У кожным разе не важна, што выйшла з-пад пэндзля — нацюрморт, партрэт або тэматычная карціна. У яе працах суцішваецца хада часу, а вобразы фармуе сузіранне мастачкі сябе ў прасторы адвечных ісцін і высокіх прыярытэтаў. Такіх як праўда жыцця, хараство прыроды, веліч мацярынства. Пабытовая мітусня, бег жыццёвых падзеяў, катаклізмы сучаснасці — усё застаецца «па-за кадрам», калі яна сам-насам з пэндзлямі і фарбамі ў цішы майстэрні, у славутым «слупку дома мастакоў» на вуліцы Сурганава ў Мінску. У гэтай майстэрні працуе ўся дынастыя — Даша, Кацярына, іх тата Васіль Фёдаравіч Сумараў, кожны ў свой час або дзень тыдня. Так вырашылі разам, каб не замінаць адно аднаму. Прастора тут «намоленая»... Бацька сямейства, праўда, большасць часу працуе на пленэры, на лецішчы ў Астрашыцкім Гарадку, дзе базуюцца летнія рэзідэнцыі многіх беларускіх аўтараў. Дый сама Дар’я бавіць там з сям’ёй кожнае лета. Гэта яе «залаты» час, бо, як яна сцвярджае, без натуры няма натхнення. Асцярожна запытваю: «А як вы будуеце стасункі з бацькам-мастаком?» У адказ чую, што без татавых парадаў амаль не абыходзіцца, але пераважна тады, калі карціна ўжо завершаная. Васіль Фёдаравіч хваліць кожны чарговы твор дачкі і пры гэтым не забывае дадаць: «Наступная карціна будзе лепшай». Адносіны, такім чынам, застаюцца педагагічнымі.
Калі сёстры Дар’я і Каця былі зусім малымі, іх уводзінамі ў творчасць займалася мама. Атрымаўшы пляц пад лецішча, сям’я марудна займалася яго ўпарадкаваннем. «Тата на працы, а мы з малымі дочкамі шыбуем у лес, у поле, на рэчку... Збіраем зёлкі, робім букеты, што нават высахлымі, ужо ўзімку, цешылі вока, упрыгожвалі сямейнае жытло, — кажа Наталля Іванаўна Сумарава. — Дзяўчаты выраслі на прыродзе. Старэйшая Дар’я ў дзіцячых гульнях і занятках заўсёды была лідарам, малодшая Каця цягнулася за ёй, імкнулася не саступаць. Гэтак і ў маляванні, да якога малымі яны далучыліся натуральна, без татавага ўплыву, бо той увесь час быў моцна заняты ў славутай студыі, што стварыў у Мінску пры Палацы культуры на Камвольным камбінаце. У ёй, як вядома, Сумараў выгадаваў не адно пакаленне цяпер вядомых беларускіх мастакоў. Каця і Даша вызначаліся працавітасцю і ўлюбёнасцю ў маляванне. Калі ж я ўбачыла, што ў іх “прарэзваецца” штосьці насамрэч па-мастацку вартаснае, узяла маленькіх за ручкі і павяла да бацькі ў яго студыю». Васіль Фёдаравіч ухваліў пачатковыя мастацкія опусы і стаў сур’ёзна займацца творчым выхаваннем дачок. Прымушаць да працы не было патрэбы, дастаткова разумна і паслядоўна скіроўваць творчы імпэт. У выніку Дар’я і Кацярына былі добра падрыхтаваныя для паступлення спачатку ў каледж мастацтваў імя Ахрэмчыка, далей — у Беларускую дзяржаўную акадэмію мастацтваў.
На заканчэнне каледжа Дар’я напісала дыпломную карціну «Малітва». Гэта даволі складаная, шматфігурная кампазіцыя-сюжэт храмавай малітвы. «Усё проста, — тлумачыць Даша, — заўсёды лічыла і лічу сябе верніцай, таксама як і мой муж, Віктар Копач. Мы венчаныя. Усе нашы трое дзяцей наведвалі нядзельную школку».
Пачатак творчай дзейнасці Дар’і звязаны з пошукамі ў тэматычнай карціне і партрэтным мастацтве. Яна аўтарка шэрагу тэматычных кампазіцый. Гэта «Легенда» — дзе, апрача адметнага сюжэта ўкленчанага ў малітве Хрыста, уражвае фантасмагарычнае начное асвятленне ўсёй прасторы, падобна да месяцовых маляванак з замкамі Язэпа Драздовіча. Поўнае сімволікі палатно «Пераход» і карціна пра самотнага вандроўніка —«Шлях» (1998), дзе адчувальныя ці то фізічныя, ці метафізічныя станы-пераходы чалавека з цемры ў святло і наадварот...
Дар’я яскрава праяўляла і талент партрэтысткі. Адзін за адным мастачка стварае шматлікія жывапісныя партрэты і віртуозныя, самадастатковыя па індывідуальна-характарнай мастацкай вартасці партрэтныя малюнкі. Алоўкавы партрэт матчынай сястры поўны ўнутранай дынамікі і напругі. Не менш выразны партрэт сябра сям’і Сумаравых, беларускага мастака старэйшага пакалення Кіма Шастоўскага. Гэта вобраз чалавека з моцным характарам і лірычным ладам мыслення.
Разнастайныя мастацкія пошукі відавочна былі набліжэннем да тэмы жанчыны, жанчыны-маці. Распачалася гэтая лінія сюжэтамі пра каханне напачатку 2000-х. «Ліст» — паўнавартасная тэматычная кампазіцыя, дзе колеравыя кантрасты ствараюць дух таямнічасці, дзе рамантызаваная постаць дзяўчыны ў прыгожай даўгой сукенцы — бы прывід з цудоўнай казкі. З іншых вядомых прац гэтага кірунку высокім магнетызмам надзелена жывапісная кампазіцыя «Светлая раніца». Гэта своеасаблівы аўтапартрэт мастачкі, поўны хараства ўражанняў і эмоцый. Насычана ўнутраным свячэннем тэматычная карціна «Светлы дзень». Там, дзе аповед пра дзяцей і пачуцці мацярынства, у мастачкі — усё толькі светлае, толькі цёплае, толькі радаснае. І яно такое натуральнае і ўсеаб’ёмнае, нібы гэта і не рукатворны сюжэт Дар’і Сумаравай-Копач, а карцінка з жыцця. Падобнае ўражанне я адчувала, калі першы раз пабачыла «Махі на балконе» Гоі. Яна экспанавалася адна ў невялікай выставачнай зале і праменіла незвычайнае святло і вібрацыю колераў.
Дар’я — мастачка вядомая ў краіне, правяла шэраг персанальных выстаў, удзельнічала ў міжнародных пленэрах, аднак творчая грамада ўспрымае яе пераважна як майстрыню кветкавага нацюрморта. Спрабую знайсці адказ...
Мастачцы-кветачніцы — збольшага так можна характарызаваць наробак Дар’і Сумаравай-Копач апошняга дзясятку год — складана быць арыгінальнай і займець уласны твар. Як гэта ёй удаецца, ды не толькі ў кантэксце творчасці маладога пакалення краіны, але і ў асяродку класікаў айчыннага жывапісу ХХ — пачатку ХХІ стагоддзяў, пытанне не з простых. Кветкавыя нацюрморты Дар’і выразна адрозніваюцца ад прэзентатыўна-этнічных нацюрмортаў Уладзіміра Хадаровіча, элегантных свецкіх букетаў Леаніда Шчамялёва, імпрэсіяністычных кампазіцый Марыі Ісаёнак, урачыста-велічных кветак Святланы Катковай, этнасацыяльных пастановак Уладзіміра Кожуха — прыклады стылістычных і сэнсава-тэматычных адрозненняў можна прыводзіць да бясконцасці, усе яны маюць відавочныя адметнасці гэтых несупадзенняў. Пэўнае сугучча можна ўбачыць з кветкавымі букетамі маладзечанскай мастачкі мінулага стагоддзя Ядвігі Радзялоўскай. Тая ж узрушаная пранікнёнасць вобразамі, вытанчаная паэзія каларыстыкі і кампазіцыйна-плямавых вырашэнняў і... прысутнасць неспасцігальнага арыстакратызму ў інтэрпрэтацыях простага. Пры гэтым «кветкавыя сусветы» абедзвюх мастачак блізкія ў першую чаргу духоўна. Мабыць, пэўным абагаўленнем свету прыроды, далікатнасцю дотыкаў і пранікнення ў яго, высокай унутрана-спружыннай энергетыкай пачуцця, выказанага яскрава-індывідуальна ў кожнай кампазіцыі. А яшчэ неверагоднай тонкасцю і культурай жывапісу.
«Я вельмі люблю кветкі, — распавядае Дар’я, — з асалодай іх збіраю ў букеты, потым з задавальненнем пішу. Асабліва — валошкі. Мне здаецца, кветкі любіць кожная жанчына. Для мяне ж гэта самакаштоўная з’ява прыроды. Да таго ж кветачны свет натхняе на творчасць і моцна ўздымае настрой». Даша даткліва падзяляе іх па відах: «Палявыя кветкі больш пяшчотныя і існуюць як бы самі ў сабе, у сваім унутраным сусвеце. Таму яны болей безабаронныя. Садовыя ж — урачыстыя, прэзентабельныя, эфектныя. У гэтым іх асабовая прывабнасць. Але яны як бы выхваляюцца сваім хараством, і гэта таксама адметнасць». Упадабаць тыя ці іншыя кветкі для чарговага нацюрморта — толькі малая частка працы над карцінай. Больш складана скласці адмысловую, арыгінальную букетную кампазіцыю. Нярэдка да яе далучаюцца сямейныя — маці, сястра, тата. Усе з радасцю, а з найбольшым імпэтам Васіль Фёдаравіч, бо ён у гэтым надзвычайны майстар. Нібыта мастачцы прапануецца на новым эмацыйным узроўні спазнаць і засвоіць чарговы ўрок хараства. Тут трэба быць асцярожным і акуратным, каб не парушыць таямніцу і гармонію энергіі колераў, вытанчанай пластыкі ліній у іх спляценнях і ўзаемаспалучэннях.
Як ні дзіўна, настраёвасцю, фабулай выяўленчай мовы кветачныя сюжэты ў творчасці Дар’і даволі разнастайныя. Ёсць колерава шчыльныя, энергетычныя — з яскрава выражанымі дэкаратыўнымі тэндэнцыямі жывапісу: «Карагод» (2004), «Бэз. Вясна» (2013), «Кветкі лета» (2008), «Півоні» (2013), «Святочны настрой» (2013), «Калейдаскоп» (2013), «Лілеі» (2013), «Летні настрой» (2013), «Верасень» (2013), «Бэз» (2013). Заўсёды гэта нацюрморты з садовых кветак. І тут прыгадваю, як мастачка казала, што кветкі самі «дыктуюць», як іх пісаць, як расстаўляць па букетах. І паводле Дашынай характарыстыцы садовага хараства, гэтым прадстаўніцам прыроды болей уласціва самалюбаванне і выхваленне сваёй выразнай прыгажосцю. Адсюль і фарбы — яркія, зычныя — такія, што адразу завалодваюць прасторай. Але ніколі і ў гэтым шэрагу карцін не сустрэнем стракатасці і збянтэжанай кампазіцыі ды пластыкі мовы. Як заўсёды ў творчасці мастачкі, тут пануе элегантная колеравая прамова, крыху прыглушаная, не выстаўленая паперадзе пачуццёвасці, самадастатковасці. Сярод адметных прац карціна «Antik» (2013). Тэма шэдэўраў антычнасці — культавая ў мастацтве Сумаравых. Яе штудзіравалі, ёю захапляліся, ад яе адштурхоўваліся ў творчых пошуках. Не прамінула гэтага шляху і Дар’я. Яе праца вытанчана і ненавязліва адсылае нас да ўзораў антычнасці, што выступаюць мілагучным фонам для матываў рэальнасці, настрояў сённяшняга дня ў вобразах лазы вінаграду і букеціка сонечна-яскравых кветак у бакале. Мастачка прапануе гледачу своеасаблівую прытчу пра праўду і ўрокі жыцця, пра адвечныя ісціны. Калі ўглядзецца, мы заўважым на першым плане разгорнутую кнігу. Яна нібы і непрыкметная, не кідаецца ў вочы. Тым не менш яе прысутнасць пра многае сведчыць. Мы пачынаем разумець, што на яе старонках тэксты пра антычнасць, пра велізарныя здабыткі вялікай культуры, на грунце якой паўстала цывілізацыя. Кавалак барэльефа антычнай пластыкі на заднім плане кампазіцыі — нібы сон з далёкай мінуўшчыны. Нават сімвалічная галінка вінаграднай лазы, што перасякае кампазіцыю па дыяганалі, не мае сапраўднай энергіі. Толькі пырскі колераў кветак у бакале побач, яркія і жыццядайныя, сведчаць: жыццё працягваецца.
Іншая «размова колераў» — у сюжэтах з палявымі краскамі. Там паўсюдна пяшчота, аповед пра чароўнасць — тое, чаго не спазнаць розумам, толькі сэрцам... Тонкая і мудрагелістая вібрацыя стромкіх ліній і сонечна-зіхатлівых памкненняў святла і колераў, якія блізкія рухам шчымлівых, часта ледзь улоўных лірычных настрояў чалавечай душы... Гэта працы нядаўняга часу: «Чэрвень», «Нацюрморт з грыбамі і слімакамі», «Кветкі», «Першыя кветкі», «Валошкі», «Летняя мальва», «Рахманыя кветкі». Краскі з карцін Дар’і ўвасабляюць шырыню яе духоўных памкненняў. У каралеўстве іх чараўніцтва ёй вольна дыхаецца і добра самапачуваецца. З гэтых палотнаў праменіцца асабістая філасофія жыцця. Улюбёныя валошкі пранізлівай зычнасцю сінечы ўзбагачаюць колеравую музыку багатых букетаў, расстаўляюць акцэнты, прыўносяць нотку аптымізму. Яны самадастаткова і паўнавартасна існуюць і ў індывідуальных букетах, дзе нагадваюць выбух захаплення і пяшчоты адначасна. Не аднойчы мастачка паўтарала гэты сюжэт, які ў пэўным сэнсе можна назваць сімвалам яе душы або творчым брэндам адной з яскравых прадстаўніц дынастыі Сумаравых — Дар’і Сумаравай-Копач.
Лёгка заўважыць, што многія творы, нацюрморты ці краявіды мастачка пазначае порамі года. Кастрычнік, верасень, чэрвень... Верагодна, у гэтай форме мастацкага самавыяўлення Даша найболей набліжана адлюстроўвае тонкія вібрацыі каларытаў сезонных станаў прыроды. Асцярожныя, чуллівыя назіранні за іх перападамі, пералівамі, пераходамі ўвасабляюцца на палотнах «Над возерам», «Поўня», «Кастрычнік», «Першая зеляніна», «Вясна ў Лошыцкім парку», «Кастрычнік». Колерава-пластычныя ўвасабленні выразныя, адметныя, характарныя. Хто яшчэ ў мастацтве Беларусі гэтак уважліва і адметна люстраваў пераходы прыроды? Канешне ж, класік Бялыніцкі-Біруля. Тут яму няма роўных. Віталь Цвірка — маэстра жывапісу мог увасобіць і непаўторную каларыстыку таго ці іншага рэгіёна краіны. У гэты пачэсны шэраг каларыстаў становіцца і Дар’я. Краявідныя працы не самая вялікая дзялянка яе мастацкай дзейнасці, але вельмі перспектыўная.
Краявід, нацюрморт, партрэт, тэматычны твор — паўсюль самавыяўленне праз перажытае і адчутае, узятае непасрэдна з жыцця і прыроды, у якой вырасла, з якой увабрала ў свядомасць касмагонію беларуса, блізкую творчасці славутай інсітніцы Алене Кіш. Дар’я даўно адкрыла для сябе феномен гэтай народнай мастачкі і зачаравалася ёю на ўсё жыццё, а ў 1996 годзе напісала карціну «Прысвячэнне Алене Кіш». Сціплая па памерах кампазіцыя дзіўным чынам сублімавала ў сабе міфалагему жыцця і творчасці народнай майстрыні. На тыя часы яшчэ зусім юная Даша Сумарава распазнала ўнікальную формулу майстэрства сваёй гераіні і сама, праз вернасць Боскаму Пакліканню, падоўжыла няпросты шлях, поўны шчырасці і адкрытасці.
Таццяна МАРКАВЕЦ-ГАРАНСКАЯ