1.Хто я?
Спецыялізацыя на чымсьці адным дазволіць вам вылучыцца сярод астатніх. Хай змест вашага партфоліа будзе сканцэнтраваны вакол адной сферы дзейнасці. Нават калі вы вызначаеце сябе лаканічным словам «мастак», што дае бясконцы спектр дзеянняў, напішыце па пунктах напрамкі таго, у чым вы пазіцыянуеце сябе як паспяховага творцу і маеце намер працягваць гэтую справу.
2.Для чаго мне партфоліа?
Калі вы ўжо вызначыліся з выбарам прафесіі/прызвання/самавызначэння, ёсць неабходнасць удакладніць, навошта вы гэта робіце. Бо той адказ, які вы атрымаеце ад самога сябе, будзе пуцяводнай зоркай у будаўніцтве структуры вашага партфоліа. Я ствараю партфоліа, каб атрымаць працу: яно павінна вылучацца сярод астатніх і быць зразумелым, каб мае патэнцыйныя працадаўцы змаглі адразу ўбачыць, дзе я магу ім спатрэбіцца. Ці, напрыклад: я ствараю рэсурс для ўзаемадзеяння з мастацкімі інстытуцыямі, бо маю намер выстаўляцца і кааперыравацца: сістэма ўкладання маёй базы павінна быць лагічнай і максімальна дакладнай — з назвамі, датамі і апісаннем. Але ў цэлым: я ствараю партфоліа дзеля кар’еры. І яшчэ больш: я ствараю партфоліа, каб займацца тым, што люблю.
3.Што ўключае партфоліа?
Тое, што лепш за ўсё раскажа пра вас. Прадукт (творы ў выдатнай якасці), дакладнае апісанне і тэхнічныя характарыстыкі, CV са спісам галоўных узнагарод і выстаў, спасылкі на публікацыі, каталогі, рэцэнзіі, кантакты. Вызначце, што робіць вас тымі, хто вы ёсць, і потым раскажыце пра сябе з дапамогай вашых прац. У партфоліа не павінна быць выпадковых работ і стыляў, у якіх мастак паспрабаваў свае сілы толькі аднойчы. Для вычарпальнага партфоліа вам спатрэбіцца як мінімум 20 лепшых работ, каб стварыць належнае ўражанне. А яшчэ больш плённа — няхай гэта будзе 5 праектаў, дзе працы, аб’яднаныя адной тэмай ці канцэпцыяй, раскрываюць і дапаўняюць адна адну.
4.Папера ці лічба?
Было б няблага мець партфоліа і ў надрукаваным, і ў лічбавым выглядзе. Гэта павысіць вашыя шанцы: не ўбачаць друкаваны варыянт — можа, натрапяць на лічбавы. І наадварот: пагартаць старонкі каталога запамінальней за выпадковы клік на старонку майстра. Існуе шмат магчымасцей для публікацыі вашага анлайн-партфоліа. У выпадку, калі трэба чыстае, персаналізаванае месца для дэманстрацыі вашага арту, то вы проста купляеце дамен і просіце каго-небудзь стварыць вам сайт. Ці папросту ставіце блогавую праграму і наладжваеце яе пад сябе. Спасылка на ваш сайт, старонку ці блог спатрэбіцца для запаўнення інфармацыі ва ўсіх выставачных анлайн-платформах, якія вам толькі даспадобы, а добра адрэдагаваная інфармацыя і якасныя здымкі зробяць запаўненне стандартных фармуляраў лёгкім і простым. Ідэальна, калі ваша партфоліа будзе заўсёды з вамі на флэшцы ці дыску — ніколі не ведаеш, дзе і калі давядзецца мець зносіны з кліентам.
5.Тэрмін прыдатнасці
Няважна, у якім выглядзе ваша партфоліа — лічбавым ці папяровым. Галоўнае — працягвайце паляпшаць яго. Па ходзе развіцця вашай кар’еры вы ўсведамляеце, што няма нічога важнейшага за тое, каб прадставіць лепшыя з вашых работ у яснай і прывабнай форме. З часам вы набываеце новы вопыт, вашыя працы будуць таксама мяняцца. На цікаўнасць да твораў уплываюць шматлікія фактары: канкрэтыка, запамінальнасць і, як ні банальна, навігацыя сайта ці змест каталога. Час накладае свае абавязкі, і не залішне паказваць сваю платформу знаёмаму праграмісту, каб ён выявіў хібы (адсутнасць мабільнай версіі, складанасць у павелічэнні выяў, непрыгожыя адрасы спасылак) ды параіў, як гэта можна выправіць.
6.Я прадаюся
Калі ў вашым партфоліа разнастайныя малюнкі — гэтага не дастаткова. Вам трэба падаць іх у кантэксце. Адкуль прыйшлі гэтыя карціны? Як сфармавалася ідэя? Які ланцужок думак? Усё, што можа дапамагчы ў раскрыцці канцэпцыі малюнкаў, павінна быць уключана ў партфоліа. Думайце пра яго як пра творчую біяграфію. Яна ваша, яна персанальная, яна вартая быць паказанай. Будзьце зразумелым: прадаецца не рэч, прадаецца гісторыя. Вы яе частка?
7.Я зразумелы/зразумелая
Перакладайце! У выпадку Беларусі няхай будзе нават трохмоўе: беларуская, расійская ды англійская — для міжнароднага разумення, а мо нават і прызнання.
8.Усталяванне межаў
Аптымальна размяшчаць да 10—15 работ у кожным кірунку. Але не варта публікаваць вялікую частку вашай працы ў Інтэрнэце. Пераканайцеся, што яны адлюстроўваюць ладную частку вашых магчымасцей. Прымусьце людзей жадаць убачыць больш вашых работ. Гэта менавіта тое, што вы павінны зрабіць з дапамогай партфоліа: выклікаць жаданне бачыць яшчэ.
9.Бясконцае рэдагаванне
Вэб-сайт як візітоўка кажа пра вас многае. А калі больш дакладна — паказвае. Калі вы пакінеце свой сайт без абнаўлення хоць бы на некалькі месяцаў, людзі не стануць купляць тое, што ўжо было размешчана раней. А галерысты вырашаць, што вы прыпыніліся. Вам патрэбен такі дызайн сайта, які дазволіць хутка, у два-тры клікі, дадаваць новыя працы і выдаляць старыя. Калі абнаўленні займаюць занадта шмат часу, вы стоміцеся рабіць іх рэгулярна, паколькі будзеце загружаныя бягучай працай. Важна паказаць, што вы даводзіце работу да канца.
10.Я — лепшы/лепшая
Вылучыўшы напрамкі, па якіх вы плануеце стварыць партфоліа, паабяцайце сабе не пакідаць гэтай нішы, не стаўшы ў ёй нумарам адзін. Будзьце сабой, адрознівайцеся ад іншых.