КАЛІ Ў СЯРЭДЗІНЕ КРАСАВІКА НА АДМЫСЛОВАЙ ПРЭС-КАНФЕРЭНЦЫІ БЫЛА ПРАДСТАЎЛЕНА ПРАГРАМА СЕМДЗЕСЯТ ДРУГОГА ПА ЛІКУ ФЕСТЫВАЛЮ, ПАДАЛОСЯ НАВАТ, ШТО ЎСЕ ГУЧНЫЯ СУСВЕТНЫЯ ПРЭМ’ЕРЫ КІНАСЕЗОНА АДБУДУЦЦА МЕНАВІТА Ў ГЭТЫМ ТРАЎНІ. СЁЛЕТА ПРАДСТАЎНІКІ МАСМЕДЫЯ, КІНАБІЗНЭСУ І КІНАМАНЫ З УСЯГО ЗЯМНОГА ШАРА ЛІТАРАЛЬНА АТАКАВАЛІ КАНЫ. З АСАБЛІВЫМ ІМПЭТАМ ЯНЫ АТРЫМЛІВАЛІ АКРЭДЫТАЦЫЙНЫЯ БЭЙДЖЫ І СТАНАВІЛІСЯ Ў БЯСКОНЦЫЯ ЧЭРГІ Ў ГЛЯДЗЕЛЬНЫЯ ЗАЛЫ ЗНАКАМІТАГА ПАЛАЦА ФЕСТЫВАЛЯЎ НА ЎЗБЯРЭЖНАЙ КРУАЗЭТ. РЭДАКТАР АДДЗЕЛА КІНО НАШАГА ЧАСОПІСА БЫЎ АДЗІНЫМ У ГЭТЫМ ГОДЗЕ ПРАДСТАЎНІКОМ БЕЛАРУСКІХ СМІ НА ФРАНЦУЗСКАЙ РЫЎЕРЫ І РАЗАМ З ЗАМЕЖНЫМІ КАЛЕГАМІ ПЕРШЫМ НА СВАЕ ВОЧЫ ПАБАЧЫЎ ГАЛОЎНЫЯ ТРЭНДЫ СУСВЕТНАГА КІНО.
Няглядзячы на тое што Канскі фестываль пакуль не дапускае ў конкурсныя праграмы стужкі, фінансаваныя анлайн-платформамі і не прадугледжаныя да кінапракату, семдзесят другі фэст, на думку многіх экспертаў, відавочна, стаў важным паваротным пунктам ад haute couture да prêt-à-porter у фестывальным праграмаванні. Перад мастацкім дырэктарам Цьеры Фрэмо ў гэты раз стаяла асабліва няпростая задача. Трэба было адабраць у конкурсныя праграмы як мага больш фільмаў аўтараў з гучнымі імёнамі і не забывацца пра тое, што новы час ужо наступіў. Фрэмо вырашыў задачу з адпаведнай французу вытанчанай прыгажосцю. Разам з новымі стужкамі ўлюбёнцаў канскай аўдыторыі ў галоўным конкурсе апынуліся не радыкальныя фестывальныя эксперыменты (сёлета яны таксама былі, але не ў конкурсе і пра іх ніжэй), а цалкам сабе жанравыя карціны, якія праз колькі часу могуць сабраць у кіназалах годную касу.
Знакамітае аўтарскае кіно другой паловы ХХ стагоддзя рухалася адначасова з усім чалавецтвам. Лепшыя стужкі Федэрыка Феліні, Інгмара Бергмана, Андрэя Таркоўскага — кожная па-свойму распавядала пра складаную гуманітарную падаплёку ўсіх зменаў, якія адбываліся з грамадствам у развітых краінах і ролі асобы ў іх. У дзевяностыя аўтарскае кіно стала больш герметычным, арыентаваным на адлюстраванне ўнутранага свету мастака. Узнікала плынь так званага фестывальнага кіно, адарванага ад камерцыйнага кінапракату і не разлічанага на ўспрыманне шараговага гледача. Фэст у Канах, як і мерапрыемствы ў Венецыі і Берліне, стаў дэманстрацыяй авангарднай кінамоды. Канскія прэм’еры ў большасці не пакідалі прасторы спецыялізаваных арт-хаўсных кінатэатраў, а гледачы паступова падсаджваліся на тэлевізійныя фільмы, якія з пачатку двухтысячных усё часцей паказвалі неблагі мастацкі ўзровень. Нарэшце, прыход у фестывальнае кіно ў якасці інвестараў анлайн-платформ канчаткова хіснуў маятнік у бок стужак для малога экрана. Вядучыя рэжысёры свету пачалі працаваць на тэлевізійную аўдыторыю.
Апрача таго, паміж трыма галоўнымі кінафестывалямі класу «А» заўсёды існавала канкурэнцыя за гучныя імёны. Аўтарскае кіно ў сучасным яго разуменні нарадзілася ў шасцідзясятыя гады мінулага стагоддзя, Берлін, Венецыя і Каны хутка сталі яскравымі сімваламі высокага кінамастацтва. Але паступова менавіта Канскі чырвоны дыванок стаў самым пажаданым. У апошнія дзесяцігоддзі Венецыянскі МКФ, як і Берлінале, задавольваліся тымі стужкамі, якія з нейкіх прычын не маглі пераадолець высокія патрабаванні канскіх адборшчыкаў. І праз пару гадоў усё рэзка змянілася. Як тое заўсёды бывае ў кіно, змены прыйшлі разам з тэхнічным прагрэсам: анлайн-платформы, самай буйной і ўплывовай з якіх з’яўляецца амерыканскі «Нэтфлікс», раптам і назаўжды змянілі правілы паводзін на сусветным кінарынку. Хатні прагляд і тэлевізійныя серыялы складаюць цяпер моцную канкурэнцыю фільмам на вялікім экране, але якраз на апошнія і скіраваны буйныя кінафорумы. Канфлікт інтарэсаў наўпрост адбіўся на сусветным фестывальным руху. Калі фэсты ў Берліне і Венецыі не ставяць абавязковай умовай для ўдзельнікаў кінатэатральны пракат фільмаў, то Каны наадварот. Стужкам, якія фінансуюць анлайн-платформы і якія наўпрост трапляюць цяпер на хатнія экраны, у Палац фестываляў на Круазэт уваход забаронены.
Пры новым раскладзе Каны пачалі губляць гучныя сусветныя прэм’еры. Вось і галоўная леташняя прэм’ера, аскараносная стужка «Roma» мексіканца Альфонса Куарона, убачыла свет на венецыянскім востраве Ліда. Але наўпрост звязаная з французскай кінапракатнай індустрыяй дырэкцыя Канскага фестывалю не здавалася. Конкурсная праграма сёлетняга фэсту падбіралася з асаблівым імпэтам. І тое, што Квенцін Таранціна і Абдэлаціф Кешыш у апошні момант, але ўсё-ткі паспелі прывезці на Французскую Рыўеру свае новыя карціны, таму яскравы доказ. Аднак, як тое часта бывае, магія імён сама па сабе не стала гарантыяй поспеху. Практычна з першых конкурсных дзён акрэдытаваныя на фестывалі прадстаўнікі масмедыя пачалі спакваля бурчэць пра «нізкі ўзровень» сёлетніх Канаў. Справа, зразумела, была не ва ўзроўні: кожны год ад фільмаў класікаў кіно ў Канскім конкурсе чакаюць нейкіх адкрыццяў — і кожны раз абавязкова расчароўваюцца ад сваіх завышаных чаканняў. Але сёлета адкрыцці адбываліся ў іншым кірунку, аб чым сведчыць хаця б фільм-пераможца.
«Паразіты» карэйскага рэжысёра Пон Джун-Хо — займальная сатырычная камедыя, вельмі далёкая ад радыкальных аўтарскіх эксперыментаў, якіх прызвычаіліся чакаць ад Канскай праграмы. Пон Джун-Хо не дэбютант у Канах, два гады таму яго антыўтапічная сатыра «Окча» рэзка падзяліла фестывальную аўдыторыю на два супрацьлеглых лагеры. У гэты раз рэжысёр, што працуе на мяжы аўтарскага кіно, але ўсё ж не забываецца пра камерцыйны разлік, прыехаў на Круазэт яўным фаварытам нават на фоне заяўленых у праграме Таранціна, Альмадовара і Джармуша. І «Залатая паль-
мавая галіна», якую ён у выніку атрымаў, стала заканамернай. Журы пад старшынствам мексіканца Аляхандра Гансалеса Ін’ярыту відавочна ўпадабала «Паразітаў» не толькі за дасціпныя жарты. Пон Джун-Хо ў сюжэце сваёй стужкі (а ён адначасова з’яўляецца і аўтарам сцэнарыя) падняў вельмі актуальную праблему раздзялення людзей у сучасным грамадстве. Тая самая класавая барацьба, прывід якой, здавалася, знік тры дзесяцігоддзі таму разам з прывідам камунізму, набывае ў «Паразітах» новы сэнс. Удача фільма, відавочна, у тым, што Пон Джун-Хо не імкнецца расстаўляць маральныя акцэнты, навешваць нейкія ярлыкі. У яго карціне няма добрых або дрэнных персанажаў. Адносіны, у якія ўступаюць прадстаўнікі двух супрацьлеглых лагераў, умоўна «бедных» і ўмоўна «багатых», цяжка назваць класавай барацьбой у літаральным сэнсе. Бадай, Пон Джун-Хо на сённяшні момант лепей за іншых аўтараў дэманструе некалі добра вядомую сітуацыю «нізы не хочуць, вярхі не могуць».
Вельмі займальнае, з парадаксальнымі, часам спрэчнымі жартамі кіно пралятае для гледача куды хутчэй за заяўленыя ў праграме дзве гадзіны. Відовішчнасць, сацыяльны пасыл, жанравая скіраванасць карэйскага фільма з высокай верагоднасцю скораць не толькі канскае журы і фестывальную аўдыторыю.
Стужка Пон Джун-Хо стала першай карэйскай работай, якая атрымала «Залатую пальмавую галіну». Летась вышэйшай адзнакай Канаў быў уганараваны яшчэ адзін прадстаўнік Паўднёва-Усходняй Азіі — Хіракадзу Карээда за фільм «Зладзюжкі з крамы». Але калі прыз японскаму аўтару за якраз тыпова фестывальнае кіно быў відавочным кампрамісам, то «Паразіты» спадабаліся і адразу сталі фаварытам і ў прадстаўнікоў прэсы, чыё меркаванне звычайна не супадае з рашэннем журы.
Яшчэ адным фаварытам быў Квенцін Таранціна, які акурат у Канах роўна чвэрць стагоддзя таму стаў лідарам сусветнага кінематографа са сваім «Крымінальным чытвом». «Аднойчы ў Галівудзе», відаць, яго лепшая карціна з часоў дылогіі «Забіць Біла». Выбітны стыліст, Таранціна абраў для свайго новага фільма класічную кінастужку (з яе фільм паказвалі ў Канах) і форму вялікага рамана з некалькімі сюжэтнымі лініямі, што ў канцы складваюцца ў адзінае цэлае. Рэжысёр ізноў у лепшым выглядзе прадэманстраваў сутнасць свайго стылю, у якім элементы жанравага, забаўляльнага кінематографа мінулых часоў віртуозна выкарыстаны ў аўтарскім рэчышчы. «Аднойчы ў Галівудзе» прысвечаны знакамітым падзеям вакол трагедыі з забойствам бандай Чарльза Мэнсана цяжарнай жонкі Рамана Паланскага Шэран Тэйт у 1969 годзе. Ды сэнс фільма не толькі ў абсалютна нечаканай развязцы (яе рэжысёр папрасіў прадстаўнікоў СМІ не раскрываць у сваіх рэцэнзіях), але найперш ва ўдала распрацаванай, насычанай дэталямі атмасферы, выдатнай ігры акцёраў першага галівудскага шэрагу — Брэда Піта, Леанарда Дзі Капрыа, Марго Робі. Як і ў выпадку з «Паразітамі», «Аднойчы ў Галівудзе» — кіно глядацкае, яно не з’яўляецца фестывальным кампрамісам, але парадаксальным чынам, як у лепшыя часы Фабрыкі Мрояў, аб’ядноўвае мастацтва з маскультам.
Квенцін Таранціна стаў адной з нешматлікіх зорак сусветнага кіно, што з’яўляліся не толькі на паказах сваіх фільмаў, але і наведвалі прэм’еры іншых рэжысёраў. Так, аўтар гэтых радкоў, як і іншыя прадстаўнікі прэсы, быў усцешаны раптоўным з’яўленнем Таранціна на паказе стужкі «Ніна Ву» кітайскага рэжысёра Мідзі Зэд, створанай на Тайвані і прэзентаванай у другім па значнасці канскім конкурсе «Асаблівы погляд». Прайшоўся знакаміты амерыканец, які не раз прызнаваўся, што чэрпае натхненне ў кінематографе Паўднёва-Усходняй Азіі, па чырвоным дыванку і перад пачаткам стужкі асноўнага конкурсу «Возера дзікіх гусей» Чжау Інаня. Зробленая ў мацерыковым Кітаі карціна не знайшла разумення ў журы і прэсы, аднак, на маю думку, была ў Канах адной з найбольш яркіх. Крымінальная гісторыя з відавочнымі адсылкамі да аўтарскага кіно ад Вонг Карвая да Жан-Люка Гадара яскрава дэманструе адваротны бок так званага эканамічнага цуда. Чжау Інань, такім чынам, зняў яшчэ адзін вострасацыяльны фільм з сёлетняй канскай праграмы.
Зрэшты, як і бельгійскія аўтары, улюбёнцы Канаў Жан-Пьер і Люк Дардэны. Іх «Малады Ахмед» парушыў відавочнае табу на паліткарэктнасць, якое існавала не толькі ў прасторы фестывальнага кіно, але і наогул у еўрапейскай інфармацыйнай парадыгме. Калі аўтары таксама конкурснага французскага фільма «Адрынутыя» (рэжысёр Ладж Лі) толькі заявілі пра глабальныя праблемы ў сферы міжэтнічных адносін у шматнацыянальнай Еўропе ды абмежаваліся асабістым канфліктам групы паліцэйскіх і жыхароў аднаго з парыжскіх этнічных гета, то браты Дардэны пайшлі нашмат далей. Іх стужка адна з лепшых за ўсю іх кар’еру, у якой асобнымі радкамі ідуць адразу дзве «Залатыя пальмавыя галіны». Як заўсёды, браты-рэжысёры знялі камерную, аднак ад гэтага не менш цікавую і напружаную драму на мяжы з трагедыяй, аповед пра падлетка з мігранцкай сям’і, што падпадае пад уплыў радыкальных ісламістаў. У адрозненне ад дзясяткаў іншых стужак апошніх некалькіх дзесяцігоддзяў, дзе прадстаўнікі этнічных і рэлігійных меншасцяў паказваліся выключна са станоўчага боку, у «Маладым Ахмедзе» канфлікт пабудаваны менавіта на супрацьстаянні сучаснай еўрапейскай цывілізацыі і экстрэмісцкай трактоўкі ісламскай ідэалогіі. Як і ў іншых стужках Дардэнаў, канфлікт тут не зводзіцца да знешняга: галоўны, і так і не вырашаны, адбываецца ў свядомасці галоўнага героя. Карціну можна лічыць блізкай да крытычнага рэалізму, бо яна прапануе вельмі бескампрамісны погляд на рэчаіснасць, што не прадугледжвае нават магчымасці хэпі-энду. Зрэшты, прыдуманы аўтарамі фінал стужкі таму і выглядае даволі штучным, нават калі ўлічваць магчымасць адкрытай канцоўкі. Ясны, лаканічны стыль, адпрацаваны дзесяцігоддзямі працы ў аўтарскім кіно, быў заўважаны і ацэнены журы — браты Дардэны атрымалі прыз за лепшую рэжысуру, абышоўшы таго самага Таранціна, які гэтага прыза таксама безумоўна заслугоўваў.
Яшчэ адзін майстар-клас даў у асноўным конкурсе ветэран ужо брытанскага кіно і гэтаксама ўладальнік дзвюх «Залатых пальмавых галін» Кен Лоўч.
Назву яго стужкі «На жаль, мы не заспелі вас на месцы» ў дачыненні да сюжэта можна прачытаць двухсэнсоўна. Галоўны герой карціны ўладкоўваецца ў пабудаваны на сучасных інтэрнэт-тэхналогіях кантролю за працоўным часам кур’ерскі сэрвіс і пакідае гэтую фразу ля дзвярэй кліентаў, якія яго не дачакаліся. Адначасова разгортваецца драма ў сям’і галоўнага героя — пад уплывам цяжкага фінансавага становішча дарослыя члены сям’і вымушаны ўвесь час знаходзіцца на працы, праславутая ячэйка грамадства пачынае рассыпацца на вачах. Для фестывальнай аўдыторыі тут нічога новага не было, бо Кен Лоўч у жыцці і ў сваіх працах заўсёды прытрымліваецца левых поглядаў і дэманструе цяжкае становішча нізоў капіталістычнага грамадства. Але прадказальнасць не можа сапсаваць высокай якасці рэжысёрскай работы Лоўча, яго вострага рэжысёрскага позірку. У новай стужцы ён на баку так званых ахвяр прагрэсу, сумленных і працавітых брытанцаў, што найбольш пацярпелі ад шэрагу эканамічных хваляванняў апошняга дзесяцігоддзя і патрапілі пад гнёт новага віду эксплуатацыі — лічбавай, праз амаль рабскую працу на анлайн-сэрвісы. Тое, з якім імпэтам «На жаль, мы не заспелі вас на месцы» была адрынута часткай фестывальнай прэсы, чамусьці перадусім маскоўскай, гаворыць, хутчэй за ўсё, што Кен Лоўч патрапіў у чарговую болевую кропку грамадства.
Яшчэ адной важнай праблеме прысвечаны фільм ветэрана італьянскага кіно і таксама сталага наведвальніка канскай праграмы Марка Белокіа «Здраднік». Пры першым набліжэнні фільм падаецца прысвечаным спецыфічна італьянскай праблеме — гістарычнай барацьбе італьянскага грамадства і дзяржавы з сіцылійскай мафіяй у васьмідзясятыя-дзевяностыя гады мінулага стагоддзя. Як і ў шмат якіх сваіх папярэдніх стужках, Белокіа адштурхоўваецца ад рэальных падзей — супрацоўніцтва аднаго з былых босаў мафіі Тамаза Бушэты з правасуддзем. Рэжысёр надае дакументальнаму матэрыялу мастацкую вартасць, ад чаго апошні робіць яшчэ большае ўражанне. Хоць нейкіх значных сюрпрызаў у кірунку развіцця кінамастацтва «Здраднік» не нясе, яго змрачнаватая атмасфера наводзіць на пэўныя думкі і абагульненні. Перамога правасуддзя ў стужцы не выглядае натуральнай і канчатковай, Марка Белокіа з болем перагортвае крывавую старонку ў гісторыі Італіі.
Улюбёнцу Канаў Педра Альмадовару яшчэ далёка да сталага веку італьянскага мэтра, але ён ужо падводзіць вынікі. «Боль і слава» стаў чарговым аўтабіяграфічным опусам іспанца, лепшым за апошнія дзесяць-пятнаццаць год яго творчай кар’еры. Немалую ролю тут адыграў Антоніа Бандэрас — адзін з тых акцёраў, чый удзел у ранніх стужках Альмадовара прынёс або-
двум вялікую вядомасць. «Боль і слава» распавядае біяграфію выдуманага героя Бандэраса — залежнага ад наркотыкаў і любоўных успамінаў знакамітага кінарэжысёра. Відавочна, што ў рысах галоўнага героя і яго біяграфіі шмат агульнага з асобай самога Альмадовара. Аднак стужка бярэ найперш не гэтым, а цудоўнай, мяккай атмасферай і пранікнёнай ігрой выканаўца галоўнай мужчынскай ролі. У фільме здымаецца яшчэ адна актрыса Альмадовара, таксама зорка сусветнага кіно Пенелопа Крус. Яна іграе маці галоўнага героя і ніколі не перасякаецца з Антоніа Бандэрасам у адным кадры. Аднак менавіта акцёрскі складнік стаў самым цікавым і моцным месцам стужкі.
Успаміны аб заблытаных рамантычных узаемаадносінах падсілкоўваюць творчасць і франкамоўнага канадца Ксаўе Далана, яшчэ аднаго ўлюбёнца Канаў. Адносіны канскай аўдыторыі да Далана лепш за ўсё характарызуе восем з паловай хвілін авацыі, якой дваццаціпяцігадовы рэжысёр (нядаўна называны канскім вундэркіндам) быў удастоены пасля фінальных цітраў яго стужкі ў галоўнай фестывальнай залі Гран-Люм’ер. «Маціас і Максім» вельмі адрозніваецца ад папярэдніх работ аўтара сваёй дарослай інтанацыяй. Далан больш не гуляе ў кіно, з тым жа самым наборам жыццёвага вопыту і рэфлексіяй адносна пачуццяў юных жыхароў аднапавярховай Канады ён перайшоў да вельмі якаснай кінематаграфічнай прозы і глыбокай псіхалагічнай рэфлексіі. Аднак актуальных палітычных і сацыяльных трэндаў яго новая карціна дакранаецца толькі апасродкавана. «Маціас і Максім», наўмысна зняты і паказаны ў Канах, як і фільм Таранціна, з кінастужкі, прасякнуты інтанацыяй камернага, герметычнага кіно, якое адсылае нас да нядаўняга мінулага, а не да сучаснага або будучыні.
Па-за часам намагаецца быць іншы ветэран сусветнага кіно, амерыканскі класік Тэрэнс Малік. Яго «Схаванае жыццё» таксама заснавана на рэальнай гісторыі — аўстрыйскага фермера, які адмовіўся даваць прысягу на вернасць Гітлеру і нацыстам і быў за гэта пакараны смерцю. Фільм падзяліў фестывальную аўдыторыю на дзве часткі. Першая з захапленнем успрыняла складаную аўтарскую канцэпцыю Маліка — запаволенае разгортванне падзей у амаль трохгадзіннай карціне, вельмі складаную аператарскую працу і музыкальнае суправаджэнне, якое аб’ядноўвае ў сабе мноства кампазітараў — ад Іагана Себасцьяна Баха да Арва Пярта. Рэжысёрская канцэпцыя і манера Тэрэнса Маліка адсылае нас да часоў сімвалізму ў кіно, што, аднак, цяпер выглядае складанай, а ігра вельмі добрых еўрапейскіх акцёраў — празмернай. Прынцып, па якім пабудавана стужка, становіцца зразумелым у яе першыя дваццаць хвілін, і рэшту часу глядач проста чакае вядомай па анатацыі развязкі. Нездарма канскае журы ніяк не адзначыла фільм Маліка.
Роўна як і новы опус былога трыумфатара Канаў Абдэлаціфа Кешыша. Першая частка яго новай дылогіі «Мектуб. Маё каханне» пра жыццё моладзі на міжземнаморскім узбярэжжы Францыі ў сярэдзіне дзевяностых была паказана два гады таму на фестывалі ў Венецыі. Фінал гісторыі аўтар «Жыцця Адэль» прывёз у Каны адразу з мантажнага стала, таму яна не мела нават пачатковых і фінальных цітраў. І наогул была вельмі падобная да нейкай працоўнай версіі — тры з паловай гадзіны знятых амаль у рэальным часе падзей, якія складаюцца толькі з трох сцэн, прычым адна з іх з вельмі натуралістычнай эратычнай выявай. Канскі фестываль бачыў і больш радыкальныя аўтарскія эксперыменты, тым больш іх бачыў сучасны глядач, таму стужка Кешыша на фоне астатняй праграмы выглядала яўным правалам. Сам рэжысёр відавочна гэта адчуў і парушыў Канскі этыкет, пакінуўшы глядзельную залю да сканчэння карціны і пратакольных апладысментаў.
На фоне вострасацыяльных выказванняў Кена Лоўча, братоў Дардэнаў, відовішчных «Паразітаў» Пон Джун-Хо і спавядальнага фільма Педра Альмадовара «Мектуб. Маё каханне. Intermezzo» асаблівага ўражання не зрабіў. Але журы і значная частка аўдыторыі падтрымала стужку «Атланцік» канскай дэбютанткі, дачкі сенегальскіх уцекачоў Маці Дзіап. Маладая рэжысёрка, якая вырасла ўжо ў Францыі ў багемным асяродку, атрымала другую ў Канах па важкасці адзнаку — Гран-пры журы. Рамантычную, а ў нечым містычную гісторыю, што паказана ў «Атланцік», таксама вельмі цяжка ўявіць у шырокім пракаце. Хутчэй за ўсё, Маці Дзіап узяла ўвагу канскага журы нязмушаным хараством дэбютнага погляду на кіно і жыццё, які нячаста сустрэнеш у выпускнікоў сучасных кінашкол. Зразумела, нечаканы поспех дэбютанткі можна пры жаданні аб’явіць палітычным жэстам з боку журы, што быў прызваны кампенсаваць недахоп рэжысёрак у абедзвюх конкурсных праграмах.
Вялікія надзеі ў асноўным конкурсе ўскладаліся на вопытную Джэсіку Хаўснер з яе антыўтопіяй «Малы Джо». Аўстрыйская рэжысёрка ўпершыню здымала на англійскай мове і мо таму ўсе постаці ў фільме атрымаліся вельмі ненатуральнымі. Канцэпцыя стужкі, у тым ліку візуальная, задушыла магію простага бачання, якой адрозніваюцца папярэднія карціны Хаўснер. Аўтарка спрабуе пазбегнуць празмерных эмацыйных эфектаў, але ў выніку яе стужка атрымалася занадта манатоннай і нецікавай. Як пісалі ў рэцэнзіях, «Малы Джо» атрымаўся нечым падобным да чарговай часткі папулярнага тэлевізійнага серыяла «Чорнае люстэрка» і ніяк не цягне на поўнаметражны фільм, тым больш у асноўнай праграме Канскага фестывалю.
Што тычыцца жаночай тэмы на фэсце, то журы адзначыла французскую аўтарку Селін Ск’яма за лепшы сцэнарый да яе стужкі «Партрэт жанчыны ў агні». У адрозненне ад шматлікіх мужчынскіх поглядаў на адносіны паміж істотамі супрацьлеглага полу, Ск’яма прапанавала жаночы погляд на свет жанчын. «Партрэт жанчыны ў агні» — падкрэслена феміністычны, пачынаючы з прафесіі мастачкі галоўнай гераіні, рэдкай да заяўленага ў сюжэце другой паловы васямнаццатага стагоддзя, заканчваючы непазбежнай у дадзеным выпадку тэмай забароненага кахання. Пазбаўлены нейкіх значных спецэфектаў, фільм Селін Ск’яма прываблівае менавіта сваёй драматургіяй, якая падаецца на першы погляд вельмі простай, але потым здзіўляе сваёй нязмушанай прыгажосцю.
Стужка Ларысы Садзілавай «Аднойчы ў Трубчэўску», што распавядае гісторыю сучаснай Ганны Карэнінай, відавочна спрабуе прыняць да ўвагі адразу абодва пункты гледжання, жаночы і мужчынскі. Плюсы гэтай карціны навідавоку — ясная, дакладная рэжысура, трапныя вобразы сучаснай правінцыйнай Расіі, універсальная гісторыя, зразумелая інтэрнацыянальнай аўдыторыі. Гэты фільм больш за іншыя можна было назваць глядацкім. Нездарма ён выклікаў адно станоўчыя эмоцыі ў аўдыторыі. Так, women’s power відавочна бракавала ў абедзвюх конкурсных праграмах. Прытым што на экране гераіні даўно перастаюць выконваць фармальныя функцыі жонак і сябровак галоўных герояў. Такі сённяшні глядацкі запыт, і кіно яго адлюстроўвае.
Яшчэ адну расійскую стужку ў конкурсе «Асаблівы погляд» можна таксама назваць жаночай, хоць зняў яе мужчына. Для Канцеміра Балагава карціна «Дылда» стала другой у фільмаграфіі і ўжо другім паяўленнем у Канах — якасць і стыль рэжысуры гэтага маладога аўтара нагадвае аб лепшых часах аўтарскага кіно. Балагаў паказаў сябе дастойным паслядоўнікам свайго настаўніка Аляксандра Сакурава, але прадэманстраваўшы свой асабісты аўтарскі стыль. Па словах рэжысёра, пры напісанні сцэнарыя ён чэрпаў натхненне з кнігі Святланы Алексіевіч «У вайны не жаночы твар». Разам з суаўтарам сцэнарыя, вядомым расійскім пісьменнікам Аляксандрам Церахавым, рэжысёр прыдумаў гісторыю чалавечай трагедыі, арыгінальную па форме і ўніверсальную па змесце. У нейкім сэнсе менавіта фільм Балагава можна лічыць галоўным асабістым адкрыццём аўтара гэтых радкоў на Канскім фестывалі. У тым, што ў сусветным кіно з’явіўся новы моцны рэжысёр, няма ніякіх сумненняў.
Прыход новых часоў дэманстраваў пазаконкурсны паказ дзвюх серый телевізійнага фільма «Too Old To Die Young» («Надта стары, каб памерці маладым») Нікаласа Віндынга Рэфна, выхад якога плануецца гэтым летам. Тое, што ўбачыла канская аўдыторыя, — сапраўднае вялікае кіно, па праве вартае сусветнай прэм’еры на вялікім экране. Дацкаму рэжысёру, які працуе ў Галівудзе, як мінімум удалося зняць неажыццёўлены некалі Дэвідам Лінчам серыял «Малхоланд Драйв». Глянцавы нуар пра прыгоды кілера з Лос-Анджэлеса зацягвае неверагоднай кінагеніяй. Інфернальная вываратка сонечнай Каліфорніі насычае глядзельную залу першародным жахам. Здаецца, у Рэфна ўслед за тым жа Лінчам атрымалася прыпадняць заслону над крыніцай абсалютнага зла. Паказ стужкі Рэфна ў Канах стаў выдатнай заяўкай на лепшы серыял года.
Яшчэ аднаму ўлюбёнцу Канаў румыну Карнэліу Парумбою ў які раз удалося намацаць тонкую мяжу, за якой губляецца здаровы сэнс нашай рэальнасці. Яго новы фільм «Гамера» (ён жа «Свістуны») не падобны да ўсёй папярэдняй творчасці рэжысёра, як і да ўсёй так званай «румынскай новай хвалі»: чорная абсурдысцкая камедыя з вельмі заблытаным крымінальным сюжэтам. Зняты ў розных краінах фільм пад завязку забіты алюзіямі і цытатамі з кіна-
класікі і вельмі далёкі ад стылю і ідэалогіі ад іншых фільмаў Канскага конкурсу. Але цудоўна пацвярджае вялікі талент самога Парумбою (які з’яўляецца ў «Гамеры» ў вельмі смешнай ролі-камеа): гранічна простымі выразнымі сродкамі лёгка трымаць увагу гледача на працягу дзвюх гадзін. Пацешнае, лёгкае і сапраўднае кіно.
Нарэшце, эксперыментальны сярэдні метр «Lux Аеterna» («Вечнае святло») француза Гаспара Наэ — радыкальнае прызнанне ў любові да свайго мастацтва рухомага святла. Сорак сем хвілін вар’яцкага мантажу з нейкай умоўнай здымачнай пляцоўкі фільма пра спаленне ведзьмаў, з цітрамі-цытатамі Карла-Тэадора Дрэера, Райнера Вернера Фасбіндэра і Фёдара Дастаеўскага ішло ў Канах па-за конкурсам пад маркай «Начнога прагляду». У вар’яцкім калейдаскопе выбліскаў і агнёў, спрэс проціпаказаным эпілептыкам, з хаосу і мітусні цёмнага кінапавільёна, напаўзразумелай балбатні выканаўцаў (сярод апошніх вылучаецца Шарлота Генсбур) і здымачнай групы нараджаецца нешта чароўнае, прыцягальнае. Гаспар Наэ не шкадуе вочы і эмоцыі гледача, аглушаючы яго мульціэкранам, гукам, святлом, бесперапынным рухам. Калі трэба выбраць фільм-сімвал сёлетняга Канскага кінафоруму, то стужка Гаспара Наэ ідэальна падыходзіць на гэтае месца.
З наступленнем часоў дыгіталізацыі, пераходу кінапракату на лічбавыя тэхналогіі, адмовы ад кінастужкі («Аднойчы ў Галівудзе» ды «Маціяс і Максім» выглядаюць тут, безумоўна, толькі шырокімі аўтарскімі жэстамі) значнасць фестываляў класа «А» як сакральных месцаў сусветнага кінамастацтва імкліва зніжаецца. Калі раней паміж Канскай прэм’ерай, закупкай фільма дыстрыб`ютарамі на тутэйшым кінарынку і выхадам у нацыянальныя кінапракаты праходзілі доўгія месяцы, а то і гады, зараз стужкі, пра якія дае справаздачы фестывальная прэса, з`яўляюцца на вялікім экране праз лічаныя тыдні. Большасць самых гучных прэм`ер гэтага Канскага фестывалю ўжо выходзіць на экраны або рыхтуецца да пракату, і тыя некалькі дзясяткаў тысяч шчасліўцаў, што атрымалі магчымасць убачыць прэм'еры ў канскіх кіназалах, ужо даўно страцілі статус абраных. Але за Канамі, як ні за якім іншым месцам сусветнага кінафестывальнага руху, захоўваецца статус мерапрыемства з арэолам амаль што рэлігійнага культу. Культу са сваімі рытуаламі, сваімі святарамі і паствай. І гэта нездарма: кіно як усялякае мастацтва пакрывае сабой сферу эмацыйнага, ірацыянальнага. Кінематограф не проста так называюць рэлігіяй ХХ стагоддзя — і ў стагоддзі ХХІ прыгожы горад на ўзбярэжжы Міжземнага мора застаецца галоўным месцам паломніцтва адэптаў Дзясятай музы