць прыпынкі. Амаль адначасова пачалася праца над праектам «KALEKTAR» — першая спроба зрабіць ацэнку вялізнага часавага адрэзка ў 40 гадоў. Гэта таксама была прыватная ініцыятыва. Так, можна казаць, што за гэтае дзесяцігоддзе ўзнікла новая платформа аналізу і архівавання беларускага сучаснага мастацтва, яго крытычнае асэнсаванне. У 2015-м даследчая платформа «KALEKTAR» запусціла два рэсурсы: энцыклапедыю беларускага мастацтва «INDEX» і збор эсэ пра мастацкія выказванні ў беларускім сучасным мастацтве «ZBOR», а ў 2018-м адбылася выстаўка «ZBOR Іn Progress». Платформа створаная, але працуе яна ў запаволеным рэжыме і з вялікімі прыпынкамі. Гэта зноў рэсурснасць: людзі, час, грошы... Займацца такога роду праектам вельмі складана. Аднак за дзесяцігоддзе гэта крок, вяха, як мінімум старт.
Ці не здаецца табе, што ў кантэксце праекта «ZBOR Іn Progress» была спроба адрэфлексаваць апошнія 30-40 гадоў беларускага арту праз разметку і абазначэнне важных падзей: выстаў, даследаванняў, аж да канкрэтных твораў асобных мастакоў, якія паўплывалі, на думку экспертаў, на агульную карціну беларускага мастацтва гэтага перыяду?
— Менавіта так. Вызначылі і зафіксавалі пэўныя найважнейшыя кропкі. Але, зноў жа, неабходна рабіць тлумачэнне, што гэта праца не з’яўляецца паўнавартасным зрэзам, гэта ўсё ж фрагмент агульнай карціны. Пазіцыя арганізатараў праекта адкрытая, яны заклікаюць да любых прапаноў, каментароў ды іншых трактовак.
Чаму такога кшталту прапаноў не было? Гэта праблема асяроддзя, яго фрагментаванасці? Альбо адсутнасці нейкіх устояных унутры арт-супольнасці сувязяў, узаемаадносін? А можа, незразумелы заклік?
— «ZBOR» узнік як адказ на патрэбу пэўнай колькасці людзей у пошуку кропак апоры, адштурхнуўшыся ад якіх можна было б ісці далей. Чаму праект не папаўняецца іншымі гісторыямі, пунктамі гледжання? Я нават не ведаю, каму задаваць гэтае пытанне.
Добра. Тады ці можам мы казаць, што ў дадзеным праекце адбылася яшчэ адна спроба афармлення той мовы, якая заклікана адрэфлексаваць і артыкуляваць апошнія 30-40 гадоў беларускага мастацтва, а таксама ўбудоўваць само сучаснае мастацтва ў поліфанічнае культурнае поле? Прымаючы пад увагу, што такія спробы ўжо былі і мы казалі ў пачатку размовы, напрыклад, пра маштабны праект «Радыус нуля. Анталогія арт-нулявых». На што яшчэ можна абаперціся?
— Архівы галерэі «Шостая лінія». Магчыма, я кепска інфармаваная, але яны ў большай ступені візуальныя, сканцэнтраваныя хутчэй на фотадакументацыі, чым на рэфлексіі. Тым не менш у кантэксце праекта «ZBOR» акурат і адбылася спроба пачаць размову і зафіксаваць тое, што мы памятаем, з далучэннем спецыялістаў, якія змаглі многія падзеі артыкуляваць.
Тактыкі і стратэгіі
Вернемся ў ключавыя праекты дзесяцігоддзя, якія калі не змянілі, дык сталі знакамі неабходнасці змен у беларускім мастацтве, — гэта анлайн-платформа «Art Aktivist». Ты зазначыла: на сённяшні дзень праект больш не развіваецца. Ці не думаеш ты, што, азнаменаваўшы сабой гэты жаданы зрух парадыгмаў, пераход з «партызанскіх практык» да «актыўнай стратэгіі», гэты праект таксама засведчыў негатоўнасць беларускага мастацтва, а таксама яго агентаў да такіх перамен? Іншымі словамі, у нейкі момант усе вымушаны былі адправіцца на пошук і вынаходніцтва іншых маршрутаў, больш мудрагелістых і складаных?
— Так, магчыма. У пэўным сэнсе, працягваючы ідэю арт-актывізму, працуе праект, які развіваюць Воля Сасноўская, Аляксей Барысёнак, Дзіна Жук і Мікалай Спясіўцаў «Працуй Больш! Адпачывай Больш!». Гэта вельмі крутая новая сучасная структура, што, аднак, не працуе на шырокую публіку. Гэта, калі можна так сказаць, прафесійная міжнародная тусоўка мастакоў, куратараў, крытыкаў, якая развіваецца, выкарыстоўваючы новыя формы камунікацыі і прэзентацыі. Значыць, сёння такога роду фарматы запатрабаваныя, такія дынамічныя платформы, дзе людзі сустракаюцца, знаёмяцца, адукоўваюцца, нешта вырабляюць сумесна. І калі ты не ўдзельнік гэтага працэсу, то ты практычна нічога не можаш пра гэта ведаць.
Калі ты не ў патоку, не частка падзеі ці тусоўкі, то яна для цябе нябачная?
— Напэўна, яна, гэтая ініцыятыва, і не можа існаваць у іншым фармаце.
Магчыма, у больш маштабным і адкрытым фармаце арт-актывізм пакуль тут нежыццяздольны?
— Як ні дзіўна, праект «Працуй Больш! Адпачывай Больш!» нагадвае мне «Беларускі клімат», які таксама асвойваў розныя культурныя прасторы. Дзейнасць «Працуй Больш! Адпачывай Больш!» адпавядае нейкаму агульнаму настрою сёння. А «Беларускі клімат» можна, у дадзеным выпадку, называць арт-актывістамі свайго часу.
Адзначу, што якраз «Беларускі клімат», іх акцыі і публічныя інтэрвенцыі фармавалі новы тып узаемадзеяння з публікай, гледачом як з часткай гарадскога асяроддзя. І гэта ў часы канца 1980-х. У пачатку ж 10-х ужо нашага, ХХІ стагоддзя праект Сяргея Шабохіна «Art Aktivist» быў спробай вывесці гэтае ўзаемадзеянне на якасна іншы ўзровень публічнасці. Паказаць, што ёсць магчымасць і перспектывы новых сувязяў з іншымі аўдыторыямі, або іх сфармаваць. Таму і змена партызанства на арт-актывізм, хутчэй за ўсё, праект не да канца ўдалы, у выніку гэта стала стратэгіяй асобных тусовак, а не ўніверсальнай гісторыяй. У якім выпадку ў гэты працэс уступае інстытуцыя і ці ўступае наогул?
— Арт-інстытуцыя павінна ініцыяваць многія рэчы, падтрымліваць іх і развіваць, але ў рэальнасці ведаю, як гэта неверагодна складана ў беларускай сітуацыі. Аднак фактычна праз арганізацыю адукацыйных праграм, метадычна, шчыльна і паслядоўна мы якраз гэтым і займаемся.
Такім чынам, ці атрымліваецца больш актыўна інвеставаць у гэтае поле? Акрамя таго, разумець яго патэнцыял, моцныя і слабыя бакі.
— У Артура Клінава быў такі прыгожы і наглядны вобраз, як вымыванне культурнага пласта ў Беларусі: толькі ён назапашваецца — адбываецца шэраг падзей, якія спрыяюць яго размыванню. Сёння, напрыклад, ёсць адчуванне, што назапашаны ў гэтыя 10 гадоў культурны рэсурс злёгку размываецца. Адны з’ехалі, іншыя бачаць сваю будучыню ў асобных прасторавых катэгорыях. Здаецца, мы знаходзімся ў кропцы прыліваў і адліваў. У нас мора няма, але яно неяк віртуальна прысутнічае. У першай палове дзесяцігоддзя было больш патрэбы і ініцыятыў аб’ядноўвацца ў праектах, дыскусіях, абмеркаваннях. Было пачуцце адзінага поля, дзе ўсе гатовыя да актыўных узаемадзеянняў. Аднак апошнія некалькі год я назіраю разгрупоўку, як быццам няма пункту зборкі, агульнай ідэі. І я разумею, чаму так адбываецца: атрымаўшы пэўны вопыт, сетку кантактаў, інструментар, людзі хочуць дзейнічаць і рэалізуюць свае аўтаномныя праекты. Ад ідэі аб’яднанай арт-супольнасці мы разбрыліся па сваіх уласных праектах і дзейнічаем па сваіх траекторыях. І гэта цалкам вытлумачальна і правільна. Пачакаем прыліву, калі патрэба аб’ядноўвацца зноў стане актуальнай.
Развіццё аўдыторый
У дадзеным кантэксце важна вызначыць, наколькі адчувальнае беларускае грамадства да публічнага выказвання. Ці можа сучаснае мастацтва ў гэтым выпадку стаць правадніком змен альбо выклікаць пэўны адчувальны грамадскі рэзананс? Тут ізноў важным фактарам выступае мова, але як інструмент выказвання самога мастацтва: ці стала яна больш зразумелай?
— Наша аўдыторыя вельмі шырокая, за гэтыя дзесяць гадоў яна расла і змянялася. Былі і «агрэсіўныя» гледачы, якія не разумелі, куды трапілі. Тады мы і пачалі вельмі сумленную размову з нашымі наведнікамі: адукацыйныя праграмы, дыскусійныя праекты, суправаджальныя мерапрыемствы. Да нас увесь час прыходзяць школьныя экскурсіі, шмат бывае выкладчыкаў, студэнтаў, прычым не толькі профільных творчых ВНУ, мастакоў, прадстаўнікоў бізнэсу. Я б сказала, што наша публіка адчувальная і гатовая да дыялогу. Наведнікі лёгка ўступаюць у камунікацыю. Не ведаю, як у іншых месцах, але ў нас так склалася ўжо даўно. Людзі каментуюць выставы альбо задаюць пытанні. Вельмі розны фідбэк, аднак у большасці сваёй гэта хутчэй разумнае і зацікаўленае стаўленне. У новай прасторы аўдыторыя і якасна, і колькасна пашырылася.
Ці можна казаць пра тое, што праца з гледачом, прадуманая, паслядоўная, пастаянная, прывяла да прагрэсу?
— Безумоўна. У гледача ёсць разуменне таго, што мастацтва сёння выглядае па-іншаму. Зараз мы рыхтуем цэлы комплекс адукацыйных праграм, дзе будзем зразумела расказваць і пра сучаснае мастацтва, з рознымі гістарычнымі перспектывамі. У тым ліку прапаноўваючы магчымасць для публічных дыскусій нашаму гледачу.
Выстава, як правіла, суправаджаецца нейкім тэкстам, няхай гэта будзе тлумачэнне альбо частка інсталяцыі. Ці гатовы глядач галерэі з такім тэкстам узаемадзейнічаць? І з якога часу пра гэта можна казаць?
— На самым пачатку нашай працы мы, напэўна, заўчасна паставілі досыць высокую планку, калі размяшчалі ў экспазіцыі выставы мастацтвазнаўчыя тэксты. І гэта было вельмі цяжка для публікі, якая часта не разумела гэтую мову. Цяпер мы стараемся тэкст рабіць максімальна простым — і гэта правільна, калі простай мовай табе выкладаюць сэнсавыя акцэнты. Хачу адзначыць, што гэта ў тым ліку заслуга нашых інклюзіўных праектаў.
Раскажы падрабязней пра дзейнасць у гэтым кірунку, бо інклюзіўныя праекты вы пачалі яшчэ ў нулявыя. Гэта былі выставы, праграмы, івэнты...
— Так. Некалькі праектаў праводзілі з дзецьмі з разладамі аўтыстычнага спектру, таксама з Беларускім дзіцячым хоспісам быў вялікі выставачна-адукацыйны праект. Адзначу, што на той момант у нас была вялікая праблема даступнасці прасторы для многіх груп людзей — напрыклад, з фізічнымі асаблівасцямі развіцця, — якую мы не да канца тады ўсведамлялі. Таму пры падрыхтоўцы новай прасторы галерэі акцэнтнай для нас стала арганізацыя безбар’ернага асяроддзя. Мы шмат узаемадзейнічаем з грамадскімі арганізацыямі, напрыклад, Беларускім таварыствам глухіх і Беларускай асацыяцыяй дапамогі дзецям-інвалідам і маладым інвалідам. На адным з такіх сумесных мерапрыемстваў мы пазнаёміліся з Пашам Карончыкам, у выніку ён стаў нашым супрацоўнікам — наглядчыкам экспазіцыйнай залы. Іншае звышцікавае знаёмства — гэта Кірыл Барысаў, гісторык з адукацыі. Ён наш экскурсавод, праводзіць экскурсіі па выставачных праектах галерэі з паглыбленнем у гістарычны кантэкст тэмы, пра якую ён кажа. Яго экскурсіі карыстаюцца вялікай папулярнасцю.
(Не)гістарычная перспектыва
— Калі я думаю пра Беларусь, разумею, што тут можа быць хутка і лёгка нешта знесена або разбурана. Той жа самы працэс прыкметны і ў мастацтве. Калі цэлы культурны пласт можа знікнуць і абрынуцца проста таму, што яго не паспелі зафіксаваць і захаваць альбо сышлі людзі — сведкі падзей. Вось такая зямля, на якой вельмі часта гістарычна-культурныя апоўзні адбываюцца. Магчыма, нам усім проста трэба прыняць гэта як дадзенасць і працаваць з тым, што ёсць.
Магчыма, гэта таксама звязана з гісторыяй нашай тэрыторыі, з культурай і спадчынай, якія, не паспеўшы тут укараніцца, сціраліся чарговай катастрофай. Гэта практычна пастаяннае прайграванне пытанняў ідэнтычнасці, пошук унутраных і знешніх межаў, пачынаючы з праблемы, хто я ёсць. Сёння мы становімся сведкамі абрывачных і спарадычных спроб скласці нейкія гістарычныя сувязі, убачыць мінулыя дзесяцігоддзі як ёмішча звязанага пераемнага наратыву. І няма гатоўнасці прадставіць іншы парадак рэчаў, думаць не адзінай лінейнай мадэллю, але ўбачыць у асобных, разрозненых гісторыях свае прычыны і сваю неабходнасць, якія можна параўноўваць і аналізаваць.
— Таму адзін з актуальных напрамкаў — праца з архівам. У найбліжэйшай будучыні мы чакаем запуск нашай новай пляцоўкі і новага праекта. Прастору на Ракаўскай (былы будынак хлебазавода) у планах мы пазначаем як Музей сучаснага мастацтва. Гэта будзе асобная інстытуцыя з выразнай місіяй і пэўнай структурай. Яе асновай стане архіў, ён будзе адкрыты для лакальных і міжнародных экспертаў, куратараў, крытыкаў. Пачатковай мэтай музея мы бачым збор і структураванне архіва — як базу для далейшага вывучэння, даследавання, пераасэнсавання і г.д. Уся яго дзейнасць будзе скіраваная на пошук і развіццё прафесійнай асновы. Так, на сённяшні дзень мы маем агульную канцэпцыю будучай інстытуцыі, папярэднія дамоўленасці па пляцоўцы, дзе праект будзе рэалізоўвацца. У нашых планах распрацоўка платформы музея, куды ўвойдуць напрацоўкі, пакладзеныя праектам «ZBOR». Гэта аснова, з якой можна працаваць далей.
Вольга Рыбчынская