У памяці засталіся ўражанні ад многіх спектакляў з яе ўдзелам. Напрыклад, ад «Трубадура»: яго трупа паказвала напярэдадні гастрольнай вандроўкі ў Тайланд. Склаўся бліскучы, неверагодны ансамбль выканаўцаў — Таццяна Траццяк (Леанора), Сяргей Франкоўскі (Манрыка), Уладзімір Пятроў (дзі Луна), Наталля Акініна (Азучэна). Памятаю пра паспяховыя гастролі Таццяны ці не па ўсёй Еўропе. У якасці запрошанай салісткі сімфанічных аркестраў, шкада, што не беларускіх, а расійскіх. Нашаму лірыка-каларатурнаму сапрана апладзіравалі слухачы самых шыкоўных і прэстыжных пляцовак — Залы каталонскай музыкі і тэатра «Лісэа» ў Барселоне, Музікферайн у Вене.
А якое дачыненне мае Траццяк да юбілею струннага квінтэта «Серэнада»? Самае непасрэднае. Там яна — мастацкая кіраўніца і асноўная салістка. У дадатак аўтарка пералажэнняў менавіта для такога складу выканаўцаў. Увогуле ідэя калектыву, які мае ўласныя інструментальныя праграмы, аднак і выступае разам з вакалісткай, прадуктыўная і плённая. Але, думаю, нарадзілася яна і таму, што Таццяна не надта запатрабаваная на сцэне роднага тэатра. Гэтая неадпаведнасць шматграннага таленту і ступені грамадскага прызнання больш за ўсё і засмучае ў лёсе артысткі.
Ды вернемся да тэмы. У канцэртнай зале «Верхні горад» квінтэт «Серэнада» паказаў праграму, прысвечаную свайму 10-годдзю. Скептык усміхнецца: ці ж гэта юбілей?! Запярэчу: так, юбілей. І падзея. Бо мы маем справу з выканаўцамі надзвычай высокага ўзроўню (калектыў складаецца з артыстаў аркестра Опернага тэатра; скрыпка — Генрых Мацкевіч і Аляксей Ахотнікаў, альт — Сяргей Траццяк, віяланчэль — Аляксей Окунеў, кантрабас — Аляксандр Кандраценка).
Скажу адразу: з безлічы канцэртаў, якія слухаю на працягу сезона — для ўласнага задавальнення або жадаючы адлюстраваць самае цікавае на старонках часопіса, — гэты атрымаўся ці не самы вытанчаны і свежы па сваёй праграме (бо няма твораў, чутых безліч разоў — да аскомы), ці не самы энергетычна ёмісты. Дзве з паловай гадзіны асалоды ад прыгажосці гуку. Ад зіхацення ўзнёслых і рамантычных эмоцый. Ад усведамлення, што жыццё — гэта найперш свята і радасць! А потым усё астатняе.
Калі праграма пабудавана з густам, а выкананню ўласціва выключнае майстэрства, дык у межах аднаго музычнага праекта рэальна сумяшчаць розныя жанры, стылі, эпохі. Ад старадаўняга раманса да аперэты, ад класічных арый да джаза. Тут дыяпазон быў такі: ад Пучыні да Пуленка, ад Кальмана да Манчыні. Самымі шыкоўнымі нумарамі сталіся, на маю думку, магутная «Бразільская бахіяна» Віла-Лобаса ў выкананні Траццяк; інструментальная загадкава-таямнічая «Баркарола» з «Казак Гофмана» Афенбаха; «Белыя ночы» Ісака Шварца ў інтэрпрэтацыі квінтэта і піяністкі Таццяны Старчанка; «Strangers in the Night», хіт Фрэнка Сінатры, увасоблены барытонам Уладзімірам Пятровым.
Беларуская рэальнасць натхняе далёка не заўсёды. Што да мяне, дык часцей прыгнятае. Таму асаблівую каштоўнасць маюць праекты, здатныя стварыць дасканалую, бадай ідэальную гукавую прастору. Яны натхняюць — паглыбляючы ў акіян музыкі. І тады лёгка дыхаць, марыць, акрэсліваць планы. Самыя вартыя музычныя праграмы — тыя, што прымушаюць думаць над глабальнымі, філасофскімі пытаннямі. Прыгнечанасць і «дэпрэсняк» узнікаюць, відаць, і тады, калі не хапае моцных і нечаканых слыхавых і візуальных уражанняў. «Серэнада» нібыта пераконвае: пакутуе той, хто прыціснуты дробнымі клопатамі, шчаслівы той, хто здольны да творчага палёту.
...Юбілейная праграма скончылася, я выйшла з залы «Верхні горад». На прыступках спыніліся тры слухачкі немаладога веку. Відавочна, ім не хацелася разыходзіцца.
— Дзеля такіх канцэртаў і варта жыць! — рэзюмавала адна.
І што можна дадаць? У гэтых словах — ці не лепшая ацэнка выступлення квінтэта і яго зорнай салісткі.