— Людзі прыходзяць. Людзі адыходзяць. Чалавечы адыход — журботная нагода для згадак, але надта журыцца Генадзь бы не даў, не ўхваліў бы: мы людзі вясёлыя. У 1954 годзе я быў ужо на другім курсе Тэатральна-мастацкага інстытута (цяпер — Беларуская акадэмія мастацтваў. — Заўв. рэд.), а Генадзь прыехаў паступаць, хоць па гадах ён на паўгода старэйшы за мяне. Чаму так? Я ў сорак трэцім пайшоў у школу, але ж усю Беларусь вызвалілі ў сорак чацвёртым. Неяк ён згадаў, што ў першы клас пайшоў, калі адзінаццаць гадоў зраўнялася. Вайна, як нас вучылі, трагічнае і камічнае побач. Ага, гэта як мы — у адной грымёрцы ўсё жыццё. Калі што здаралася (а як жа без здарэнняў?), я жартаваў, а ён пасмейваўся. Што вы ўсе сабе думаеце, ён такі засяроджаны, сур’ёзны? А як жа! Сялянскі герой Васіль (Васіль Дзятлік, класічны герой Івана Мележа, зорная роля Генадзя Гарбука. — Заўв. рэд.) у нацыянальнай трагедыі! Гэта звонку, з выгляду. Як мы, бывала, жартавалі-рагаталі — усё ходарам хадзіла. Генадзь, калі здымаўся ў Францыі, а былі гэта васьмідзясятыя, прывёз сабе французскую бялізну. Зручную, нічога не скажу. Асабліва тое, што па-беларуску называюць «кальсоны». А колер! Вытанчана-ружаваты, пяшчотны (не ведаю, што за матэрыял). Мы абодва тады былі занятыя ў спектаклі — давалі «Характары» (паводле Васіля Шукшына. - Заўв. рэд.), — і Ліля (Лілія Давідовіч, Народная артыстка Беларусі. — Заўв. рэд.) іграла ягоную жонку, мыла бялізну ў тазе такім вялікім, напраўду мыла — і ў вадзе, і мыліла. Ну, мыла, вядома, што рэквізітары давалі, — нейкія белыя салдацкія порткі. Ды Лілі ж усё адно было, што мыць. Я й пажартаваў: паклаў у таз генадзевы навюткія французскія кальсоны. Ліля на сцэне іх мые, выціскае, а потым імі лупцуе мужа — якраз Гарбука, ганяе яго па ўсёй сцэне, публіка задаволеная, а муж мусіць трымаць сур’ёз. І раптам бачыць свой замежны набытак... Ну, ён і смяяўся! Не, не пакрыўдзіўся, але ж мусіў у рэквізітараў прасіць хоць што, каб дадому дайсці, бо зіма на двары, мароз... Сказаў, што сустрэне Аўсяннікава, дык заб’е. Але ж во: не забіў, толькі насмяяўся.
Аднаго разу (было тое ў Пінску, на гастролях, мы ў адным нумары жылі) дае мне рубель і просіць тэрмінова замовіць шкло ў акуляры, мінус тры з паловай: у яго канцэрт дзесьці ў воінскай частцы і трэба да вечара паспець, бо ў спектакль «Грасмейстарскі бал» (паводле п’есы Іллі Штэмлера. — Заўв. рэд.), Гарбук толькі быў уведзены. Ну, жартаваць дык жартаваць, я й замовіў — адно шкло мінус тры, другое — плюс тры. Правізар кажа: маўляў, так не бывае, а я стаю на сваім — гэта для артыста Гарбука з Купалаўскага тэатра, ён дырэктара іграе, гэта рэжысёр прыдумаў, так трэба! Аптэкар Гарбука прыгадаў — у кіно і па тэлевізары бачыў, таму ўзяўся зрабіць. Я тым часам распавёў пра гэта Аўгусту Мілаванаву, ён, вядома, хлопцам, і ў аптэку за маім сябрам пайшла плойма народу. Бярэ ён акуляры, мерае... «Ай, пэўна, гліцэрын на шкле!» Працірае, ізноў мерае... Аптэкар разгублены, прабачце, кажа, таварыш народны артыст, але ж прыходзіў ваш памочнік... Гарбук, вядома, сказаў, што сустрэне Аўсяннікава, дык заб’е. Але ж во: не забіў, увечары ўжо сам смяяўся.
...На пачатку шасцідзясятых Гарбук прыйшоў да нас у Купалаўскі з Віцебску і жыў у мяне, у адным пакоі нашай вялікай камуналкі. А куды яму было падзецца? Але ж і добра было! Як трэба закусіць, дык патэльню прасілі ў жонкі Санькі Бялова (ён працаваў у Рускім тэатры). Трэба кампанію — ідзём да Мілаванава з Талкачовай. Гастраном побач з домам. Няможна было купляць спіртное пасля пэўнага часу, але ж мы на спектаклі, занятыя, таму ідзём позна, размаўляем са знаёмай прадавачкай на мігі. Яна круціць кулёк, у яго — рыль-
цам долу — гарэлку, зверху — вінаграду гронку. Мы — маладыя, занятыя вышэй вушэй: толькі рабі й рабі...
...З леташняга года, з вясны 2016-га, пасля майго інфаркту, мы не ігралі разам. Ён усё пытаўся, калі буду іграць у «Вечары», а мне ўсё няможна было... Шкадую цяпер, што мала працавалі як сцэнічныя партнёры: ён вельмі сумленны ў сваёй справе, ніколі не рыхтуецца насмешыць, якое-небудзь штукарства ўпароць або слязу пусціць, людзей шануе — глядзель-
ню, артыстаў. Аніводнага разу не разыграў мяне, хоць бы ў адказ. Было, Генадзь трохі нашкодзіў. Артысты сцягнулі ў намесніка дырэктара адмысловы бланк і напісалі на ім прапанову з’явіцца да кіраўніцтва тэатра, прызнацца і пакаяцца: маўляў, сур’ёзныя наступствы яго чакаюць! І Гарбук, каб не хадзіць, вырашыў захварэць: балазе зіма, нацягаў тазікам поўную ванну снегу, пусціў халодную ваду, улез сам і далічыў аж да дзвюх тысяч — каб прастудзіцца. І не захварэў. І мусіў ісці выбачацца, чым насмешыў кіраўніцтва. Затое як толькі Гарбук уводзіцца ў спектакль, яго хлопцы стараюцца «раскалоць» — вывесці з раўнавагі да смеху. У «Грасмейстарскім бале» яму трэба было сыграць дырэктара. Тэрміновы ўвод, ролі амаль не ведае. Дык ён раздрукаваў яе і расклаў на дырэктарскім стале: «Заходзьце, Круглы!» Заходзіць Мілаванаў і ціхутка падказвае: «Пасадзі мяне!», а Гарбук яму — «Пастаіш!», а ён: «Ролю здзьму!» — і дзьме! Дзьме так, што аркушыкі са стала... Гарбук: «Сядайце, Круглы, сядайце!» — і кідаецца ролю да кучы збіраць. А з залы ўсё выглядае натуральна, за такое падрабязнае пражыванне артыстам у ладкі плешчуць.
Да роляў мы адно аднаго не падзросцілі. Можа быць, дзесьці глыбока-глыбока нешта шчыміла... Я, бачыш, хацеў усё жыццё сыграць Швейка — нават Андросік (Андрэй Андросік, рэжысёр. —Заўв. рэд.) мне гэта абяцаў. Патрапіў я і ў монаспектаклі — «Цёркіна» ды «Завальню» (монаспектаклі «Васіль Цёркін» Аляксандра Твардоўскага і «Шляхціц Завальня» паводле Яна Баршчэўскага. — Заўв. рэд). Гарбук ніколі не казаў, што хоча, але, мне здавалася, ох як мог бы... Нашы характары ён рабіў як ніхто. І вось асаблівасць! Здымалі пра мяне кіно — да юбілею. Сядзім з Гарбукам у грымёрцы, вакол папаразвешаны нашы сцэнічныя строі — валёнкі, ватоўкі, кажушкі. Сядзім, перамаўляемся ў кадры: маўляў, народныя артысты мусяць быць у фраках, у белых кашулях, у капелюшах, а ў Гарбука — лапці, у мяне — атопкі... І выдавала, быццам мы так шкадуем пра гэта, нават словы падрыхтавалі. А мы нічога не рэпетавалі, мы — жартавалі! Ну, часам і мы ў касцюмчыках выходзілі, як Бобчынскі і Добчынскі ў колішнім «Рэвізоры» (спектакль у пастаноўцы Валерыя Раеўскага. —Заўв. рэд.), а так — насілі рэчы з падбору. Але затое сапраўдныя рэчы! А пра тое, што Гарбук дужа хоча сыграць Рычарда альбо каго падобнага, я ніколі не чуў — і не трэба быў яму той Рычард...