Прапанаваныя змяненні артыкулаў Канстытуцыі, якія датычацца сацыяльнай сферы, накіраваныя на падтрымку грамадзян і сямейных каштоўнасцяў. Беларусь працягвае захоўваць статус сацыяльнай дзяржавы, якая клапоціцца аб дабрабыце сваіх грамадзян, забеспячэнні дастойнага ўзроўню жыцця, які дае разнастайныя сацыяльныя гарантыі.
Як падкрэсліла Людміла Канановіч, вядзецца вялікая работа па абмеркаванні змяненняў у Канстытуцыі, у рамках якога дэпутаты Палаты прадстаўнікоў Нацыянальнага сходу Беларусі праводзяць сустрэчы з грамадзянамі ў сваіх акругах. Упершыню аб неабходнасці ўнясення змяненняў і дапаўненняў у Асноўны Закон было заяўлена яшчэ ў 2016 годзе, а 15 сакавіка 2021 года была створаная камісія ў складзе трыццаці шасці чалавек, якая прааналізавала тэкст дзейнай Канстытуцыі, вывучыла міжнародны досвед і ўнесла свае прапановы па змяненнях і дапаўненнях, для абмеркавання якіх было зладжана паўтары тысячы дыялогавых пляцовак, у якіх прынялі ўдзел каля пяцідзесяці тысяч чалавек.
З новымі выклікамі часу з’яўляюцца і новыя задачы. Так, у прапанаваным праекце Канстытуцыі мяркуецца замацаванне роўнасці жанчын і мужчын у атрыманні адукацыі і прафесійнай падрыхтоўкі, працы і вылучэнні па службе, стварэнні ўмоў па ахове працы і здароўя. Асаблівая ўвага надаецца таксама падтрымцы сем’яў з дзецьмі, дзяцей-сірот і тых, што засталіся без апекі бацькоў, клопату аб пажылых людзях і людзях з інваліднасцю. Замацаваны ў праекце і абавязак бацькоў рыхтаваць дзяцей да грамадска-карыснай працы, выхоўваць павагу да закона, гістарычных і нацыянальных традыцый. Таксама мяркуецца, што дзяржава ўскладзе на сябе адказнасць па стварэнні ўмоў для абароны персанальных звестак грамадзян.