І апетая класікамі сімпатыя полек да афіцэраў (а пан быў гвардзейцам!) у яе прыватным выпадку выпетрылася да таго, што пазнейшыя дакументы паміналі цяжарнасць ад каханка, развод і ўцёкі ў актрысы. Выхады на сцэну суправодзіла пісанне раманаў і драм. За адну такую, «Мараль пані Дульскай», Запольскую асабліва цэняць сучасныя рэжысёры (нават былыя савецкія), а ў абыходак трапіла слова «дульшчызна» (падвоены стандарт, маўляў, «каб усё было прыстойна, нават калі гэта не так»). Цікаўны глядач, паўзіраўшыся ў сцэнічныя звады, не палянуецца адшукаць прозвішча Запольскай у сеціве ды знайсці Марыю Габрыэлю Стэфанію Корвін-Піятроўскую, народжаную ў 1857 годзе, каб уведаць падрабязнасці жыцця гэтай «па-еўрапейску эмансіпаванай кабеты». Ці не таму спектакль «Іх чацвёра» знакамітага Ежы Штура, артыста, рэжысёра і педагога, незаўважна, але спадзявана пашырыўся да памераў невялікага адукацыйнага праекта?
...Да апошняга пан прафесар, галава сям’і і падмануты муж, намагаецца захаваць гэтую славутую прыстойнасць, але жыццё ў шлюбе робіцца невыноснаю пакутай. І як бы ні змяняліся ў драматычнай кампазіцыі пары сужэнцаў ці каханкаў, чацвёртай заўжды будзе дзяўчынка Ліла, дачка прафесара і ягонай неразважлівай прыгажуні-жонкі. Гэткім бязважкім, маўклівым грузікам сумлення, пільным даважкам, рогам або кутам у складаных фігурах дзіўнага сямейнага рушэння сваіх бацькоў. Тыя бясконца тузаюць малую — выхоўваюць, настаўляюць на добрае-прыстойнае. Аднак сваім уласным прыкладам, як гэта часта здараецца, вучаць зусім не таму, пра што дбаюць.
Ладны кавалак жыцця Запольская пражыла ў Львове (і там пахаваная ў 1921-м). Тамсама ў 1907 годзе «трагедыю дурных людзей» упершыню ўвасобілі ў спектакль. Можна ўявіць, што яе персанажы па-свойму адбіваюць тагачасныя мясцовыя норавы, а рэжысура Ежы Штура так натуральна яднае местачковае з агульначалавечым — у найноўшага модніка з крэдытным айфонам быў папярэднік, які на падобных умовах набываў ровар ды грамафон. Але праз мэблю, рэквізіт і сцэнічныя ўборы (сцэнографка Малгажата Дамяньска, мастачка па касцюмах Зоф’я дэ Інэс) сцэна адбівае славутую часіну перад Другой сусветнай: на легкадумных персанажаў насоўваецца 1939 год. Так што сямейны разлад кантрастуе не толькі з Вігіліяй і Калядамі (гэтыя абставіны прапануе драматург). Такім чынам рэжысёр падмацоўвае своеасаблівую крохкасць матэрыялу, які няможна актуалізаваць літаральна. Невясёлы, нешчаслівы настрой мужа — а Ежы Штур іграе прыхаваную драму ўзросту стрыманага, універсітэцкага выкладчыка і, верагодна, навукоўца — лагічны працяг роздуму «пра час і пра сябе». Магчыма, спакойная сямейная трываласць мацнейшая за жарсць, па якой яшчэ не згасла памяць, ды маюцца іншыя прычыны дрэнчыцца і бясконца ўзірацца ў будучыню.
Увасабляючы жонку, артыстка Соня Бахасевіч перадусім вылучае пажадлівую плоцевую несупакоенасць, прагу юрлівай прыгоды, бо ўсё надта спакойна ды неяк прэсна. Гэтая жанчына абмежаваная, дрэнна выхаваная (прынамсі ў тым, што называецца выхаваннем пачуццяў), але далёка не дурная. Хутчэй за ўсё, яна аматарка кіно: у манеры паводзін і фасоне нязручнай сукенкі час-почас яна як бы зрахоўваецца з нейкім узорам. Пакуль кабета ладзіць прыгожыя стасункі з фацэтам авантурнага складу (яркая работа Антонія Паўліцкага, месцамі схільная да адкрытай сатыры), прыяцелька-швачка кладзе вока на прафесара, асцярожна-разлічана карыстаецца момантам, заваёўвае месца ў прыстойнай сям’і...
Галоўная каштоўнасць старога трагіфарсу (якому месцамі бракуе матывовак, пераканаўчасці стасункаў, учынкаў, сюжэтных ліній) — дыхтоўны тэкст. Артысты знаходзяць адметныя інтанацыі, робяць яго аб’ёмным і надзіва сучасным, ды прамаўляюць бадай адно дарослыя персанажы, чыя бальшыня занятая толькі сабой і жыве няпэўным сённяшнім днём. Будучыня ў абліччы дзяўчынкі пераважна маўчыць (аддамо належнае Марыі Даўгвіловіч-Навіцкай). Здаецца, Новы год — новае шчасце, з якім так імпэтна віншуюць, але крах шлюбу ўзмацняе набліжэнне бяды, прыхаванай катастрофы. На крэслы ўсцягваюць белыя чахлы. Мігціць чырвонае святло пры задніку ў перадпакоі. Дзяўчынка маўкліва ўкленчвае перад каляднай ялінай, аднак нават не адцягваецца, каб разгледзець ўпрыгожанні... Перад недалёкай жахлівай будучыняй рэжысёр ураўноўвае дарослых персанажаў — так, што з-пад трагіфарсу вынікае драма трагічнага глупства праз эгаізм. Але, падпарадкоўваючыся праўдзе жыцця, дзіця застаецца на самоце. І праўда мастацтва не супярэчыць.
Дана Рагатка