Кожная кампазіцыя, якая прагучала на вечары «З вамі я не ў адзіноце...», уяўляе нейкую незвычайную знаходку, эксперымент, ноу-хау, увасабляе непаўторную старонку музычнага наробку Уладзіміра Кур’яна.
Першае аддзяленне праграмы складалася з камерных твораў, у якіх кампазітар паўстае перад слухачом эксперыментатарам і дэманструе прыхільнасць да інструментальнага тэатра, бо ягоныя опусы не толькі «чутныя», але і «бачныя» (невыпадкова Уладзімір Мітрафанавіч больш за 30 гадоў загадвае музычнай часткай у тэатры імя Янкі Купалы). Кур’ян падкрэслівае: «Мяне заўсёды прыцягвала яркая вобразнасць, а больш канкрэтна — праграмнасць сачыненняў... Інструментальны тэатр — гэта перш за ўсё эксперымент, гэта тэатр тэмбраў, тэатр выканаўцаў, у якім кожны інструмент паўcтае ў ролі героя і раскрывае прыхаваны сюжэт, закладзены ў аўтарскай партытуры».
Уладзімір Кур’ян менавіта цымбальны кампазітар, хоць ён працуе ва ўсіх жанрах, уключаючы оперу. Замежнае прызнанне атрымала ягонае цымбальнае «Канцэрціна», што прагучала на класічным «Еўрабачанні» ў Вене чатыры гады таму, а творы для ансамбляў цымбалістаў і іншых народных інструментаў займаюць вядучае месца ў рэпертуары беларускіх выканаўцаў. Але на аўтарскім вечары ў першым аддзяленні цымбалы нават не з’явіліся. Перадусім вельмі выразна і яскрава гучалі тэмбры іншых інструментаў.
Дыялог са слухачом пачаўся з цыкла п’ес «Жартоўны тыдзень» для чытальніка, брас-квінтэта і ўдарных. Драматургія вызначана праграмным зместам: гумарыстычная, эмацыйна-каларыстычная характарыстыка кожнага дня тыдня. У ролі чытальніка выступіў аўтар, які настройваў публіку арыгінальнымі замалёўкамі, уласнымі гумарыстычнымі эпіграфамі. Такі блізкі кантакт кампазітара са слухачамі расквеціў творчую атмасферу. Новую версію опуса Уладзімір Кур’ян зрабіў менавіта для ансамбля салістаў «AMADIS-BRASS» (Дзмітрый Гарабачук — труба, Аляксандр Антановіч — труба, Андрэй Міхалевіч — трамбон, Павел Кунц — валторна, Віктар Ярыноўскі — туба і Міхаіл Канстанцінаў — ударныя), яны разыгралі на сцэне сапраўды інструментальны спектакль, дзе хапала дзейных асоб.
Гульня, эксперымент, інтрыга — галоўныя рысы музычнага партрэта Кур’яна. У канцэртнай п’есе «Трыумфальнае arco і трыумфальнае pizzicato» для кантрабаса сола, якая стала пераможцай на конкурсе Беларускага саюза кампазітараў, мы пабачылі тэатральнае прадстаўленне, калі выканаўца і яго інструмент — гэта дзейныя асобы спектакля. Ігра на інструменце спалучаецца з пазначаным кампазітарам сцэнарыем паводзін на сцэне: напрыклад, сапраўдная размова героя з жанчынай, дзе кантрабас — жанчына, а выканаўца — мужчына. Ягоны маналог выразна прагучаў ва ўвасабленні таленавітага маладога музыканта Эрыка Арлова, артыста аркестра Купалаўскага тэатра.
Здзіўляцца і здзіўляць! Такое творчае крэда кампазітара — аматара сюрпрызаў. У яго ўласны погляд на жыццё — погляд з добразычлівай іроніяй, гумарыстычны. Гэта пацвярджае «Залатая ліхаманка», папулярная канцэртная п’еса для чатырох валторн. У музычна-тэатральнай прасторы слухачы, здаецца, пабачылі пошукі героямі золата, адчулі іх узбуджаны, усхваляваны стан. Аднак мне здалося, што музыкантам не хапіла разняволенасці і выразнасці выканання.
Як прызнаецца сам творца, ён доўга выношвае ідэю кожнага сачынення, але потым хутка яго запісвае. Музыка Кур’яна вельмі эмацыйная, эфектная, з яскравай рытмікай. Усё гэта ўласціва гумарыстычнай замалёўцы «Фіндлей» — вакальнаму цыклу на вершы Роберта Бёрнса ў перакладзе Язэпа Семяжона. Перад слухачамі ўзнікла тэатральная сцэна ўзаемаадносін негаманкога, але настойлівага Фіндлея і прыгажуні, іх яскрава і артыстычна ўвасобілі вядомыя оперныя салісты Наталля Акініна і Андрэй Марозаў, а падтрымлівалі дыялог ударныя Міхаіла Канстанцінава.
Візуальную частку праграмы ўпрыгожыла фотапрэзентацыя, якая нагадала асноўныя моманты жыцця Уладзіміра Кур’яна — сустрэчы з сябрамі, кадры з прэм’ер, хобі музыканта (ён вядомы рыбалоў і грыбнік). Такім чынам асоба кампазітара раскрылася перад гледачамі яшчэ больш цікава.
Першую частку імпрэзы завяршыла арыгінальная інструментальна-тэатральная сцэнка — «Перапіс насельніцтва» для брас-квінтэта і ўдарных. Якія толькі прылады тут ні спатрэбіліся — і друкарскія машынкі, і помпы ад надзіманай лодкі. Падкрэслю: выканаўцы ў парыках і ў чорных нарукаўніках пёрамі «запісвалі» ўсіх, хто прысутнічаў у зале ды з задавальненнем і асалодай увасаблялі гэтую музычную партытуру, дэманструючы немалыя акцёрскія здольнасці.
У другім аддзяленні канцэрта прагучалі два буйныя сачыненні Уладзіміра Кур’яна. Вобраз Купалля, які праходзіць праз многія творы кампазітара, неаддзельны ад нацыянальнага каларыту, яскравых фальклорных тэм, спалучаных з сучаснымі прыёмамі, і, вядома ж, гучання цымбалаў. Таму паэма «Дзівосы Купалля» ў выкананні салістаў Ларысы Рыдлеўскай, Аксаны Хахол, Аляксандра Рыцікава і Нацыянальнага народнага аркестра імя Жыновіча пад кіраўніцтвам Аляксандра Крамко выклікала ў слухачоў разнастайныя вобразныя асацыяцыі, калі яднаюцца папараць-кветка, вера ў цуд і прыгажосць. Але асабліва ўразіў апошні, кульмінацыйны твор вечарыны — кантата «Беларуская калыханка» (па аднайменнай паэме Васіля Віткі і на ўласныя вершы кампазітара). Менавіта гэтае драматычнае сачыненне адкрывае перад намі зусім іншае мастацкае аблічча творцы. У сваёй кантаце Кур’ян звяртаецца да найбагацейшай крыніцы народных напеваў, да музычнай тэмы той калыханкі, што маці спявала будучаму музыканту ў дзяцінстве.
Першапачаткова, у 1979 годзе, кантата была напісана для хору, салістаў і інструментальнага ансамбля. Новая рэдакцыя прагучала ў выкананні Дзяржаўнага камернага хору (дырыжыравала Наталля Міхайлава) і Нацыянальнага народнага аркестра імя Жыновіча.
«Беларуская калыханка» адлюстроўвае тэндэнцыі абнаўлення аўтарскага стылю, якія выявіліся перш за ўсё ў сінтэзе традыцыйнага і наватарскага. Сярод стылявых асаблівасцяў адзначым нетрадыцыйныя тэмбравыя ансамблі (хор, цымбальны аркестр, духавыя інструменты, раяль, сінтэзатар, электрагітара, ударная ўстаноўка), інтанацыйныя ўзбагачэнні музычнай мовы, жанравыя сплавы (у кантату пранікаюць прыкметы рок-оперы, музыкі для драматычных спектакляў), новае стаўленне да народнай творчасці (як сістэмы музычнага мыслення).
Адметная рыса кантаты — арганічны сінтэз эпічнага і лірыка-псіхалагічнага, абумоўлены сюжэтным развіццём, сканцэнтраваны на перадачы і раскрыцці душэўнага стану герояў. Значнае месца ў творы займаюць кантрасты тэматызму, драматургічная шматпланавасць, фармаванне цэлага на аснове частай змены вобразна-жанравых пластоў, з’яднанае з тэатралізацыяй і ўзмацненнем гульнявога пачатку сачынення, які ідзе ад народнага відовішчнага мастацтва. Кацярына Дзегцярова ў вобразе Маці ўразіла прыгажосцю голасу, здольнасцю паглыбіцца ў эмацыйны стан гераіні. Яе сцэнічныя партнёры — Ян Жанчак (Бацька) і Андрэй Коласаў (Сын) — яскрава і непаўторна ўвасобілі свае лірыка-драматычныя ролі, адцяняючы партыю Маці. Адмысловым прыёмам харавой інструментоўкі ў кантаце з’яўляецца супастаўленне сола і хору ці харавых груп, што стварае своеасаблівую «фальклорную тэатралізацыю».
Нароўні з галоўнымі дзейнымі асобамі і хорам раскрыццю зместавай задумы спрыяў аркестр пад кіраўніцтвам дырыжора Аляксандра Крамко, які насычаў кантату сімфанічным развіццём, выконваў абагульняючую, каментуючую ролю.
Далучымся да словаў Галіны Гарэлавай, якая аднойчы дала вельмі дакладную характарыстыку свайму калегу: «Уладзімір Кур’ян — талент. Ён — мастак-беларус, і ў кожным творы яго, у асобнай музычнай фразе пазнаецца тое непадобнае, унікальнае, той спецыфічны стан душы, пра што раней сказалі б — нацыянальны дух». Спадзяёмся, што сачыненні Уладзіміра Кур’яна будуць гучаць на беларускіх і замежных пляцоўках яшчэ доўгі і доўгі час.
Вольга РАМАНЮК