Выстава-продаж і конкурс работ маладых мастакоў Беларусі праходзілi сёлета ў Палацы мастацтва з 8 кастрычніка па 8 лістапада. Больш за дзесяць тысяч чалавек наведала экспазіцыю за месяц яе функцыянавання, а чвэрць твораў адразу з выставы былі набытыя ў прыватныя калекцыі і зборы.
Трэба прызнаць, што адрамантаваныя экспазіцыйныя залы Палаца, кавярня і кнігарня на першым паверсе, насычаная культурна-забаўляльнымі мерапрыемствамі адукацыйная праграма праекта па-сапраўднаму змянілі прастору, стварылі атмасферу для стасункаў і публічных сустрэч — і хоць бы на час вярнулі «дому мёду» дух артыстычнага жыцця.
У адрозненне ад папярэдніх маштабных выставачных праектаў «Белгазпрамбанка», скіраваных на дэманстрацыю творчай спадчыны нашай краіны («Дзесяць вякоў мастацтва Беларусі», «Мастакі Парыжскай школы з Беларусі»), «Восеньскі салон» быў закліканы раскрыць будучыя перспектывы і сучасны патэнцыял маладога мастацтва.
На арганізацыйным і канцэптуальным узроўнях «Восеньскі салон» яшчэ набірае сілы і разгойдваецца, набіваючы гузы аб рыфы сталічнай арт-суполкі. Праект выклікаў столькі абурэнняў, прэтэнзій і шуму з боку мастакоў, арт-крытыкаў, культурных дзеячаў, што ўжо без падвядзення прамежкавых вынікаў я прапаную канстатаваць поспех дадзенага мерапрыемства. Як памятаем, сабака брэша — караван ідзе, у той час як кожны сам выбірае і адказвае за тое, куды накіроўваць свае прафесійныя і жыццёвыя рэсурсы.
На фармальным узроўні «Белгазпрамбанк» з’яўляецца заказчыкам праекта, Палац мастацтва — выканаўцам. Відавочна, што рэнамэ Палаца ў культурным асяроддзі адыграла не апошнюю ролю ў фармаванні змястоўнай часткі «Салона». Напрыклад, стварэнню экспазіцыі папярэднічаў адкрыты конкурс заявак сярод маладых мастакоў Беларусі. Можна меркаваць, што асноўная інфармацыя аб конкурсе распаўсюджвалася па інфармацыйных каналах, даступных Палацу; мабыць, у першую чаргу гэта была база кантактаў Саюза мастакоў. З іншага боку, ступень недаверу альтэрнатыўнага, неафіцыйнага сегмента арт-супольнасці да дзейнасці Палаца сёння ўсё яшчэ вельмі вялікая. Некаторыя творцы проста не адгукнуліся на запрашэнне паўдзельнічаць у конкурсе, спасылаючыся на тое, што гэта будзе «чарговае палацавае трыенале». Тут варта згадаць: акцэнт у рэкламе конкурсу рабіўся на аб’ём прызавога фонду, а не, напрыклад, імёнах міжнароднага журы.
У выніку на конкурс паступіла 300 заявак ад маладых беларускіх творцаў, пераважная частка якіх — выпускнікі і студэнты Беларускай дзяржаўнай акадэміі мастацтваў. У экспазіцыю праекта «Восеньскі салон» увайшлі работы 90 мастакоў Беларусі ва ўзросце да 40 гадоў. Разыначкай экспазіцыі сталі апошнія набыткі калекцыі «Белгазпрамбанка»: скульптуры Паліны Хентавай і Леона Iндэнбаўма, гуаш «Лунацік» Марка Шагала, палатно «Ноч святога Івана» Дзмітрыя Сталецкага, літаграфія «Гарадскі пейзаж» Восіпа Любіча, малюнкі Яўгена Зака, а таксама ўпадабаныя публікай працы Хаіма Суціна і Міхаіла Кікоіна.
Калі я патрапіла на выставу, першым уражаннем было расчараванне: няўжо гэта ўсё, што ў нас ёсць?.. З мастацтвазнаўчага ці культурна-аналітычнага пункту гледжання назваць прадстаўленыя ў экспазіцыі «Салона» працы лепшымі не выпадае, прынамсі гэта было б несумленна ў дачыненні да імёнаў, якія засталіся за дужкамі. Шмат моцных, цікавых і самабытных работ, так, але без дадатковых апісанняў (анатацый або канцэптуальных нататак), на жаль, практычна ўсе яны губляюцца, ператвараючыся ў «малюнкі а-ля Бэкан». З іншага боку, экспазіцыя стваралася з таго, што мелася, і рабіць тут заўвагі ў бок арганізатараў аб адсутнасці паказальнай выбаркі беларускага маладога мастацтва або зрэзу па тых ці іншых мастацкіх напрамках таксама недарэчна.
Бо «а суддзі хто?» Хто тое прафесійнае беларускае журы, якое з 300 заявак выбрала 90? Якімі ідэямі і крытэрамі яны кіраваліся? І чаму вырашылі застацца ў ценю і не агучваць свае імёны? Ананімнасць адборачнага журы — абуральная прыкрасць і вялікі мінус праекта, такім чынам — пытанне аб крытэрыях ацэнкі і фармавання катэгарыяльна-каштоўнаснага апарата пры адборы работ вісіць у паветры. Прэтэнзія на замоўчванне сваёй пазіцыі з’яўляецца прыкметай прафесійнай інфантыльнасці беларускай арт-супольнасці. Як і пацверджаннем тэзіса пра раз’яднанасць гэтай супольнасці, выразна адмеранай мяжы паміж «сваімі» і «чужымі», «дзяржаўнымі» і «неафіцыйнымі», прыхільнікамі «сучаснага мастацтва» і «мастацтва для масаў».
На выставе ярка вылучаліся працы Антаніны Слабодчыкавай і Міхаіла Гуліна — як кантрапункт усёй экспазіцыі. Яны сталі сведчаннем таго, што ў беларускім мастацтве ёсць нешта адрознае ад жывапісных палотнаў, пластычных скульптурных формаў і лірычных сюжэтаў. Аднак складана меркаваць, ці ўдалася дадзеная арт-інтэрвенцыя, бо прызавога фонду іх работы так і не ўзялі.
У маркетынгавым плане фармулёўка «мастацтва маладых творцаў» стала вельмі паспяховай, у той час як на канцэптуальным узроўні нівелявала градацыю паміж мадэрнісцкiм мастацтвам (зразумелым, вядомым, фармальным) і сучасным (што заўсёды мае патрэбу ў кантэкстуалiзацыi). Апошняе стала прычынай шэрагу канфузных сітуацый, калі дакладна не было зразумела, ці то аўтар выкарыстоўвае традыцыйную візуальна-мастацкую мову са схаваным крытычным падтэкстам, ці то адно транслюе ідэю пераемнасцi традыцый народнай творчасці ў беларускім мастацтве (працы Веры Ягоўдзiк). Або, напрыклад, адкуль бярэ пачатак ідэя супаставіць на адным палатне мілітарысцкія аб’екты — танкі, ваенную зброю — і класічныя вобразы нацюрмортаў — мёртвую дзічыну, кветкі, садавіну (працы Андрэя Пяткевiча)? Ці тут крыецца толькі жаданне аўтара прадэманстраваць сваё майстэрства ў прамалёўцы рознафактурных аб’ектаў, ці гэта таксама спроба гульні з больш глыбокім культурна-сацыяльным кантэкстам?
Вялікім плюсам праекта «Восеньскі салон» стала запрашэнне міжнароднага журы, куды ўваходзілі Аэса Сігуронсдоцір (незалежны куратар; Рэйк’явік—Парыж), Гаспарэ Манас (мастак, куратар, заснавальнік фонду сучаснага мастацтва «Gaspare foundation»; Венецыя), Дытар Роелстратэ (чалец куратарскай каманды выставы documenta 14, Касэль, 2017; Германія), Мікалай Палажчанка (арт-дылер, прадстаўнік «Art Basel» у Расіі). Усе гэтыя імёны сапраўды сусветнага значэння, а поспех праекта ў тым, што сябры журы не прадстаўлялі інтарэсы той ці іншай мастацкай кааліцыі, а былі матываваны зусім рознымі поглядамі і густамі на мастацтва.
Але пры гэтым, усведамляючы кан’юнктуру сітуацыі, журы аднагалосна прыняло рашэнне ўручыць галоўны прыз эквівалентам у 15 тысяч еўра фатографу Андрэю Лянкевічу за працы з праекта «Бывай, Радзіма!». Над ім аўтар працуе больш за пяць гадоў, даследуе стаўленне беларускага грамадства да Другой сусветнай вайны. У работах Лянкевіча журы адзначыла тую гістарычную адказнасць, з якой аўтар падыходзіць да рэалізацыі твора сучаснага мастацтва, і ўклад у фармаванне арт-асяроддзя Беларусі. Выдатна, што прыз узяў менавіта Лянкевіч: ягоная перамога легітымуе дзейнасць галоўнага ініцыятара «Месяца фатаграфіі ў Мінску», а таксама — праектна-даследчы падыход у стварэнні твора сучаснага мастацтва.
«Малы прыз» у 7 тысяч еўра дастаўся мастаку з Гродна Аляксандру Балдакову «за арыгінальную працу з колерам у вобразнай прасторы сну». Акрамя гэтага, спецыяльнай згадкай журы адзначыла работы Уладзіміра Грамовіча («за інавацыйнае выкарыстанне ўзнаўляльных патэрнаў у канфігурацыi гарадской прасторы»), Анастасіі Хобатавай («за сустрэчу абстрактных формаў са светам графічнай сімволікі») і Паліны Амельяновіч («за яркую тэхніку, якая раскрывае дыскурс прасторы і міфа»). А прыз глядацкіх сімпатый у памеры 3 тысяч еўра ўзяла Алеся Скарабагатая з працай «Пчаліны пацалунак».
Разрыў паміж праектам Лянкевіча і жывапіснымі працамі Скарабагатай, выбарам міжнароднага журы і народным галасаваннем каласальны. Але таксама — і прадказальны. Нельга казаць пра ўстойлівае развіццё сучаснага арт-рынку ў сітуацыі неэрудыраванага гледача. Я не знаходжу нічога дзіўнага ў тым, што ў народным галасаванні безумоўна перамагла праца, па-майстэрску выкананая ў рэалістычнай тэхніцы. Беларускі глядач яшчэ не прайшоў стадыю станаўлення, ён не валодае дыскурсіўнай і каштоўнасна-катэгарыяльнай базай для выкрыцця шматслойных сэнсаў твора сучаснага мастацтва, яму невядомы глабальны кантэкст.
Адна з мэтаў «Восеньскага салона» — прадставіць Беларусь часткай сучаснай сусветнай арт-індустрыі. Індустрыя — выхад з вузкага кола мастацкіх «супольнасцяў узаемнага захаплення» ў шырокае поле культурнай вытворчасці. Гэта значыць, што легітымізацыя мастака адбываецца праз капіталізацыю яго дзейнасці аўдыторыяй. Тут глядач робіцца спажыўцом і ўсё часцей арыентуецца на рэйтынгі і рэкламныя слоганы.
Прызнаючы, што сёння мастацтва знаходзіцца ў полі глабальнага спажывання, арганізатары праекта імкнуцца знайсці механізмы, якія будуць спрыяць стварэнню арт-рынку ў Беларусі. Гэтыя задачы становяцца асабліва актуальнымі, калі мы назіраем «галерэйны бум» у сталіцы. За апошні год у Мінску адкрылася адразу некалькі прыватных пляцовак, арыентаваных на продаж: «Імёны art-boutique», галерэя «A&V», «Дом карцін». Крыху раней адкрыліся галерэі «ДК» (якая, на жаль, ужо не працуе) і «Артбаза».
Безумоўна, «Восеньскі салон» робіць крок насустрач інстытуалізацыі рынку мастацтва Беларусі, які да нядаўняга часу існаваў толькі ў ценявым фармаце продажаў ад аўтара калекцыянеру ў закрытай ад старонніх вачэй майстэрні. На «Салоне» мастакам было прапанавана самім ацаніць свае працы. Механізм коштаўтварэння агаляецца і відавочніцца, мы назіраем сітуацыю, калі работы па неадэкватна вызначаных коштах (выразна завышаныя лічбы) не прадаліся. Як і тое, што работы па цане, больш прывабнай для спажыўца, былі набытыя ў першую чаргу. Пры гэтым усе выдаткі і звязаную з імі рызыку па арганізацыі і прасоўванні выставы бярэ на сябе «Белгазпрамбанк».
Калі казаць пра перспектывы сучаснага беларускага мастацтва, я ўпэўненая, што ягонае развіццё немагчымае без падтрымкі лакальнымі вялікімі гульцамі, адным з якіх сёння з’яўляецца «Белгазпрамбанк». Таксама я спадзяюся, што мы прысутнічаем пры зараджэнні арт-падзеі, здольнай сістэматычна даваць магчымасць маладому мастацтву масава праяўляць сябе ў беларускай публічнасці. Ужо цяпер праект «Восеньскі салон» выявіў свой патэнцыял да мажлівасці нейтралізаваць разрыў паміж дзейнасцю замкнёнай на сабе арт-супольнасці і запытаў з боку шырокай аўдыторыі, што пацвярджае тая колькасць людзей не са свету мастацтва, якія наведалі выставу сёлета. Запрашаючы ў Мінск арт-прафесіяналаў міжнароднага ўзроўню, праект стварае магчымасць для іх знаёмства з аўтарамі і спецыфікай лакальнага мастацтва, а для нас — магчымасць атрымання ацэнкі дзейнасці праз погляд збоку. Акрамя гэтага, «Салон» прадугледжвае механізм легітымізацыі і прызнання: грашовыя прэміі, скіраваныя на стварэнне творчых праектаў, у першую чаргу кіруюцца на ўстойлівае фармаванне арт-прасторы.
Ганна САМАРСКАЯ