Гэтую буйную партытуру для струнных узяў у свой рэпертуар аркестр “Метамарфоза” на чале з Паўлам Любамудравым і прадставіў у сваім канцэрце “Viva музыка!”. Планы вечарыны давялося скарэктаваць: заяўлены знакаміты расійскі арфіст Аляксандр Балдачоў прыехаць не змог, пра што публіку загадзя папярэдзілі. Але масавай адмовы ад набытых квіткоў не назіралася, бо гэты калектыў даўно займеў уласных прыхільнікаў: за сем гадоў яго існавання было сыграна каля паўсотні канцэртных праграм. Дый з некаторымі беларускімі кампазітарамі ўсталяваліся творчыя сувязі: аркестр выконваў музыку Настассі Бяндэрскай, Аляксандра Пажарыцкага. А са знакамітым Аляксандрам Літвіноўскім, чыя творчасць добра вядома ў нас і за межамі, увогуле склалася трывалае супрацоўніцтва.
— Рэдка здараецца, каб выканаўцы на струнных, — гаворыць кампазітар, — дабіваліся такой ідэальнай інтанацыі, як гэта адбываецца ў аркестры “Метамарфоза”. Павел Любамудраў надзвычай карэктна ставіцца да кожнай ноты, занесенай аўтарам у партытуру. Таму я без аніякіх ваганняў давяраю яму прэзентацыі сваіх твораў.
Раней у выкананні “Метамарфозы” гучалі сюіты Аляксандра Літвіноўскага “Казкі пра чароўнае дрэва”, “Вялікі сшытак” і іншыя творы. Выкладзеныя ў Інтэрнэт, яны назбіралі безліч захапляльных водгукаў з розных кантынентаў. Да прыкладу, такое меркаванне: “Захапляльна прыгожа! Калі слухаю музыку Аляксандра Літвіноўскага, здаецца, што трапляю ў зусім новы свет чараўніцтва, таямніц і прыгод. Такі бліскуча таленавіты калектыў і дальнабачны кампазітар! Вялікі дзякуй, што падзяліліся гэтым золатам!”
У цяперашнім канцэрце сюіта “Пелеас і Мелізанда” была змешчана між двума сучаснымі англійскімі хітамі: музыкай Раміна Джавадзі да серыяла “Гульня тронаў” і кампазіцыяй “Паладыё” Карла Джэнкінса. І не толькі не прайграла ад такога атачэння, а ўпэўнена заняла першае месца.
Твор Аляксандра Літвіноўскага быў натхнёны аднайменнай п’есай бельгійскага пісьменніка Марыса Метэрлінка. Да яе ў свой час звярталіся такія сусветныя класікі, як француз Клод Дэбюсі, які стварыў оперу, фінскі кампазітар Ян Сібеліус, што напісаў да драмспектакля музыку, якая стала сімфанічнай сюітай. Літвіноўскі спачатку таксама стварыў музыку да спектакля — для расійскага тэатра лялек “Гулівер” у Кургане, дзе гэтая п’еса ўвасаблялася цалкам беларускай пастаноўчай камандай: нашы творцы шырока запатрабаваны ў замежжы і атрымліваюць найпрэстыжнейшыя тэатральныя прэміі розных краін, уключаючы расійскую “Залатую маску”. Але цяперашняя партытура, напісаная ўлетку, ні ў якай меры не паўтарае ні чужыя, ні ўласны зварот кампазітара да Метэрлінка: з музыкай да спектакля гэты твор яднае хіба адна-адзіная музычная тэма, а іх у сюіце — безліч.
Падрабязней аб прэм'еры чытайце ў газеце "Культура" №14 за 2 красавіка.