Фатаграфія, такім чынам, сёлета вядзе рэй паводле двух крытэрыяў: падзея года («Месяц фатаграфіі ў Мінску») і перамога года (конкурс на ўдзел у Венецыянскім біенале).
Яна ж, фатаграфія, і ў прыватнасці менеджар і фатограф Андрэй Лянкевіч пераконваюць нас пазбыцца комплексу правінцыйнасці. Варта прыкласці намаганні, распачаць ініцыятыву, сабраць каманду — і Венецыя будзе тут. Ці, як кажа жывапісец Уладзімір Кандрусевіч у інтэрв’ю: «Дзе ты, там і ёсць цэнтр». А мастацтва, на маю думку, субстанцыя даволі ртутная, здольная затрымлівацца ў нечаканых месцах.
Пачатак-сярэдзіна года парадавалі выкшталцонымі персанальнымі экспазіцыямі: «Кастынг» Сяргея Грыневіча, «Міміка лёгкіх» Вольгі Сазыкінай, «Логасы» Канстанціна Селіханава, «Адны такія, іншыя такія» Тамары Сакаловай. Дзень 8 сакавіка быў адзначаны даволі ўдала. Праект «Штучнае асвятленне. Клара і Роза», падрыхтаваны Мартай Шматавай, прадэманстраваў арганізацыйную сілу канцэпцыі, якая змушае творцаў выдаваць нечаканы для гледача прадукт.
Мастацкае лета вызначыў Чэмпіянат свету па хакеі, падчас якога былі прэзентаваны мегапраекты: блокбастар пад маркай сучаснага мастацтва «Ад квадрата да аб’екта» («БелЭкспа») з суправаджальнай праграмай і паралельнай выставай у Музеі сучаснага выяўленчага мастацтва і «Дзесяць стагоддзяў мастацтва Беларусі» — у Нацыянальным мастацкім. Музейны праект справядліва крытыкавалі за недапрацаванасць канцэпцыі, у выставе ў «БелЭкспа» гэткая недапрацаванасць дайшла да абсалюту. Цікавы парадокс: мяне «Дзесяць стагоддзяў» адразу захапілі і ўразілі. З часам зразумела чаму: упершыню ўбачыла такі паўнавартасны збор. Аднак пасля асэнсавала правалы канцэпцыі: прафесійных камунікацый падчас падрыхтоўкі вялося відавочна мала. Дык што ж не так з аўтарытэтнымі меркаваннямі, прафесійнымі ацэнкамі? Чаму іх не чуюць? Спрацоўваюць правілы закрытых арт-супольнасцей: самі сябе хвалім, самі сябе слухаем.
Цэнтр сучасных мастацтваў выступіў паўнапраўным агентам арт-поля. Многія восеньскія падзеі адбываліся з удзелам Цэнтра і Музея сучаснага выяўленчага мастацтва. Напрыклад, праекты стрыт-арту, сярод іх самым гучным аказаўся беларуска-бразільскі фестываль «Vulica Brazil». Выстава-прэзентацыя ў залах Цэнтра аказалася больш цэласнай і смелай, чым самі роспісы ў двух вызначаных пунктах сталіцы. Выдатна глядзелася інсталяцыя Андрэя Бусла на плошчы Якуба Коласа, мастак перанёс туды свой беларуска-бразільскі горад. «Анатомія» Дзіны Даніловіч — куратарскі праект з далікатным начыннем — узняла пытанні цялеснасці да метафарычнага асэнсавання. «Suma Sumarum», рэінкарнацыя незалежнай галерэі сучаснага мастацтва «6 лінія», стаў падзеяй-каталізатарам, бо выклікаў шматлікія абмеркаванні пра дзяржаўнае і прыватнае ў нашай культуры, пра змены ў арт-асяроддзі, пра магчымасць узнаўлення дзейнасці галерэі 1990-х у цалках іншых умовах. Можа, яна — ужо гісторыя? Ці яе дух яшчэ жывы і здольны ўтвараць новыя сэнсы?
Некалькі адметных экспазіцый было ў Палацы мастацтваў. Эксперыментальная «Памяць іх ценям» прысвечана паўстанню 1863—1864 гадоў. Старшыня Саюза мастакоў Рыгор Сітніца рыхтаваў яе доўга, яшчэ на пасадзе намесніка, бо паставіў за мэту падаць старых герояў і гістарычныя падзеі праз новую выяўленчую мову. Для гэтага была запрошана кіраўнік праграмы маладых творцаў у галерэі «Ў» Наталля Гарачая, якая далікатна ўключыла ў экспазіцыю творы найноўшага арту. Экспазіцыя секцыі скульптуры Саюза мастакоў выявіла няпростыя пытанні самаідэнтыфікацыі майстроў у нашых складаных эканамічных умовах. Біенале «Формазмест 703» стала справаздачнай выставай за два гады, сабрала творы жывапісу, графікі і скульптуры. Пра адсутнасць уцямнай канцэпцыі гаварыць больш не буду. Надакучыла за столькі гадоў.
Арт-поле пашырылася — літаральна і тэматычна. Новыя пляцоўкі, новыя тэмы, новыя агенты... Варта толькі прасачыць, дзе прытуліўся «Месяц фатаграфіі», каб зразумець, што нешта такі зрушылася.
МЕРКАВАННІ
Ларыса Міхневіч:
Напрыканцы года буду шчодра раздаваць прызы: лімоны і апельсіны. Першыя — рэзкія, але карысныя, другія — прыемныя ва ўсіх адносінах.
У мастацкім жыцці Беларусі сёлета былі два важкія кантрапункты: спачатку адбыўся праект «Ад квадрата да аб’екта», напрыканцы — конкурс на ўдзел у Венецыянскай біенале.
Апельсін тым, хто рыхтаваў праект «Ад квадрата да аб’екта», — гэта была цяжкая праца. Лімон — за адсутнасць канцэпцыі, праз што экспазіцыя атрымалася слабой.
Вялізны апельсін тым, хто выдаткаваў грошы на беларускі ўдзел у 56-й Венецыянскай біенале, Міністэрству культуры — за адкрыты конкурс, які, аднак, выявіў нашу галоўную праблему. Было пададзена 36 канцэпцый, нават за гэты сціслы тэрмін адзін Мінск павінен быў выдаць не менш сотні ідэй.
Паміж гэтымі дзвюма падзеямі раздаю:
Апельсін Нацыянальнаму мастацкаму музею за выставу японскай гравюры.
Лімон за рэалізацыю праекта «Дзесяць стагоддзяў мастацтва Беларусі»: праект патрабаваў нахнёных нацыянальных міфаў, а іх тут не было.
Апельсін Ірыне Бігдай за ідэю аднаўлення «Шостай лініі».
І кошык апельсінаў Руслану Вашкевічу за зроблены ў Гомелі лепшы праект года. Маэстра, я ў захапленні і шчыра раю сваім сябрам: «Ідзі і глядзі».
Сяргей Шабохін
Сёлета многія даследчыя праекты закраналі хваравітыя для грамадства тэмы — сексуальнасці і ідэнтычнасці грамадзян праз оптыку квір-тэорыі («XXY» у галерэі «Ў») ці прагрэсіўныя тактыкі ў фемісцкім мастацтве («FEMENISTская ART Крытыка 2014» на пляцоўцы «Цэх»). Чэмпіянат свету па хакеі прыкметна лібералізаваў мінскую арт-прастору, на фоне чаго актывізаваліся ўрбанісцкія практыкі, у тым ліку прайшоў «Мінскі фестываль урбаністыкі».
Самай буйной падзеяй года стаў «Месяц фатаграфіі ў Мінску», ініцыяваны Андрэем Лянкевічам. «Suma Sumarum», арганізаваная куратарам зачыненай у 1998 годзе галерэі «Шостая лінія» Ірынай Бігдай выклікала хвалю дыскусій пра формы супрацоўніцтва сучаснага творцы з наяўнымі арт-інстытуцыямі.
Каміла Янушкевіч:
Для мяне знакавым стаў грунтоўны «наступ» фатаграфіі, са шматлікімі выставамі на розных пляцоўках і творчымі сустрэчамі, воркшопамі (маю на ўвазе «Месяц фатаграфіі ў Мінску»). На другім месцы — праект Дзіны Даніловіч «Anatomia» ў Цэнтры сучасных мастацтваў. Адзначу дзве кнігі — «Творчая фатаграфія ў Беларусі», падрыхтаваная Уладзімірам Парфянком, і з майго боку: «Партрэты паўстанцаў» са 180-цю архіўнымі выявамі.
Упэўнена, што і наступны год будзе не слабейшы, адпаведныя надзеі дае Цэнтр сучасных мастацтваў і прэзентацыя Беларускага павільёна на Венецыянскай біенале.
Павел Вайніцкі:
Мушу назваць расчараваннем года «Avante-gARTе. Ад квадрата да аб’екта». Так, я быў удзельнікам гэтага амбіцыйнага праекта і сказанае будзе папрокам і мне таксама. Бо нягледзячы на тое, што мая праца была экспанавана без майго ведама — яна знаходзіцца ў зборы Музея сучаснага выяўленчага мастацтва, — але ж дыплом Міністэрства культуры за яе ўваходжанне ў дзясятку лепшых твораў я з задавальненнем атрымаў. На маю думку, падзеі апошніх гадоў сведчаць, што ідэя «вялікага праекту», арганізаванага ў форме кампіляцыі з твораў ужо вядомых аўтараў — не спрачаюся, вельмі добрых — не прапануюць нічога новага. Прымеркаваны да ЧМ-2014 па хакеі, «Avante-gARTе» быў нібыта прызначаны для знаёмства інтэрнацыянальнага гледача з сучасным беларускім мастацтвам, але ці шмат хакейных заўзятараў здолелі ім пацікавіцца? Дарэчы, з размаітага калячэмпіянатнага шэрагу мерапрыемстваў найбольш адэкватнай і цікавай атрымалася опера-буф «0:1» Вольгі Падгайскай, паказаная на лёдзе сапраўднай хакейнай арэны.
Асабліва парадавалі несістэмныя падзеі чатырнаццатага — сапраўды неабходныя людзям і супольнасцям. Вось толькі некаторыя з прыўкрасных прыкладаў самаарганізацыі беларускага культурнага поля: Мінскі архітэктурны форум і фестываль урбаністыкі, фэст «На Грушаўцы» і моўныя курсы «Мова нанова» — яны вельмі розныя, іх шмат — і гэта выдатна!
Вольга Архіпава:
Мастацкімі дасягненнямі 2014 года я лічу дзве выставы: «Дзесяць стагоддзяў мастацтва Беларусі» і «Сто год беларускага авангарда». Дзякуючы Чэмпіянату свету па хакеі 2014 года Міністэрства культуры падтрымала вельмі значныя мастацкія падзеі. Для мяне галоўным наватарствам было пераасэнсаванне гісторыі айчыннага мастацтва ХХ стагоддзя. Па-першае: беларускае мастацтва разглядалася як шматстайная з’ява, у адзіны шэраг былі уключаны супрацьлеглыя, але вызначальныя мастацкія накірункі і асобы: Валенці Ваньковіч і Станіслаў Жукоўскі, Юдэль Пэн і Шрага Царфін, Хаім Суцін і Міхаіл Станюта, Марк Шагал і Міхаіл Савіцкі, савецкае афіцыйнае і неафіцыйнае мастацтва, прафесійнае і салоннае, апантана-беларускае і касмапалітычнае, абстрактнае і фігуратыўнае.
Па-другое: на выставе «Сто год беларускага авангарда» была зроблена спроба паказаць гісторыю ХХ стагоддзя як гісторыю розных мастацкіх аб’яднанняў, дзе былі прадстаўлены творы ад 1912 да 2012, што і абумовіла назву.
Кожны з праектаў, безумоўна, меў і свае недахопы, але галоўнае: закладзены падмурак да больш паўнавартаснага погляду на мастацтва як на гісторыю асобаў...