Спектакль рэжысёра Ігара Казакова можна назваць лепшым з мінулай сталічнай навагодняй кампаніі: шчымлівыя зонгі Аляксандра Літвіноўскага, запамінальныя акцёрскія работы разам са шматгранным вобразам Эбэнэзера Скруджа — практычна бенефіснай роляй Аляксандра Васько, кранальная праца мастачкі Таццяны Нерсісян. Праз шматслойныя туманы заслонаў, праз адметна закручаную завіруху з жывых планаў і лялек усіх магчымых сістэм рэжысёр і мастак склалі прыпавесць для шчырай сямейнай размовы пра мэту, дзеля якой чалавек жыве, і пра вартасць тых крокаў, якімі ён спрабуе гэтай мэты дасягнуць.
Набіраючы абароты, год пабег ад прэм’еры да прэм’еры, запамінаючыся настроем прадстаўнікоў новай плыні, якія мо не заўсёды дакладна і без хібаў, але шчыра і палка імкнуцца асэнсаваць тое, што адбываецца з нашым грамадствам тут і цяпер. Так з’явілася ў РТБД пастаноўка Кацярыны Аверкавай «Сіндром Медэі», якая дыягнаставала маральную хваробу інтэрнэт-супольнасцей, у мемарыяльным музеі-майстэрні Заіра Азгура — дакументальны спектакль «Anti[gone]» Аляксандра Марчанкі, у Маладзёжным тэатры «Ці свяшчэнная вясна...» — балет-пераасэнсаванне Вольгі Скварцовай. Тэатр лялек разжыўся на сапраўдны глядацкі блакбастар «Пансіён «Belvedere”»: спектакль-імправізацыю, што супольна складалі італьянскі рэжысёр Матэа Сп’яцы і нашы артысты (з вясны на яго разлятаюцца не толькі квіткі ў касе, але і месцы для тэатральнай талакі на банкетках).
Лялечнікі не ўзводзяць на сцэне макеты падводных лодак у рэальным памеры, не ладзяць маштабныя касцюмаваныя праменады і бітвы з механізаваным драконам. Адметныя спектаклі нараджаюцца з дакладнасці візуальных рашэнняў у памкненні спазнаць чалавечую існасць: такія як «Сіняя-сіняя» Магілёўскага абласнога тэатра лялек (ізноў зладжаны тандэм Казакоў-Нерсісян!) — монаспектакль па форме, эпічнае палатно па сутнасці.
Самым моцным уражаннем года сталася візуальная паэзія «Бетон» Яўгена Карняга ў РТБД. Звычайна я пазбягаю вызначэння «бездакорна», але менавіта яно адлюстроўвае ўзровень надзвычай складанай рэжысёрскай канцэпцыі пластычнай пастаноўкі — паводле задумы, акцёрскай тэхнікі, мастацкага ўвасаблення. Трэцяя ў маім аглядзе праца Таццяны Нерсісян чарговы раз пацвердзіла, што нават аднастайнасць шэрай роўнядзі сцяны-задніка можа даць падставу творцу да безлічы метафар, якія дапамагаюць рэжысёру заглыбіцца ў жорсткую размову пра вызначальныя пачуцці чалавека.
Настасся ПАНКРАТАВА