Майстар і яго мара

Мурманчанін Павел Шадрын не па чутках ведае пра Брэстчыну. Тут ён служыў у арміі, у Брэсце сустрэў сваю жонку, затым два дзесяцігоддзі жыў у Мурманску, займаўся дрэваапрацоўкай, захапляўся разьбой па дрэве і драўлянай скульптурай. А пяць гадоў таму сям’я Шадрына вырашыла пераехаць у Беларусь. Купілі гектар зямлі з закінутымі пабудовамі непадалёк ад вёскі Залуззе Жабінкаўскага раёна. Тут пабудавалі сабе жыллё. Атрымаўшы статус народнага майстра, Павел стварыў сваю майстэрню па вырабе беларускіх сувеніраў — аб’ёмных драўляных пано і старадаўніх драўляных лясных кружак. Ад заказчыкаў няма адбою, па сувеніры прыязджаюць проста ў майстэрню. Дый заказаў у Паўла на арыгінальныя вырабы з розных парод дрэва — на паўгода наперад. А яшчэ майстар стварыў адзіны ў сваім родзе ў Беларусі Музей драўляных мініяцюр. Экспанатамі яго з’яўляюцца ў асноўным работы Шадрына. Знайшлі сабе месца тут і прадметы побыту жыхароў гэтага рэгіёна, кухоннае начынне...