Што здзівіла? Рашэнне адмовіцца ад журы: святкаваць дык святкаваць! Але за шмат гадоў з’явілася патрэба ў адзнаках (узнагародах) — гледачам яны давалі нагоду спрачацца, удзельнікам — ганарыцца. Я перакананы, што ацэньваць спектаклі трэба. Толькі на моладзевым форуме гэта мусяць рабіць маладыя — крытыкі, рэжысёры і драматургі. Па-другое, у сёлетняй праграме пастаноўкі накладаліся адна на адну. Не выпала паглядзець «Лысую спявачку» Эжэна Іянеску тэатра з Кішынёва, якому драматург асабіста даў згоду ганаравацца ягоным імем. З 1991 года калектыў паспяхова папулярызуе творчасць пісьменніка ва ўсім свеце, а яшчэ ладзіць фэст, таксама названы імем драматурга. У беларускай праграме давялося прапусціць «Ілюзіі» Івана Вырыпаева, але ж колькі гадоў таму сам раіў Таццяне Траяновіч звярнуцца да гэтай п’есы...
Што расчаравала? Магілёўскі абласны тэатр: ягоны рэжысёр Саўлюс Варнас, які зазвычай вылучаецца бездакорным густам, не асвойтаўся з найскладанейшым механізмам п’есы «У маленькай сядзібе» класіка польскага авангарду Станіслава Віткевіча — і на сцэне запанавала пабытовая псіхалагічная драма. Другое расчараванне — спектакль «Мроі кахання, ці Жаніцьба Бальзамінава» Рыгора Казлова (Тэатр «Майстэрня», Санкт-Пецярбург). Пастаноўцы шэсць гадоў, але цяжка было адкаснуцца ад меркавання, што яна — студэнцкая і ў пэўнай ступені другасная пасля ўвасабленняў Пятра Фаменкі альбо Сяргея Жанавача. Хіба Максім Студзяноўскі (Бальзамінаў) прадэманстраваў сталае майстэрства.
Што ўразіла, узрушыла, скаланула? ...У пастаноўцы Анатоля Ледухоўскага «Васа» «Ведагонь-тэатра» з Масквы (першая рэдакцыя п’есы Максіма Горкага «Васа Жалязнова» 1906 года) сям’ю знішчае, як ні парадаксальна, маці (адметная роля Наталлі Цімонінай). Яна выгадавала дзяцей, уладкавала, як магла, іх жыццё, але памірае муж, вырашаецца лёс спадчыны — і маці прагне пакінуць грошы сабе. Яна кантралюе ўсіх і ўсё, гатовая караць і нішчыць. У доме пануюць нянавісць і крывадушнасць. Маці баяцца, але... любяць.
Нейкім дзіўным чынам жах таго, што адбываецца, працінае мяне як гледача і не адпускае да апошняй падзеі — забойства маці. Яго можна прадказаць, толькі незразумела, хто і калі яго здзейсніць... Мілая і спакойная Ганна (уразлівая работа Юліі Багдановіч)! У першым акце яна, паназіраўшы за сямейнікамі, нявінна прамаўляе: «Дрэнна ўсе жывуць. Чым жа гэта скончыцца?» І сама кладзе крэс сямейным мітрэнгам.
Драму сямейнага роскіду падтрымлівае сцэнаграфія Святланы Архіпавай, святло, гук (асабліва музычныя паўзы з джазавай кампазіцыяй), дакладная пабудова мізансцэн. Кожны жэст, позірк, ракурс вытанчана-кінематаграфічныя. Моцна ўражвае эфект «перабояў з электрычнасцю» — калі свяцільня дому Жалязновых пачынае міргаць, прадказваючы вырашальны ўдар па ўсіх персанажах... Я б назваў «Васу» лепшым спектаклем форуму.
Персанажаў класічнай п’есы Максіма Горкага «На дне» рэжысёр Магілёўскага абласнога тэатра лялек Ігар Казакоў прадставіў маскаванымі чарвякамі са склепа нейкага незразумелага збудавання (непаўторная сцэнаграфія Таццяны Нерсісян). Час ад часу яны выпаўзаюць вонкі, дзеляцца сваімі крыўдамі на свет і дэманструюць пакуты. І тады заўважна, што за маскай (а кожная адбівае нейкую адмоўную чалавечую рысу — зайздрасць, нянавісць, злосць і г.д.) хаваецца чалавек, а маска з ім суіснуе і нават супернічае. Часам перамагае чалавек, і тады маска зазнае ўласнага жыцця альбо зусім адхіляецца/скідаецца, а чалавек як бы вяртаецца да самога сябе. Аднак глядзець на яго, існага, таксама прыкра — ці ён шукае бойкі, ці гуляе ў карты, ці п’е гарэлку. Вызваленне нядоўгае: маска заклікае чалавека да сябе і змушае змяніць аблічча. Такім чынам, самым вялікім ворагам чалавека з’яўляецца ён сам. Вельмі актуальнае назіранне. Ці гібець яму вечна якім-небудзь чарвяком? Бясспрэчна, Ігар Казакоў мог бы назвацца лепшым маладым рэжысёрам форума.
У «Бракаваных людзях» Васіля Сігарава (п’еса «Гупешка») тэатра «Залатыя Вароты» з Кіева — мінімалістычная сцэнаграфія, досыць простыя пастановачныя прыёмы і тры акцёры, а рэжысёр Стас Жыркоў разважае пра тое, ці маем мы права на жыццё блізкіх людзей. Маніпуляваць, кіраваць, лезці? У цэнтры гісторыі — лёс Тамары (яе сыграла Ірына Ткачэнка, па-мойму, лепшая маладая артыстка форуму), вясковай дзяўчыны, якая перабралася ў горад. Але муж Леанід нацешыўся Тамарай і... папрасіў прыяцеля Пашу яе спакусіць — каб мець нагоду пазбыцца. Ды ўсё пайшло не па плане...
Для ўсіх трох Стас Жыркоў вынайшаў незвычайную пластычную мову, якая мацуе ўражанне пастаяннай імправізацыі ў смешным і гарэзлівым, але пранізлівым аповедзе пра чалавечую безабароннасць. Цікавая знаходка: персанажы перамаўляюцца на суржыку — не ў стане вывучыць ні ўкраінскую, ні рускую мову. Яны ўсё яшчэ ў стадыі фармавання, калі не сказаць — гадавання...
Падобную тэму з дапамогай танца кранае Крыс Херынг у спектаклі «Застылы смех» тэатра «Балет Масква»: з маладосці чалавек схіляецца да шматлікіх спакусаў і пазней падпарадкуецца ім аўтаматычна. Сутыкаецца з іншым чалавекам і нават не імкнецца яго зразумець, затое любым коштам вымагае падпарадкавання — да здушэння, збіцця і загубы. У заганнае кола ўкручваюцца новыя жыцці... Ці можна пакласці гэтаму крэс? Кожны вырашае сам.
Трох удзельніц «Інтэрв’ю з ведзьмамі» Беларускага дзяржаўнага тэатра лялек вывеў на сцэну рэжысёр Яўген Карняг, прымусіўшы дзяліцца з публікай праявамі свайго жыцця, а таксама бачаным, чытаным і пачутым. Рэальныя і прыдуманыя гісторыі ў выкананні Святланы Анікей, Наталлі Кот-Кузьмы і Святланы Цімохінай поўныя сведчанняў гвалту, смерці, здрады, прагі помсты. У нейкі момант чапляешся за думку, што гэта ўсё-ткі тэатр, але лягчэй не становіцца. Велізарную ролю ў гэтым спектаклі адыгрывае музыка кампазітара Мікіты Злотніка (відавочна лепшае музычнае афармленне форумнае пастаноўкі): кожная тэма па-майстэрску ўзмацняе эфект, закладзены рэжысёрам.
Асабліва вызначыўся спектакль «Жыццё за цара» Тэатра дзі Капуа з Санкт-Пецярбурга. Аўтарка ідэі — актрыса Ілона Маркарава. Яна звярнулася да дакументальных крыніц (сведчанняў, допісаў, успамінаў) і разам з рэжысёрам Джуліянам дзі Капуа стварыла аповед пра нарадавольцаў — людзей, неабыякавых да лёсу айчыны. Сумленнікі ўблыталіся ў тэрор, іх пакаралі і страцілі, падтрымкі ды разумення яны не прычакалі: цэлае пакаленне, для якога не знайшлося прыстойнага занятку па сілах і розуме!
Мне здалося, што ўмовай, якая вызначыла поспех пастаноўкі ў Магілёве (колькасць ахвочых паглядзець значна пераўзышла магчымасці глядзельні), было трапна знойдзенае месца: Музей этнаграфіі. Спектакль настолькі адпавядаў месцу свайго паказу, што ўспрымаўся чымсьці накшталт перформансу з інсталяцыяй. Гледачоў сустракаў экскурсавод, апавядаў пра эпоху, зачытваў ліст Льва Талстога пра нарадавольцаў — пра бессэнсоўнасць змагання са стыхійнымі рэвалюцыянерамі. А потым у музейнай зале мы рабіліся сведкамі пасяджэння гуртка з піццём гарбаты пад зялёнай лямпай, спевамі пад гітару, аматарскім лялечным прадстаўленнем і тэатрыкам ценяў. У гэтую гульню артысты паступова ўводзілі культурныя коды Пецярбурга: вершы Іосіфа Бродскага, вечарыны на камунальных кватэрах, гарбату і размовы на кухнях, міцькоў... Усё асучаснівалася да культурнага шоку — гожыя, адукаваныя, добрыя людзі з лепшых памкненняў выпраўляліся ў тэрарысты. Нароўні з «Васай» гэтая пастаноўка вартая называцца лепшай на форуме.
Абсалютна непадобныя, выбітныя спектаклі «М.арт.кантакта» змушаюць гледача звярнуцца і вярнуцца да сябе.
Андрэй МАСКВІН