Аналітычны жывапіс знаходзіўся ў пошуках універсальных кампазіцыйных законаў, якія потым можна прымяніць у праектаванні трохмерных аб’ектаў, у тым ліку ўтылітарных. Чальцы групы «Дэ Стэйл» натхняліся жывапісам Мандрыяна і будавалі дамы ды канструявалі мэблю на аснове абстрактных кампазіцый з перакрыжаваных ліній і плоскасцяў, пафарбаваных у чырвоны, жоўты ды сіні. Казімір Малевіч не толькі ствараў абстрактныя аб’ёмныя кампазіцыі — архітэктоны, — але і праектаваў посуд, напрыклад. Так, у лабараторыі формы пры Ленінградскім фарфоравым заводзе быў выраблены «Супрэматычны сервіз» — і нават запушчаны ў вытворчасць. А вось паводле кубасупрэматычных інсталяцый віцебскага авангардыста Аляксандра Малея мясцовая ювелірная кампанія выпусціла адмысловую калекцыю ўпрыгажэнняў.
У адным з інтэрв’ю Маўрыцыа Катэлан заўважыў: сёння брэнды, як калісьці прыватныя калекцыянеры ў мінулым, — гэта тая ўрадлівая глеба, што дае расці ідэям мастакоў. Цяпер і зусім маладыя творцы, і зоркі арт-свету супрацоўнічаюць з люксавымі ювелірнымі кампаніямі кшталту «Cartier» ці «Van Cleef & Arpels». Але звычайна мастакі ствараюць дызайн упрыгажэння спецыяльна для брэнда. Беларуская кампанія пайшла адваротным шляхам: Аляксандра Малея запрасілі стаць ментарам для дызайнераў, зрабіць ім «супрэматычную прышчэпку». А вернісаж, на якім інсталяцыі Малея з металу, ДСП і аб’ектна-канструктыўнага жывапісу выстаўляліся побач са срэбранымі калье, брошкамі ды завушніцамі, зладзілі ў сценах легендарнага будынка Віцебскага народнага мастацкага вучылішча, дзе калісьці Малевіч пісаў свае тэарэтычныя трактаты…
Ініцыятыва супрацоўніцтва належала дырэктару кампаніі Дзмітрыю Рабунскаму — дарэчы, былому вучню Малея. Назва калекцыі «Double Space» адсылае да канцэпцыі двайной прасторы, вынайдзенай мастаком. Аляксандр Малей развівае ідэі супрэматызму і пераўтварае двухмерныя плоскасныя кампазіцыі ў трохвымерныя інсталяцыі:
— Я расшчапляю форму і змяшчаю ў розныя прасторы, а глядач вымушаны аб’яднаць яе ў сваім уяўленні. Такім чынам я ўцягваю гледача ў мастацкі працэс пабудовы прасторы. Аб’ект існуе ў дзвюх прасторах — трохмернай (аб’ект) і двухмернай (малюнак). Малюнак на палатне — інтэрпрэтацыя аб’екта, які з’яўляецца часткай канструкцыі. Ён існуе ў фізічным аб’ёмным свеце і інтэрпрэтаваны на плоскасці. Атрымліваецца аб’ёмна-часавая прастора — кубаквадрат. Я вызваляю жывапіс ад рамы, фону і трансфармую ў прастору кубаквадрату. Такім чынам жывапіс трапляе ў трохмерны асяродак, у аб’ёмна-часавую прастору, — распавядае творца.
Як будаваліся ўзаемадачыненні мастака і дызайнераў кампаніі? Аляксандр Малей падкрэслівае, што перад мастаком і перад дызайнерам стаяць зусім розныя задачы. У аснове формаўтварэння ў дызайне ляжаць функцыянальны аналіз і разуменне зручнасці прадмета. А вось формаўтварэнне ў мастацтве нараджаецца ад стаўлення мастака да жыцця і ягонага светапогляду. Самае цікавае і складанае ў такой калабарацыі — аб’яднаць два розныя падыходы. Але і ў мастацтве, і дызайне ўсё стаіць на трох кітах: прасторы, форме і колеры.
Аляксандр Малей настойваў, што для працы над калекцыяй патрэбныя менавіта два дызайнеры — каб было альтэрнатыўнае меркаванне. Наталля Павільцава і Мікалай Драбышэўскі працавалі пад куратарствам і навуковым кіраўніцтвам мастака. Абодва навучаліся ў Віцебскім тэхналагічным універсітэце на факультэце дызайну. Наталля працуе ювелірам амаль дзесяць гадоў, Мікалай — малады выпускнік, які добра зарэкамендаваў сябе працай над ювелірнай калекцыяй «Пікаса».
У мастакоўскую майстэрню дызайнеры прыходзілі тры разы на тыдзень на працягу месяца і праводзілі там амаль палову дня. Заняткі Малей распачаў з тэарэтычных уводзінаў: тлумачыў сутнасць канцэпцыі двайной прасторы і розніцу паміж ягонай тэорыяй і супрэматызмам Малевіча. Паводле віцебскага мастака, існуюць супрэматычная трансцэндэнтная прастора, у аснове якой — плоская геаметрычная кампазіцыя, і матэрыяльная, фізічная прастора — гэта і аб’ём, і трохмернасць. Дзве прасторы існуюць паралельна, але ва ўзаемасувязі, і сімвалізуюць раўнавагу духоўнага і матэрыяльнага пачаткаў, то-бок — гармонію. Менавіта гэтымі тэзісамі кіраваліся дызайнеры, калі стваралі эскізы калекцыі. Акцэнт быў зроблены на гульню ліній і акружнасцяў у спалучэнні з аб’ёмнымі формамі.
— Калі працуеш паводле канцэпцыі двайной прасторы, то вядзеш лінію і адначасова думаеш пра іншую лінію — як яна ляжа, як будзе ўзаемадзейнічаць з першай, — распавядае Наталля Павільцава. — Каб паглыбіцца ў тэму, асэнсаваць яе як след, мы чыталі кнігі Малея «Зваротная інфармацыя», «Віцебскі "Квадрат"». Мастак вельмі хваляваўся, што за той кароткі час, які мы праводзім па-за сценамі ягонай майстэрні, мы «абнуляемся», таму пастаянна даваў нам хатнія заданні. Напрыклад, зрабіць сэт, у якім кальцо будзе і аб’ёмнае, і плоскае адначасова (то-бок каб у ім спалучаліся дзве прасторы), а завушніцы — адна плоская, адна аб’ёмная. Заўважу, што такія моназавушніцы — вельмі ў рэчышчы сучасных тэндэнцый, а нам якраз хацелася ўвесці ў калекцыю актуальныя трэнды. Мы з Мікалаем малявалі кожны свае накіды і кампазіцыі. Я падказвала яму штосьці па тэхналогіі: якія матэрыялы мы можам выкарыстаць, якія ўстаўкі зрабіць і якія закрэпкі. Аляксандр кансультаваў нас паасобку. Калі яго нешта чапляла, ён выбіраў і раіў, што можна палепшыць, і мы адмалёўвалі эскіз гатовага ўпрыгажэння.
У пытаннях колеравай гамы (серабрысты, чырвоны, сіні і графітава-чорны) дызайнераў таксама арыентаваў мастак. Ён папярэдзіў быць стрыманей з колерам, бо не любіць яркіх буйных плямаў.
— Мы выбіралі спакойныя адценні і эксперыментавалі з матэрыяламі. Спачатку збіраліся рабіць шары з чорнага дрэва, але яны не падыходзілі па фактуры і тэкстуры, бо мы хацелі атрымаць адліў, таму абралі перліны, не натуральныя, бо гэта рэзка б падняло кошт вырабу, ды і адпаведны памер натуральных камянёў цяжка было падабраць, — кажа Наталля. — А вось агаты натуральныя, мы адмыслова гранілі іх для калекцыі. Самае класнае, што нашы ўпрыгажэнні атрымаліся заўважныя, буйныя, але пры гэтым няцяжкія.
У круглых буйных завушніцах, а таксама асіметрычных гарнітурах выкарыстаны эфектныя ўстаўкі фотапалімернай эмалі — гэта сучаснае пакрыццё, сплаў шкла, які зацвердзявае пад уздзеяннем ультрафіялету і ўтварае моцную паверхню. Такая эмаль трывалая: не адслойваецца, не выцвітае і не цямнее.
Калекцыя рыхтавалася цягам дзевяці месяцаў. Ювеліры, якія прадаюць свае творы на фэшн-маркетах, амаль на ўсіх этапах працуюць уручную, а як наладжаны працэс на вытворчасці? Калі эскізы гатовыя, дызайнеры абмяркоўваюць з тэхнолагам магчымасці выраблення і дэталі канструкцыі. Потым праходзіць прагляд з удзелам маркетолагаў і дырэктара, яны вызначаюць, ці будзе попыт і продажы, і зацвярджаюць — альбо не — эскізы. Пасля прагляду наступае чарга 3D-мадэльераў, якія ў адмысловай праграме выбудоўваюць прататып упрыгажэння пад кантролем дызайнера. Адмаляваны прататып адпраўляецца на вырошчванне, з гатовай загатоўкі робяць форму, якую выкарыстоўваюць у вытворчасці. Гатовы выраб апрацоўваюць ювеліры, устаўляюць у яго камяні і паліруюць. І нарэшце — фінальны прагляд мастацкай рады, пасля чаго калекцыя трапляе на прылаўкі.
— Гэта быў няпросты, але захапляльны вопыт, — кажа Наталля. — Да таго ж калі-нікалі мы мелі магчымасць назіраць, як працуе сам мастак… Міжволі пачынаеш яму зайздросціць — творца вольны займацца тым, чым хоча сам. Што да нашай калекцыі — яна сапраўды блізкая мне па эстэтыцы, я люблю мінімалізм, дакладныя лініі і лаканічнасць без нагрувашчвання дэталяў.
Калі разважаць пра вынікі ювелірнай калабарацыі, то гэта і актуалізацыя культурнай спадчыны, і напамін пра тое, кім мы ёсць і дзе палягаюць карані «рускага авангарду», і папулярызацыя творчасці сучаснага беларускага мастака сярод новай аўдыторыі. Як мяркуе сам Аляксандр Малей, той, хто насіцьме ўпрыгажэнні «Double Space», адчуе матрыцу яго мастацтва і будзе непасрэдна ўдзельнічаць у творчым працэсе…
Алена КАРПІЛАВА