Што расчаравала?
1. Сціплыя прэм’еры, непрыкметныя «сенсацыі», рэдкія «перамогі». Адсюль і тэндэнцыя зніжэння цікавасці з боку гледачоў. Іх стала менш у параўнанні з папярэднім годам. Гэта трывожны званочак не толькі тэатральным адміністратарам, але і ўсёй нашай грамадзе.
2. Працягнуўся працэс «здрабнення» некаторых тэатральных фэстаў («М.@.rt.кантакт», «Белая вежа»). Адна з галоўных прычын — брак конкурсных праграм, якія раней стваралі адметную драматургію падзеі, нараджалі цікавасць прафесіяналаў і гледачоў. Цяпер — звычайнае свята для горада (таксама патрэбная справа!), але статус міжнароднага фестывалю вымагае значна буйнейшых мэтаў і задач.
3. Расчараваў чарговы справаздачна-выбарчы з’езд Беларускага саюза тэатральных дзеячаў. З’езд, на які з 758 членаў БСТД было абрана аж цэлых 25 дэлегатаў (у лік гэтых «выбранцаў лёсу» трапіў і я), у чарговы раз засведчыў, што беларуская тэатральная супольнасць (менавіта як адзіная і аўтарытэтная!) ужо другое дзесяцігоддзе фактычна адсутнічае ў культурнай прасторы нашай краіны.
Што абнадзеіла?
4. Даволі высокі конкурс падчас прыёмнай кампаніі на тэатральны факультэт Беларускай дзяржаўнай акадэміі мастацтваў. Пакуль новыя Трэплевы ўсё яшчэ ўпарта імкнуцца прафесійна займацца тэатральнай дзейнасцю (хоць сацыяльны статус творцы ў наш наскрозь прагматычны час упаў «ніжэй за плінтус»), гэта нараджае пэўны аптымістычны погляд на будучыню беларускага сцэнічнага мастацтва.
5. Колькі новых пастановак у сталічных тэатрах выклікалі прафесійную цікавасць: «Ваўкі і авечкі» Аляксандра Астроўскага ў Тэатры-студыі кінаакцёра, «Падводнікі» Андрэя Курэйчыка ў Нацыянальным акадэмічным тэатры імя М.Горкага, «Сіндром Медэі» Юліі Чарняўскай у Рэспубліканскім тэатры беларускай драматургіі. Абнадзейваюць і творчыя высілкі так званага праектнага тэатра, дзе актыўна і часам плённа шчыруюць маладыя драматургі, рэжысёры, акцёры, крытыкі, менеджары, прадзюсары.
6. Прыкметнай з’явай года стала правядзенне ў Бабруйску чарговага VI Рэспубліканскага фестывалю нацыянальнай драматургіі імя Вінцэнта Дуніна-Марцінкевіча. Насычаная праграма фэсту засведчыла, што сучасная нацыянальная драматургія не проста жыве, але і досыць паспяхова развіваецца. А новы спектакль рэжысёркі Таццяны Траяновіч па п’есе Дзмітрыя Багаслаўскага «Кропкі на часавай восі», які быў пастаўлены на сцэне Магілёўскага абласнога тэатра драмы і камедыі імя Вінцэнта Дуніна-Марцінкевіча, заслужана стаў абсалютным пераможцам у гэтым аўтарытэтным творчым спаборніцтве.
7. У чэрвені 2017 года прайшло пасяджэнне калегіі Міністэрства культуры Рэспублікі Беларусь, на якім досыць грунтоўна і зацікаўлена абмеркавалі разнастайныя праблемы развіцця сучаснага тэатральнага мастацтва.
Вельмі хочацца спадзявацца, што рашэнні калегіі будуць паслядоўна ажыццяўляцца ўсімі ўдзельнікамі тэатральнага жыцця на карысць беларускай нацыянальнай культуры, грамадства і дзяржавы.
Рычард СМОЛЬСКІ