Падчас еўратыдню, які папярэднічаў галоўнай імпрэзе, удзельнікаў конкурсу чакала актыўная культурная праграма. Юныя спевакі з розных краін пазнаёміліся паміж сабою і з нашым горадам.
— Я ўжо пасябраваў са многімі сёлетнімі канкурсантамі, асабліва з Раксанай з Польшчы і Тэйларам з Ірландыі, — падзяліўся сваімі ўражаннямі Даніэль. — Хацелася б, канешне, мець на стасункі з імі больш часу, але графік у нас вельмі напружаны.
Таксама ўдзельнікі конкурсу наведалі Дзяржаўны літаратурны музей імя Янкі Купалы. І такі выбар быў невыпадковы. Яшчэ летась сярод музеяў і іншых падобных устаноў Мінска праводзіўся спецыяльны конкурс, дзе яны спаборнічалі адносна магчымасці прымаць у сябе іншаземных гасцей. Прапанаваўшы праграму “Вячоркі”, музей Купалы атрымаў перамогу. І ў гэты чацвер “фірмовая” імпрэза была зладжана для дэлегацый “Еўрабачання”. Спецыяльная экскурсія, створаная для канкурсантаў, уключала беларускія народныя песні і танцы, 3D-экспазіцыю, майстар-класы па вырабе лялек і нават прыемныя падарункі.
— Прымаць удзельнікаў міжнароднага конкурсу для нас — вялікі гонар, — кажа загадчыца аддзела музея Вольга Пархімовіч. — Але ж хвалявання няма, бо наша ўстанова цалкам адпавядае еўрапейскаму ўзроўню! Экспазіцыя музея не толькі вельмі сучасная, але і насычаная рознымі інтэрактыўнымі цікавосткамі. Спадзяемся, пасля яе ў дзетак застануцца прыемныя ўражанні. Кожнаму мы дадзім магчымасць зрабіць ляльку-абярэг і забраць яе з сабой, а таксама пачастуем салодкім пернікам з сімваламі купальскага свята — колам і вянком. Няхай гэта прынясе ім поспех на конкурсе! І варта нагадаць, што ў Купалаўскім доме вельмі любілі прымаць гасцей, асабліва малечу.
Дарэчы, нешта ад беларускай сімволікі можна заўважыць і на лагатыпе конкурсу. Яго выяву дызайнеры вытлумачваюць як музычныя хвалі, але ж таксама яна нагадвае і васілёк, колер якога залежыць ад нацыянальных колераў кожнай краіны.
Эпіцэнтрам конкурсных падзей, як і ў 2010 годзе, стала “Мінск-Арэна”, дзе на працягу ўсяго еўратыдню працаваў прэс-цэнтр і праводзіліся рэпетыцыі. Сёлета галоўная пляцоўка конкурсу складаецца з дзвюх сцэн — вялікай і маленькай, і яны злучаны 7-метровым мостам. Зялёны пакой, дзе будуць чакаць на вердыкт удзельнікі конкурсу, створаны ў выглядзе вострава, які быццам лунае ў нябёсах.
Увогуле, асвятленню гэтым разам была нададзеная асаблівая ўвага — балазе, сёлетнія дэвіз і канцэпцыя “Еўрабачання” патрабуе павышанай яркасці! Над сцэнаграфіяй працавала мастачка-пастаноўшчык генеральнага прадзюсарскага цэнтра Белтэлерадыёкампаніі Галіна Гоманава, якая з’яўляецца часткай каманды “Еўрабачання” яшчэ з таго моманту, як наша краіна пачала ўдзельнічаць у конкурсе.
Лічаныя гадзіны засталіся да пачатку “Еўрабачання”, усе канкурсанты па чарзе хутка праганяюць свае нумары, таму часу на размовы з прэсай амаль няма. Тым не меней, беларускі ўдзельнік дзеліцца сваім настроем:
— Я хачу, каб кожны, хто будзе глядзець мой выступ, зразумеў, што я хачу да яго данесці, — кажа ён. — Ва ўсіх у нейкі перыяд жыцця з’яўляецца штосьці новае — і вось, для мяне гэта “Еўрабачанне”. Мы рабілі менавіта такую сцэнаграфію, каб яна адпавядала той гісторыі, што распавядаецца ў маёй песні.
Нагадаем, што галасаванне будзе праходзіць у два этапы: анлайн і непасрэдна падчас шоу. Анлайн-галасаванне распачалося 23 лістапада на афіцыйным сайце “Еўрабачання” і завяршыцца 25 лістапада перад пачаткам конкурсу. Другі этап будзе доўжыцца 15 хвілін у прамым эфіры пасля выступленняў канкурсантаў усіх 20 краін.
Беларускі ўдзельнік выйдзе на сцэну пад нумарам 8 — і спадзяемся, што ён стане для яго шчаслівым.