Новая карціна аўтара ахоплівае амаль год трэніровак выхаванцаў дзіцячай спартыўнай школы па веславанні паблізу Мастоў. Фільм лёгка аднесці і да разраду спартыўнага кіно — як ніякі іншы, ён вельмі добра раскрывае падрабязнасці падрыхтоўкі маладых правінцыяльных спартсменаў. Але найперш Дзмітрый Махамет стварыў партрэт калектыву людзей, аб`яднаных адной мэтай, зняты з вельмі блізкай, зайздроснай для любога прафесіянала-дакументаліста адлегласці.
Прапануем вашай увазе аповед Дзмітрыя Махамета пра яго новы фільм, мастацкія і жыццёвыя прынцыпы.
Пра адчуванні ад працы над фільмам «Дні на вадзе»
Безумоўна, карціна і той вопыт, што застаецца з табой, калі ты праводзіш, пражываеш на здымках побач з героямі пэўны час, могуць даволі адрознівацца. Для мяне момант зносін з героямі важнейшы за сам фільм. Бо фільм — толькі нейкая частка гэтых зносін, якая можа і не зусім супадаць у поўнай меры з усім табой перажытым. Да «Дзён на вадзе» я сачыў за светам прафесійнага спорту толькі на адлегласці, і, безумоўна, для мяне ў ім усё было новае. Гэтую навізну адчуванняў можна параўнаць з пэўным эмацыйным шокам у добрым сэнсе гэтага слова — быццам як паехаць першы раз мяжу ці яшчэ нешта параўнальнае па такой моцы адчуванняў. Я быў рады пазнаёміцца і правесці час з людзьмі, якія сталі гонарам нашай краіны, пазнаёміцца з іх вучнямі, у якіх жыццё куды больш складанае, чым у звычайных школьнікаў: героям фільма даводзіцца пераадольваць больш цяжкасцей і не кожны з іх зможа вытрымаць усё, пайсці да канца. Мне было цікава, калі героі былі вымушаны пакінуць межы школы і патрапіць на спаборніцтвы. Там перад табой прыадчыняецца сапраўднaя вяслярная супольнасць са сваёй іерархіяй, нечым падобная да супольнасці мастакоў ці кінематаграфістаў, дзе ў мяне больш атрымлівалася знаходзіцца апошнія гады.
Але мяне цікавіў не толькі спорт, мне хацелася паглядзець на гэты маленькі свет больш складана, бо спорт не можа існаваць без іншых рэчаў, без усяго таго, што акружае спартсменаў і дапамагае ім дасягаць вынікаў. Калі больш канкрэтна, то я хацеў зрабіць фільм у свеце спорту і адначасова як праз свет спорту дзіця паступова адкрывае для сябе жыццё, пераадольвае цяжкасці: вучыцца сталець, вучыцца пакідаць нешта пасля сябе, вучыцца вучыцца...
Пра змены ў светаадчуванні пасля пераезду ў Францыю
Я спадзяюся, што мае погляды на жыццё, на мастацтва не змяніліся, а эвалюцыянавалі ў нейкі бок. Я веру, што, пакуль чалавек жыве, ён развіваецца, дасягае нейкага прагрэсу. Безумоўна, вучоба і праца ў Францыі скарэктавалі маё светаўспрыманне, далі магчымасць бачыць тое, што я раней не ведаў, сустрэць людзей, якія паўплывалі на мае погляды. Мне здаецца, трапіць у іншае асяроддзе, не толькі культурнае, але і сацыяльнае, вельмі карысна. Кардынальна змянілася толькі тое, што я пачаў рабіць фільмы, а раней займаўся жывапісам, але гэта так супала па абставінах і, магчыма, не здарылася б у Беларусі.
Пра межы нацыянальнага ў глабалізаваным свеце
Калі казаць пра кіно, з аднаго боку, як гледачу мне вельмі цікава бачыць фільмы, якія маюць дух іншай краіны, тое, што мы не ведаем і што адносіцца толькі да нейкага ўнікальнага месца, што праяўляцца толькі там. І гэта заварожвае. З іншага боку, цяпер усё змешваецца, часам губляе межы. Калі ўзяць карціны карэйца Хон Сан Су, то ў іх прысутнічае шмат чаго з еўрапейскай культуры, але мне ў іх больш цікава не нацыянальная прыналежнасць, а менавіта ў першую чаргу індывідуальнасць аўтара і яго асабісты свет. Іх я хачу адчуць і гэта мяне прыцягвае больш за астатняе. Мы не можам сказаць дакладна, з якой краіны фільмы Жана-Мары Штроба і Даніэль Юйэ, з Францыі, Італіі ці Нямеччыны, але па першых кадрах мы можам пазнаць іх аўтараў.
Уплывовыя творы ды імёны ў мастацтве
Калі я пачаў здымаць фільмы, то ў мяне не было вопыту і арыенцірам сталі карціны Шанталь Акерман. Яна была маёй настаўніцай таксама і ў школе, але паступова ад гэтага ўплыву я спрабаваў адыходзіць. Свой першы фільм я рабіў, натхняючыся жывапісам Жана-Франсуа Міле. Арыенціры заўсёды існавалі, аднак і змяняліся. Апошнім часам я заўважыў, што не думаю пра нейкія ўзоры, калі гэта адносіцца да кіно. Але цяпер праз амаль два дзесяцігоддзі перапынку я зноў пачаў займацца жывапісам і мне спатрэбіліся новыя арыенціры. Звяртаюся да сучаснага фламaндскага жывапісу, да такіх аўтараў, як Міхаэль Борэманс, або да Ціма Эйтэля з постлейпцыгскай школы, які сам зазнаў уплыў Эдварда Хопера.
Якую краіну на дадзены момант можна назваць сваёй?
Для мяне не існуе праблемы выбару. Мне дарагія дзве краіны — і Беларусь, і Францыя, месцы, дзе знаходжуся. Магчыма, я б прыняў і іншыя месцы, каб пражыў бы ў іх доўгі час і каб мяне з імі нешта звязвала. Але я пра гэта не думаю, я бачу, што цяпер мы маем магчымасць перамясціцца з адной кропкі ў другую даволі хутка. Мне падабаецца жыць і там, і там, і для мяне ўсё ўвасабляецца ў адну тэрыторыю. Мне здаецца, прыцягальнасць нейкага месца фармуецца не толькі фактам свайго ў ім нараджэння, але ўсім тваім далейшым жыццём.
Пра ўплыў беларускай дакументалістыкі і яе спецыфічныя рысы
Я добра не ведаю беларускае дакументальнае кіно, толькі некаторы час назад з’явілася магчымасць яго глядзець, бо, мне здаецца, пра беларускае кіно сталі больш гаварыць і больш яго паказваць. Калі з’язджаў з Беларусі, не думаў, што буду ім займацца. Таму не сказаў бы, што яно на мяне мела ўплыў. Спачатку я быў знаёмы з літоўскім кіно, і калі ўбачыў фільмы з Беларусі канца 1990-х — пачатку 2000-х, мне падалося, што паміж імі ёсць нешта агульнае, толькі беларускія фільмы бліжэйшыя да рэалізму. Але цяпер з’яўляецца шмат новых аўтараў, іншы час, і, мне падаецца, вызначыць нейкія рысы, харaктэрныя менавіта для беларускага дакументальнага кіно, даволі цяжка. Я б не шукаў нешта агульнае ў стылі нашых аўтараў, хутчэй тут можа быць блізкі кантэкст і тэмы, якія яны развіваюць.
Пра працу без здымачнай групы і тых, меркаванню каго цалкам можна давяраць у рабоце над стужкай
Мне падабаецца працаваць на здымках аднаму, у адзіночку я адчуваю сябе ўпэўнена. Часам чалавек з большым вопытам можа цябе падавіць і ты нешта страціш. І потым, каб працаваць разам, трэба мець добрае паразуменне, каб табе з такім чалавекам было камфортна. На здымках не патрэбна шмат людзей, калі размова ідзе пра мае праекты. Але я не адмаўляю магчымасці працаваць, напрыклад, з аператарам і ў мяне такі вопыт быў — на стужцы «Забытыя ў Нарвілішках» з літоўскім аператарам Рымвідасам Лейпусам, які, дарэчы, шмат працаваў разам з Шарунасам Бартасам. Цяпер у мяне ёсць адукацыя аператара, і я спадзяюся на свае сілы. Мне падабaецца ствараць выяву, усё ж я доўгі час працаваў з жывапісам. Працэс здымак нагадвае напісанне пэўнай гісторыі.
Бывае, падзеі разгортваюцца настолькі хутка, што ў цябе няма часу даць указанні. Усё будзе залежаць ад таго, як аператар адчувае цябе, рэжысёра. Бо ў такія моманты вырашае ён, а гэта можа быць не тое, што патрэбна табе, аўтару. У дакументальным кіно цяпер шмат хто з рэжысёраў здымае ў якасці аператара сам. Іншая справа, што манціраваць карціну трэба з мантажорам, бо тут неабходны свежы погляд. І менавіта мантажор дапамагае стварыць структуру фільма, а не толькі зрабіць мантаж карэктным. Думаю, для мяне мантаж — адно з самых важных у працэсе працы над стужкай. Мантажор і павінен быць тым чалавекам, якому вы давяраеце.
Пра вяртанне да жывапісу і перасячэнне заняткаў жывапісам і кіно
Калі я ехаў у Ле Фрэнуа, мне здавалася, я буду займацца лічбавым мастацтвам, гэта калі пры дапамозе тэхналогіі ствараецца мастацкая работа. Мяне цікавіла Expanded Cinema. Гэта рух, які рассоўваў межы кіно і аспрэчваў яго традыцыйную форму — стасункі гледача з экранам у кіназале і пэўны інтэрвал часу. Мастакі руху пайшлі далей і стваралі тое, што можа адбыцца за гэтай традыцыйнай формай. Але сустрэча з Шанталь Акерман і павярнула мяне да традыцыйнай формы, хоць яна сама рабіла даволі шмат эксперыментаў па-за кіназалай. А далей я прыйшоў да нейкай формы рэалізму, якая цяпер вяртае мяне да занятку жывапісам. Мне здаецца, што я трохі стамiўся ў гэтым рэалізме, і ў мяне з’яўляецца жаданне больш трансфармаваць аб’екты. Думаю, гэта можа пераклікацца з кіно, я шукаю вобразы для жывапісу праз кінематаграфічную выяву, праз фатаграфію. Гэта як аснова, пункт адліку. Мяне цікавіць не перанос аб’екта на экран, a тое, чым выява на палатне можа адрознівацца ад фотаздымка ці кадра з відэа. Але гэта толькі пачатак. Я не ведаю, ці гэта працягнецца ці прывядзе да нечага іншага.
Пра наступны праект
Праект, над якім я цяпер працую і здымкі матэрыялу якога ўжо адбыліся, — гісторыя Санцьяга Сунера, які жыве ў Каталонiі. Сёлета Санцьяга споўніцца шэсцьдзесят два гады. Ён астрoлаг. Нядаўна пасля смерці жонкі ён пераехаў з Барселоны ў маленькую матчыну хатку на ўскрайку лесу, за тры кіламетры ад правінцыйнага горада Кардадэу. Цень адзіноты навісае над Санцьяга. Кожны дзень ён спускаецца ў Кардадэу, дзе гуляе ў латарэю і спадзяецца выйграць вялікую суму альбо проста бадзяецца. Мужчына толькі пачаў пісаць кнігу пра васьмідзясятыя ў Барселоне: галоўны герой — следчы-паліцэйскі (як Шэрлак Холмс), які расследуе злачынствы пры дапамозе астралогіі. Гэта не толькі гісторыя пра следчага (прататып — сам
Санцьяга), але пра пачуцці, яго памяць, людзей, якіх ён ведае, яго пачуцці да роднага горада трыццацігадовай даўніны. Санцьяга не робіць нататкі, але запісвае свой голас, падобна персанажу Бэкета Крэпу, на стары касетны магнітафон. Засталося толькі некалькі касет. Усё жыццё можна аднавіць па гэтых магнітных стужках. Мінулае Санцьяга Сунера ззаду, сучаснасць — за сцяной, яму цяжка аднавіць жыццё і знайсці сваё месца побач са старой маці і паміж родных. Але ў яго яшчэ ёсць надзея на лепшую будучыню.
Пра адрозненне дакументалістыкі ад іншых відаў мастацтва і місію дакументаліста
Шчыра кажучы, я ніколі не думаў пра нейкую місію дакументальнага кіно. Мажліва, яна і ёсць, але дакументальнае кіно настолькі рознабаковае і ў ім цяпер магчыма так шмат, што ў мяне няма канкрэтнага адказу, у чым яго галоўная задача.