Яго куратарскі праект «Стол» пры ўсёй жанравай разнастайнасці (татальная інсталяцыя, відэа-арт, аб’ект) выяўляе спробу дэзарыентаваць гледача, вывесці яго з камфортнага стану сузірання твора мастацтва, прымусіць прачытваць аўтарскі мэсэдж і актыўна саўдзельнічаць у прадуцыраванні сэнсаў, сутыкнуцца з кодамі і сэнсавымі дамінантамі, зашыфраванымі ў кадрах відэа-арту. Абавязковая ўмова ўспрымання выставы — счытванне гэтых візуальных вобразаў, што ўзнікаюць за бясконца доўгім сталом на экране. Вобразы як характэрныя маскі — вось тая прастора, якую ў гэтым праекце стварае сам аўтар.
Часта мастак пазбаўлены магчымасці камунікаваць з гледачом напрамкі. Пафас у любой форме не прымаецца сучасным мастацтвам. Праект Рамана Заслонава «Стол» стаў аднамомантавай спробай схаваць за складанай інтэрпрэтацыяй асобасна-сэнсавыя ўяўленні і пры гэтым усё ж дастукацца да гледача, заявіць яму пра сваё ego. Праект, з аднаго боку, вывучае прыватную прастору, фіксуючы спосаб яе даследавання, а з другога — пераасэнсоўвае праз мастацкі вобраз. У ім шмат суб’ектыўнага, творчага бачання.
Галоўны складальнік праекта — відэа, якое падаецца асобнымі міні-сцэнамі, іх можна было б звычайна пазіцыянаваць як набор класічных жывапісных карцін, увасобленых на экране тонкай ігрой вядомых беларускіх акцёраў. І гэта адсылае да звыклага для нас творчага крэда самога Заслонава — майстра сюжэтна-тэматычнай карціны.
Але традыцыйны фармат агрэсіўна змяняецца самім Заслонавым, які на першы план выводзіць вобраз стала і робіць яго дамінуючым у кожным кадры. Менавіта стол, дакучліва маштабны, просты па форме і колеравым рашэнні, абсалютна бытавы прадмет, пастаянна адцягвае ўвагу гледача ад сюжэтных сцэн. Ён упарта дыктуе вострае адчуванне: бессэнсоўна ўнікаць у прачытанне кожнага з асобных кадраў, іх трэба ўспрымаць як метафару.
Стол — цалкам функцыянальны прадмет — у фільме пазбаўляецца ўсялякай магчымасці практычнага прымянення, ператвараючыся ў сімвал дысфункцыі мастацтва як самога па сабе. Але пры гэтым бясконцы стол дае эфект нераскрытай таямніцы твора, які схаваў ад гледача працэс свайго з’яўлення на свет, роўна як і любыя іншыя сэнсавыя імплікацыі.
Раман Заслонаў: «Гэта самы шчаслівы і супярэчлівы перыяд працы над праектам. І аднойчы сказанае ці напісанае табой слова “стол” пачынае драбіцца і памнажацца ў розных і зноў-такі асобасных інтэрпрэтацыях спачатку людзей, што працуюць непасрэдна над рэалізацыяй праекта, а потым і ў рэакцыі гледачоў, якая ў адказ павялічваецца ў геаметрычнай прагрэсіі.
Што ўбачыць і што прачытае глядач?
Дзесяцігоддзямі адпаліраваную дакрананнямі чалавека гладкую драўляную паверхню?
Павольны рух дзіўных людзей з розных часоў і кантэкстаў, якія праплываюць і змяняюць адзін аднаго?
Несумяшчальную супараўнальнасць прадметаў і аб’ектаў і іх немаштабную сувымернасць?
А можа быць, ён на імгненне адчуе, што сам рухаецца. Напрыклад, плыве на караблі, і ў вакне яго каюты змяняюцца адзін за адным знаёмыя і доўгачаканыя або чужыя і абыякавыя, але заўсёды жывыя вобразы».
Куратар праекта выкарыстоўвае прыём татальнай інсталяцыі, які ўключае ў сябе візуальны відэашэраг і прадметны рад, што выходзіць у прастору павільёна. Ён прымушае гледача сесці за стол і глядзець на стол — дамінанту на экране. А затым, атрымаўшы асалоду ад вобразных асацыяцый, сутыкнуцца з мінімалістычнай арт-інсталяцыяй.
Пясочны гадзіннік, форма якога толькі ўгадваецца па масе міні-прадметаў, што перасыпаюцца, прымушае гледача спыніцца перад візуальнай закончанасцю дадзенага аб’екта, проціпастаўленага бясконцай працягласці відэашэрагу. Рамана Заслонава перш за ўсё цікавіць унутраная кантраверза фармальнага арт-аб’екта, які балансуе паміж маўклівай самадастатковасцю, з аднаго боку, і здольнасцю ставіць праблемныя (філасофскія) пытанні — з другога.
Ці з’яўляецца ў цэлым праект Заслонава «герметычным» і самадастатковым або ўсё ж такі толькі імітуе гэтыя якасці? Хутчэй, ён мае скрытыя маркеры гэтай імітацыі, «шчыліны» для гледача. Іншымі словамі, праект самой сваёй структурай адсылае да кантэкстаў уласнага стварэння, успрымання і інтэрпрэтацыі, прымушае рэфлексаваць, гэта значыць набывае статус прадукту шматузроўневай сістэмы сучаснага мастацтва.
Наталля Шаранговіч